អ្នកនាំពាក្យក្រសួងការបរទេសចិន លោក ចៅ លីចៀន បានប្រាប់ទៅសន្និសីទសារព័ត៌មានកាលពីថ្ងៃអង្គារថា ក្រុងប៉េកាំងប្រឆាំងនឹងការធ្វើពហិការរបស់អាមេរិក និងបានសន្យាថា នឹងមានវិធានការណ៍ប្រឆាំងដាច់ខាតមួយ ទុកជាការឆ្លើយតប ហើយលោកបានប្រាប់ឲ្យរង់ចាំមើលទាំងអស់គ្នា។ ប៉ុន្តែអ្នកនាំពាក្យរូបនេះមិនបាន បញ្ជាក់ច្បាស់ថាជាវិធានការណ៍អ្វីនោះទេ។
លោក ចៅ លីចៀន បានស្តីបន្ទោសខ្លាំងៗថា សហរដ្ឋអាមេរិកត្រូវតែតបស្នងមកវិញ នូវទង្វើដែលខ្លួនបានធ្វើដ៏ខុសឆ្គងមួយនេះ។
គួរជម្រាបថា សហរដ្ឋអាមេរិកកាលពីថ្ងៃច័ន្ទទី០៦ធ្នូដើមសប្តាហ៍នេះ បានប្រកាសជាផ្លូវការថា ខ្លួននឹងធ្វើពហិការផ្នែកការទូតចំពោះព្រឹត្តិការកីឡាអូឡាំពិករដូវរងា ពោលគឺនឹងមិនមានមន្ត្រីសហរដ្ឋអាមេរិកណាម្នាក់នឹងទៅចូលរួមព្រឹត្តិការណ៍កីឡាអូឡំាំពិក ដែលប្រារព្ធនៅទីក្រុងប៉េកាំងនោះទេ ខណៈដែលព្រឹត្តិការណ៍កីឡានេះ នឹងត្រូវធ្វើឡើងខែកុម្ភៈឆ្នាំ២០២២។ ការធ្វើពហិកាការទូតរបស់អាមេរិក ត្រូវបានសេតវិមានអាមេរិកអះអាងថា ដោយសារតែបញ្ហាសិទ្ធិមនុស្សនៅប្រទេសចិន ត្រូវបានរំលោភបំពាន។
ក្រុមអ្នកការពារសិទ្ធិជនជាតិម៊ូស្លីមអ៊ុយហ្គ័រ បានសម្តែងការសារទរចំពោះការធ្វើពហិការរបស់អាមេរិក ហើយបានស្នើឲ្យប្រទេសនានា បន្តបង្ហាញគោលជំហរស្រដៀងគ្នានេះដែរ ដើម្បីគាំទ្រដល់សិទ្ធិជនជាតិភាគតិចអ៊ុយហ្គ័រ និងសម្តែងការមិនពេញចិត្តដល់ក្រុងប៉េកាំង។ ជាក់ស្តែង មកទល់នឹងពេលនេះ រដ្ឋាភិបាលអូស្រ្តាលី បានចូលរួមជាសម្ព័ន្ធមិត្តចាក់ទឹកមិនលេចរបស់ខ្លួនគឺអាមេរិក ដោយអូស្ត្រាលីបានប្រកាសថា នឹងធ្វើពហិការការទូតមិនចូលរួមព្រឹត្តិការអូឡាំពិករដូវរងានៅប៉េកាំងដូចគ្នាដែរ។ នេះបើតាមការប្រកាសពីនាយករដ្ឋមន្ត្រីអូស្រ្តាលី លោក ស្កុត ម៉ូរីសុន នៅថ្ងៃពុធនេះតែម្តង។
ភាគីអូស្រ្តាលី អះអាងថា ការធ្វើពហិការរបស់ខ្លួនថា ដោយសារតែចិនមិនបានធ្វើតាមការស្នើសុំរបស់អូស្រ្តាលី ជុំវិញបញ្ហាសិទ្ធិមនុស្សនៅស៊ីនជាំង។ ផ្ទុយទៅវិញ ក្រុងប៉េកាំងបានទាត់ចោលរឿងសិទ្ធិមនុស្សនេះ ហើយបានអំពាវនាវឲ្យ គេបែងចែកឲ្យដាច់ រវាងកីឡា និងហេតុផលនយោបាយ។
សូមជម្រាបថា បច្ចុប្បន្នមានប្រទេសមួយចំនួនទៀត ដែលជិតស្និទ្ធិនឹងអាមេរិក ក៏កំពុងពិចារណាពីគោលជំហររបស់ខ្លួន នៃការចូលរួមព្រឹត្តិការណ៍កីឡាអូឡាំពិកនៅក្នុងប្រទេសចិននេះដែរ។ ក្នុងនោះ ប្រទេសកាណាដា ហូឡង់ និងជប៉ុន កំពុងគិតគូរថាតើខ្លួន គួរចូលរួមជាមួយអាមេរិក និងអូស្រ្តាលី ដើម្បីធ្វើពហិការការទូតនៅអូឡាំពិករដូវរងាឆ្នាំក្រោយដែរឬយ៉ាងណា? ខណៈប្រទេសញូហ្សេឡែន បានប្រកាសហើយថា ខ្លួននឹងមិនបញ្ជូនមន្ត្រីរដ្ឋាភិបាលឲ្យទៅចូលរួមព្រឹត្តិការណ៍កីឡាដ៏ធំនេះទេ ដោយសំអាងលើហេតុផលព្រួយបារម្ភពីជំងឺកូវីដ១៩៕
