កាសែតអនឡាញរបស់ចិន The Paper បានរាយការណ៍ថា ទីក្រុងជាង ២០ នៅទូទាំងខេត្តនិងតំបន់ស្វយ័តរបស់ចិនចំនួន ១២ បានចាប់ផ្តើមការលើកទឹកចិត្តក្នុងការទិញអចលនទ្រព្យជាក្រុមចាប់តាំងពីខែមិថុនា ហើយទីក្រុងចំនួន ១០ ដែលភាគច្រើនជាមជ្ឈមណ្ឌលក្នុងតំបន់ពីតូចទៅមធ្យមបានធ្វើសេចក្តីប្រកាសដូចគ្នាកាលពីខែកញ្ញា ឬក៏ក្រោយពីនោះមកទៀតផងដែរ។
នៅតាមផ្នែកខ្លះនៅទីក្រុងសាវហ្ស៊ីង (Shaoxing) នៅក្នុងខេត្តហ្សេជាំង (Zhejiang) ឥឡូវនេះអ្នកទិញចលនវត្ថុ អាចទទួលបានការបញ្ចុះតម្លៃរហូតដល់ ៨% សម្រាប់ការទិញផ្ទះចាប់ពី ១០ ខ្នងផ្ទះឡើងទៅ ឬច្រើនជាងនេះ ឬក៏អាចទទួលបានការបញ្ចុះតម្លៃច្រើនជាងនេះទៅទៀតគឺរហូតដល់ ១៨% សម្រាប់ការទិញជាក្រុមផងដែរ។
រដ្ឋាភិបាលក្នុងតំបន់សង្ឃឹមថាការបញ្ចុះតម្លៃថ្មីនេះ នឹងលើកទឹកចិត្តដល់ការទិញលំនៅឋាននៅក្នុងចំណោមសមាជិករបស់បក្សកុម្មុយនិស្តចិន ក៏ដូចជាអ្នកដែលធ្វើការឱ្យភ្នាក់ងាររដ្ឋាភិបាល និងក្រុមហ៊ុនរបស់រដ្ឋ ដែលមានប្រាក់ខែច្រើនជាងអ្នកបម្រើការងារនៅតាមវិស័យឯកជន។
អត្ថបទគួរអាន
យោងតាមការិយាល័យស្ថិតិជាតិរបស់ប្រទេសចិនបានបង្ហាញថា បុគ្គលិកបម្រើការនៅក្រុមហ៊ុនរដ្ឋនៅក្នុងទីក្រុងជាមធ្យមទទួលបានប្រាក់ឈ្នួលប្រហែល ១៦ ២០០ ដុល្លារក្នុងមួយឆ្នាំ គិតក្នុងឆ្នាំ២០២១ ពោលគឺច្រើនជាង ៨៤% នៃប្រាក់ឈ្នួលជាមធ្យមរបស់បុគ្គលិកធ្វើការនៅតាមវិស័យឯកជន ដែលទទួលបានត្រឹមតែ ៨ ៧៧០ដុល្លារប៉ុណ្ណោះក្នុងមួយឆ្នាំ។ គម្លាតនេះបានបន្តកើនឡើងតាំងពីឆ្នាំ២០១៤មកម្ល៉េះ ដែលកាលនោះគឺច្រើនជាងត្រឹមតែ ៥៧% ប៉ុណ្ណោះ។
ទីផ្សារលំនៅឋានរបស់ប្រទេសចិនបានជួបបញ្ហានៃការកើនឡើងនៃការផ្គត់ផ្គង់ច្រើនពេក ខណៈដែលការលក់លំនៅឋានបានធ្លាក់ចុះ ហើយខុនដូថ្មីដែលមិនទាន់លក់ដាច់ គឺកើនឡើងកាន់តែខ្ពស់កាលពីចុងខែសីហាបើធៀបនឹងរយៈដូចគ្នាក្នុងរយៈពេល៣ឆ្នាំចុងក្រោយនេះ។
ពេលនេះគេមានក្តីសង្ឃឹមថា សម្ពាធនៃការធ្លាក់ចុះតម្លៃលំនៅឋាននឹងមានភាពធូរស្រាលឡើងវិញនៅពេលណាចំនួនផ្គត់ផ្គង់លំនៅដ្ឋានបានធ្លាក់ចុះវិញ ដែលធ្វើឱ្យតម្រូវការលំនៅឋានងើបឡើងវិញរួមទាំងនៅក្នុងចំណោមកម្មករក្នុងវិស័យឯកជនផងដែរ។ ហើយវាក៏នឹងផ្ដល់អត្ថប្រយោជន៍ដល់រដ្ឋាភិបាលក្នុងតំបន់ដែលរកចំណូលបានច្រើនពីការលក់សិទ្ធិប្រើប្រាស់ដីធ្លីសម្រាប់ដីរដ្ឋដល់ក្រុមអ្នកអភិវឌ្ឍន៍អចលនទ្រព្យថែមទៀត។
ប៉ុន្តែ វាមិនច្បាស់ថាតើការបញ្ចុះតម្លៃតែម្យ៉ាងគត់នេះនឹងធ្វើឱ្យមានការផ្លាស់ប្ដូរខ្លាំង ឬក៏យ៉ាងណានោះឡើយ។ ស្រុក តុងលូ (Tonglu) នៅក្នុងទីក្រុង ហាងហ្ស៊ូ (Hangzhou) បានប្រកាសជាលើកដំបូងពីការលើកទឹកចិត្តសម្រាប់ការទិញផ្ទះជាក្រុមនៅចុងខែមិថុនា ប៉ុន្តែនៅរយៈពេលមួយខែក្រោយមកគេមិនបានឃើញស្រុកនេះទទួលបានកិច្ចសន្យាទិញលក់ណាមួយត្រូវបានធ្វើឡើងនោះទេ។ នេះបើតាមសេចក្តីរាយការណ៍របស់ប្រព័ន្ធផ្សព្វផ្សាយចិន៕
អត្ថបទ៖ សុខ ជា
