ការបដិសេធពីសំណាក់រដ្ឋាភិបាលចិនជាថ្មីម្តងទៀតនេះ ធ្វើឡើងនៅក្រោយពេលដែលអង្គការសុខភាពពិភពលោក កាលពីថ្ងៃព្រហស្បតិ៍សប្តាហ៍មុន បានស្នើទៅកាន់ប្រទេសជាសមាជិក នៃអង្គការសុខភាពពិភពលោកទាំងអស់ ជាពិសេសប្រទេសចិន ឲ្យជួយផ្សព្វផ្សាយនូវទិន្នន័យដើមរបស់វីរុសដ៏កាចសហាវមួយនេះ ដើម្បីអនុញ្ញាតឲ្យអ្នកជំនាញអាចយកទិន្នន័យទាំងនោះមក សិក្សាលើសម្មតិកម្មដែលថា «រីរុសកូរ៉ូណាបានធ្លាយចេញពីមន្ទីរពិសោធន៍ក្រុងវូហាន ឬក៏យ៉ាងណានោះ ។
«សំណើសិក្សាស្វែងរកជាថ្មីប្រភពចម្លងកូវីដ១៩ពី WHO បានបង្កប់គោលបំណងនយោបាយ និង មិនមានភាពប្រាកដនិយមតាមបែបវិទ្យាសាស្ត្រនោះទេ»។ នេះជាអ្វីដែលលោក ម៉ា ចាវស៊ូ (Ma Zhaixu) អនុរដ្ឋមន្ត្រីក្រសួងការបរទេសក្រុងប៉េកាំងបានលើកឡើង ឆ្លើយតបនឹងសំណើរបស់WHO។ មន្ត្រីជាន់ខ្ពស់ក្រុងប៉េកាំងរូបនេះបានបន្តថា ចិនគាំទ្រតែការសិក្សាស្រាវជ្រាវណា ដែលស្របតាម បទដ្ឋានវិទ្យសាស្ត្រប៉ុណ្ណោះ និង មិនមែនស្ថិតក្រោមហេតុផលនយោបាយ។
គួរជម្រាបថា សំណុំរឿងប្រភពចម្លងកូវីដ១៩ ដ៏រសើបនេះ បានផុសផុលឡើងវិញនៅមួយរយៈចុងក្រោយនេះ ស្របពេលដែលប្រទេសចិន ក៏កំពុងរងសម្ពាធពីមជ្ឈដ្ឋានអន្តរជាតិ ក្រោយបដិសេធជាញឹកញយមិនព្រមឲ្យ WHO ចូលទៅស៊ើបអង្កេតក្នុងប្រទេសខ្លួនម្តងទៀត។
អត្ថបទគួរអាន
រដ្ឋាភិបាលក្រុងប៉េកាំង រមែងលើកយកលទ្ធផលនៃកាសិក្សាលើកទី១យកមកធ្វើជាខែលការពារសម្ពាធពីអន្តរជាតិ ដោយបានអះអាងថា ការសិក្សាកាលពីខែមករាដើមឆ្នាំនេះ បានទទួលលទ្ធផលគ្រប់គ្រាន់ហើយ ត្រូវបានអន្តរជាតិ និងក្រុមអ្នកវិទ្យាសាស្ត្រទទួលស្គាល់ម្តងរួចទៅហើយដែរ។ ផ្ទុយទៅវិញចិនបានបង្ហាញការគាំទ្រលើការសិក្សាម្តងទៀត ប៉ុន្តែត្រូវយកលទ្ធផលការស៊ើបអង្កេតកាលពីខែមករាមកធ្វើជាគោល។
យ៉ាងណាមិញ បើគេសង្កេតលើរបាយការណ៍កាលនោះ លទ្ធផលនៃការសិក្សាលើកដំបូង មិនបានបញ្ជាក់ឲ្យច្បាស់លាស់ពីប្រភពដើមរបស់កូវីដ១៩នោះទេ ដោយអ្នកជំនាញគ្រាន់តែបានសម្រេចយកពីរទៅបីសម្មតិកម្ម ជាលទ្ធផលនៅក្នុងរបាយការណ៍ប៉ុណ្ណោះ។ ក្នុងចំណោមសម្មតិកម្ម ទាំងអស់កាលគ្រានោះត្រូវបានគេដាក់ការសន្និដ្ឋានច្រើនជាងគេលើសេណារីយ៉ូ នៃការចម្លងកូវីដ១៩ចេញពីសត្វប្រជៀវ រួចចម្លងមកសត្វមួយប្រភេទផ្សេងទៀត ដែលគេនៅមិនដឹងថា ជាសត្វអ្វីនៅឡើយ រួចទើបចម្លងមកមនុស្ស។
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
