ពាណិជ្ជករនៅក្នុងប្រទេសចិននឹងមិនអាចនាំចូលផលិតផល រួមមាន ធ្យូងថ្ម ស្រូវ Barley, លោហៈនិងរ៉ែទង់ដែង ស្ករស ឈើ ស្រា និងបង្កង បានទេ ។ នេះបើយោងតាមអ្នកដែលបានដឹងពីបញ្ហានេះ ។ ប្រភពម្នាក់ដែលសុំមិនបញ្ចេញឈ្មោះ បាននិយាយថា រដ្ឋាភិបាលបានបញ្ជាឱ្យបញ្ឈប់ការនាំចូលនេះ ដោយចាប់ផ្តើមនៅថ្ងៃសុក្រនេះ ។
ប្រភពដដែល បាននិយាយថា សេចក្តីជូនដំណឹងនេះ ត្រូវបានបញ្ជូនទៅពាណិជ្ជករធំៗ នៅក្នុងការប្រជុំគ្នាមួយ កាលពីសប្តាហ៍ថ្មីៗនេះ ។ ប៉ុន្តែថា រ៉ែដែកដែលជាការនាំចេញធំបំផុតរបស់អូស្រ្តាលីទៅកាន់ប្រទេសចិន នឹងមិនត្រូវបានរាប់បញ្ចូលក្នុងការហាមនោះទេ ។
អត្ថបទទាក់ទង
បទបញ្ជានេះបង្ហាញពីការធ្លាក់ចុះយ៉ាងខ្លាំងនៃទំនាក់ទំនងចិន-អូស្ត្រាលី ដែលបានតានតឹងចាប់តាំងពីអូស្ត្រាលីបានរារាំងក្រុមហ៊ុន Huawei Technologies Co របស់ចិន មិនឲ្យបង្កើតបណ្តាញ 5G របស់ខ្លួន នៅឆ្នាំ២០១៨ ដោយសារហេតុផលសន្តិសុខជាតិ ។ ទំនាក់ទំនងចិន-អូស្ត្រាលីបានធ្លាក់ចុះ ចាប់តាំងពីពេលដែលរដ្ឋាភិបាលរបស់លោកនាយករដ្ឋមន្រ្តី ស្កុត ម៉ូរីសុន កាលពីខែមេសា ដើមឆ្នាំនេះ បានអំពាវនាវឱ្យមានការស៊ើបអង្កេតឯករាជ្យមួយដើម្បីរកប្រភពដើមនៃវីរុសកូវីដ-១៩ ។
អ្នកវិភាគបាននិយាយថា ចិនហាក់ដូចជាម៉ឺងម៉ាត់បំផុតក្នុងការដាក់ទណ្ឌកម្មលើប្រទេសអូស្ត្រាលី និងធ្វើឲ្យវាក្លាយជាគំរូសម្រាប់ប្រទេសដទៃទៀត និងថា ចិនចង់បង្ហាញថា អ្នកណាដែលខ្វែងគំនិតនយោបាយជាមួយចិន នឹងត្រូវបង់ខាតតម្លៃ ។
កន្លងមក ចិនបានហាមឃាត់ការនាំចូលទំនិញសំខាន់ៗមួយចំនួន ពីអូស្ត្រាលី រួចមកហើយ ។ ទំនាក់ទំនងរវាងចិននិងអូស្ត្រាលី ចាប់ផ្ដើមមានរឿងរកាំរកូសរហូត ចាប់តាំងពីពេលរដ្ឋាភិបាលអូស្ត្រាលីបានអំពាវនាវឲ្យពិភពលោកស៊ើបអង្កេតរកប្រភពដើមនៃមេរោគរាតត្បាត កូវីដ-១៩ ដែលបាននិងកំពុងវាយលុកពិភពលោកទាំងមូល រហូតដល់សព្វថ្ងៃ ៕
