ចិនគ្រោងប្រើមនុស្សយន្តបំពាក់បច្ចេកវិទ្យា AI ឱ្យបម្រើក្នុងសេវាថែទាំមនុស្សចាស់

ប្រទេសចិន កាលពីចុងខែកន្លងទៅបានដាក់ចេញនូវគោលការណ៍ថ្មីមួយ ដើម្បីជំរុញការផលិត និងប្រើប្រាស់មនុស្សយន្ត ដែលបំពាក់ខួរក្បាលដោយបច្ចេកវិទ្យាបញ្ញាសិប្បនិម្មិត ឬ AI នៅក្នុងវិស័យសុខាភិបាល។ គោលការណ៍ថ្មីនេះ គឺជាផ្នែកមួយរបស់រដ្ឋាភិបាលចិនក្នុងការពន្លឿនការអភិវឌ្ឍ និងការអនុវត្តបច្ចេកវិទ្យាក្នុងការថែទាំមនុស្សចាស់ និងគាំទ្រគម្រោងវិទ្យាសាស្ត្រ និងបច្ចេកវិទ្យាសំខាន់ៗទាក់ទងនឹងសេវាកម្មជឿនលឿន។

មនុស្សយន្តបំពាក់បច្ចេកវិទ្យា AI ដែលមានសមត្ថភាពអាចទំនាក់ទំនងជាមួយមនុស្សទូទៅនេះកំពុងវិវត្តយ៉ាងឆាប់រហ័ស និងមានសក្តានុពលដ៏អស្ចារ្យសម្រាប់បម្រើក្នុងវិស័យផ្សេងៗដូចជាសេវាថែទាំសុខភាព និងសេវាកម្មនៅតាមផ្ទះជាដើម។ បើតាមគោលការណ៍ខាងលើ ប្រទេសចិនមានបំណងបង្កើតប្រព័ន្ធថែទាំមនុស្សចាស់ឱ្យស្របតាមតម្រូវការរបស់ប្រទេសនេះ។

បើយោងតាមរបាយការណ៍ដែលចេញផ្សាយកាលពីឆ្នាំមុន អាយុសង្ឃឹមរស់របស់ប្រទេសចិនបានឈានដល់ជាង៧៨ឆ្នាំ ខណៈបច្ចុប្បន្នប្រជាជនចិនដែលមានអាយុចាប់ពី៦៥ឆ្នាំឡើងទៅមានចំនួនសរុបជិត២១៧លាននាក់ ស្មើនឹងជាង១៥% នៃចំនួនប្រជាជនសរុបរបស់ប្រទេសចិន គិតត្រឹមចុងឆ្នាំ២០២៣៕

អត្ថបទ៖ សុខ មង្គល