ក្នុងសុន្ទរកថាថ្ងៃដំបូង កាលពីថ្ងៃអង្គារទី២១ខែកញ្ញា មហាអំណាចធំៗទាំងពីរគឺចិន និងសហរដ្ឋអាមេរិក បានថ្លែងអះអាងរៀងៗខ្លួន ពីកិច្ចខិតខំប្រឹងប្រែង និងការតាំងចិត្តក្នុងការរួមចំណែកដោះស្រាយបញ្ហាប្រែប្រួលអាកាសធាតុ ដែលកំពុងកើតមានក្នុងពេលបច្ចុប្បន្ន។
ប្រធានាធិបតីចិន លោកស៊ី ជីងពីង បានថ្លែងទៅកាន់អង្គមហាសន្និបាតថា ចិននឹងមិនផ្តល់មូនិធិសម្រាប់បង្កើតគម្រោងថាមពលធ្យូងថ្មីនៅក្រៅប្រទេសបន្តទៀតនោះទេ។ នេះជាការសន្យាថ្មីមួយទៀតរបស់រដ្ឋអំណាចក្រុងប៉េកាំង ដើម្បីដោះស្រាយការប្រែប្រួលអាកាសធាតុ។
ទោះលោកស៊ី មិនបានពន្យល់លម្អិត ប៉ុន្តែបើយោងតាមការបង្ហើបឲ្យដឹងខាងលើ ការមិនបន្តផ្តល់មូលនិធិសម្រាប់គម្រោងថាមពលធ្យូថ្ម នឹងឈានទៅកំណត់ចំនួនរោងចក្រធ្យូងថ្មរបស់ចិននៅតាមប្រទេសកំពុងអភិវឌ្ឍ ឲ្យស្ថិតក្នុងចំនួនកំណត់មួយជាក់លាក់។
ត្រូវបានស្រង់សំដីដើមដោយសារព័ត៌មានរ៉យទ័រ លោកស៊ី ជីងពីង បាននិយាយថា៖ ប្រទេសចិននឹងបង្កើនការគាំទ្រដល់ប្រទេសកំពុងអភិវឌ្ឍន៍ ក្នុងការប្រើប្រាស់ថាមពលបៃតងឲ្យបានច្រើន និងកាត់បន្ថយការបញ្ចេញឧស្ម័នពុលឲ្យមកនៅទាប តាមរយៈការមិនបង្កើតគម្រោងថាមពលដើរដោយធ្យូងថ្មថ្មីៗនៅបរទេសទៀតឡើយ។
គួរជម្រាបថា នេះជាការសន្យាម្តងទៀត របស់ក្រុងប៉េកាំងក្នុងកិច្ចខិតខំប្រឹងប្រែងសម្រេចឲ្យបាននូវការកាត់បន្ថយការបញ្ចេញឧស្ម័នកាបូនិកឲ្យបានមុនឆ្នាំ២០៣០ និងសម្រេចឲ្យបាន កម្មវត្ថុ អព្យាក្រឹតកាបូន ឬ កាត់បន្ថយ ការបញ្ចេញឧស្ម័នផ្ទះកញ្ចក់ ឲ្យដល់កម្រិត សូន្យនៅឆ្នាំ ២០៦០។
គួរបញ្ជាក់ថា ថាមពលធ្យូងថ្មជាអ្នកបង្កើតឲ្យមានឧស្ម័នផ្ទះកញ្ចក់ ប្រមាណ៤០ភាគរយនៃឧស្ម័នផ្ទះកញ្ចក់សរុបលើផែនដី។ បើតាមអង្គការតាមដានឧស្ម័នកាបូនិក ដែលមានទីស្នាក់ការនៅប្រទេសអង់គ្លេស ៨០%នៃរោងចក្រប្រើធ្យូងថ្មនៅបរទេសជាការវិនិយោគរបស់ក្រុមហ៊ុនចិន ហើយចិន ចិនក៏ជាប្រទេសបញ្ចេញឧស្ម័នកាបូនិកច្រើនជាងគេក្នុងពិភពលោកផងដែរ ពោលគឺ ២៩%នៃឧស្ម័នកាបូនិកសរុបដែលបញ្ចេញទៅក្នុងបរិយាកាសផែនដី។
អត្ថបទគួរអាន
ទន្ទឹមនឹងចិនប្រកាសឈប់បង្កើតគម្រោងវិនិយោគធ្យូងថ្មនៅក្រៅប្រទេសនេះដែរ អាមេរិកឯណោះវិញ ក៏សន្យាបង្កើនមូលនិធិទ្វេដង ជួយប្រទេសកំពុងអភិវឌ្ឍន៍ទប់ទល់នឹងវិបត្តិប្រែប្រួលអាកាសធាតុផងដែរ។
ប្រធានាធិបតីអាមេរិក លោកចូ បៃឌិនបានថ្លែងទៅកាន់អង្គមហាសន្និបាតអង្គការសហប្រជាជាតិថា លោកនឹងធ្វើការជាមួយព្រឺទ្ធសភាអាមេរិក ដើម្បីបង្កើនមូលនិធិទ្វេដងក្នុងចំនួនប្រមាណ១១ពាន់លានដុល្លារក្នុងមួយឆ្នាំ ឲ្យបានមុនឆ្នាំ២០២៤ ដើម្បីជួយដល់ប្រទេសកំពុងអភិវឌ្ឍន៍សម្រាប់ដោះស្រាយបញ្ហាអាកាសធាតុ។
យ៉ាងណាមិញ ការប្រកាសរបស់សហរដ្ឋអាមេរិកមិនត្រូវបានក្រុមអ្នកធ្វើការផ្នែកធាតុអាកាស និងសកម្មជនបរិស្ថានសាទរនោះទេ។ មិនសារទរក៏ដោយសារតែពួកគេយល់ថា ការតាំងចិត្ត និងកិច្ចខិតខំប្រឹងប្រែងរបស់អាមេរិក មានទំហំតិចតួចបើធៀបទៅនឹងទំហំ នៃការបំផ្លាញបរិស្ថានរបស់អាមេរិក។
សូមបញ្ជាក់ថា មិនមែនតែប្រទេសចិននោះទេដែលជាអ្នកបញ្ចេញឧស្ម័នកាបូនិចដ៏ច្រើនសម្បើមទៅក្នុងបរិយាកាស សហរដ្ឋអាមេរិកក៏ជាប្រទេសមួយក្នុងចំណោមក្រុមប្រទេសអ្នកមាន ដែលបញ្ចេញ CO2 ច្រើនជាងគេផងដែរបន្ទាប់ពីប្រទេសចិន៕
None
