ការបិទទ្វារបណ្ដោះអាសន្នរបស់កំពង់ផែដ៏ធំរបស់ចិនមួយនេះ បានធ្វើឡើងតាំងពីថ្ងៃពុធសប្ដាហ៍មុន ក្រោយពីរកឃើញថា មានករណីឆ្លងកូវីដ-១៩លើបុគ្គលិកម្នាក់ដែលបម្រើការក្នុងកំពង់ផែនេះ បើទោះបីជាបុគ្គលិកនោះ បានចាក់វ៉ាក់សាំងគ្រប់ចំនួន២ដូសរួចហើយក្ដី។ នេះបើតាមការរាយការណ៍ដោយសារព័ត៌មានអន្តរជាតិធំៗជាច្រើន។
ក្រោយពីបានរកឃើញកម្មករម្នាក់មានវិជ្ជមានកូវីដ-១៩ កំពង់ផែកុងតឺន័រ នីងបូ ស៊ូសាន បានសម្រេចបិទទ្វារបណ្ដោះអាសន្ននូវប្រតិបត្តិតាំងពីថ្ងៃពុធសប្ដាហ៍មុនមកម្ល៉េះ ដោយក្នុងនោះ ក៏មានកម្មករជិត២ពាន់នាក់ដែលធ្វើការក្នុងកំពង់ផែនេះ ត្រូវបានដាក់ឲ្យនៅដាច់ដោយឡែក ដើម្បីតាមដានសុខភាព ហើយពួកគេមិនត្រូវបានអនុញ្ញាតឲ្យចេញពីកំពង់ផែនោះឡើយ។ ស្ថានីយចំណត ម៉ៃសាន ដែលកន្លែងធ្វើការរបស់បុគ្គលិកដែលមានវិជ្ជមានកូវីដ-១៩ ត្រូវបានបន្ដផ្អាកចរាចរណ៍ទំនិញចេញចូលនៅឡើយ។ បើតាមស្ថាប័នប្រឹក្សាយោបល់ GardaWorld បានប៉ាន់ប្រមាណថា ស្ថានីយចំណតដែលបានផ្អាកប្រតិបត្តិការនេះ គឺមានប្រហែល ២៥% នៃការចរាចរណ៍ទំនិញនៅក្នុងកំពង់ផែ នីងបូ ស៊ូសានទាំងមូល។ បើទោះបីជា ខាងថ្នាក់ដឹកនាំកំពង់ផែនេះនិយាយថា នឹងបង្វែរការដឹកជញ្ជូនទំនិញទៅកាន់ស្ថានីយចំណតផ្សេងជំនួសក៏ដោយ ប៉ុន្ដែ អ្នកជំនាញនៅតែបារម្ភពីភាពយឺតយ៉ាវនៅក្នុងការដឹកជញ្ជូនដដែល។
ស្ថានីយចំណតម៉ៃសាន (Meishan) នៃ កំពង់ផែ នីងបូ-ហ្សូសាន កាលពីឆ្នាំ ២០២០ មានទំនិញឆ្លងកាត់ប្រមាណ ជាង ១ពាន់លានតោន។ យ៉ាងណាមិញ ការរអាក់រអួលនៃការដឹកជញ្ជូនទំនិញ ត្រូវបានគេមើលឃើញថា នឹងធ្វើឱ្យប៉ះពាល់ដល់ការផ្គត់ផ្គង់ទំនិញបន្ថែមទៀត ពោលគឺបណ្ដាលឲ្យបរិមាណទំនិញលើទីផ្សារធ្លាក់ចុះ និងជំរុញឱ្យតម្លៃកើនឡើង។
អត្ថបទគួរអាន
មានក្រុមហ៊ុនដឹកជញ្ជូនធំៗមួយចំនួន ដូចជាក្រុមហ៊ុន Yang Ming Marine ជាដើមបានជូនដំណឹងទៅកាន់អតិថិជនរបស់ខ្លួនរួចហើយអំពីករណីអាចកើតមានឡើងនៃការកកស្ទះទំនិញ និងបានស្នើឲ្យម្ចាស់ទំនិញពិនិត្យស្ថានីយដឹកជញ្ជូនឲ្យបានត្រឹមត្រូវជាមុនសម្រាប់ការដឹកជញ្ជូនឆ្លងកាត់កំពង់ផែនីងបូ ស៊ូសាននេះ។
សូមបញ្ជាក់ថា នេះមិនមែនជាលើកទី១នោះទេ ដែលមានករណីផ្ទុះរាលដាលឆ្លងកូវីដ-១៩មាននៅក្នុងកំពង់ផែដឹកជញ្ជូនទំនិញ កន្លងមកក៏មានកំពង់ផែមួយចំនួនទៀតក៏ធ្លាប់ជួបការរំខានដូចគ្នាដែរនេះដែរ ជាក់ស្ដែងកំពង់ផែ យ៉ានតៀន នៅក្នុងទីក្រុងស៊ិនជិនប្រទេសចិន កាលពីខែឧសភា ក៏មានករណីឆ្លងកូវីដ-១៩ដល់បុគ្គលិកកំពង់ផែដែរ។ បញ្ហានេះ កំពុងបង្កក្ដីបារម្ភកាន់តែខ្លាំង ថាអាចនឹងមានកំពង់ផែផ្សេងៗទៀតនៅទូទាំងពិភពលោកនឹងប្រឈមបញ្ហាផ្ទុះរីករាលដាលកូវីដ-១៩នេះ ដូចគ្នានេះដែរ ខណៈដែលបច្ចុប្បន្នមេរោគបំប្លែងថ្មី ឌែលតាកំពុងរាតត្បាតកាន់តែខ្លាំងក្លា ពីមួយថ្ងៃទៅមួយថ្ងៃនៅពាសពេញសាកលលោក៕
None
