ការបញ្ចេញនូវពាក្យពេចន៍ក្នុងន័យទន់ភ្លន់ដាក់គ្នានេះ ហាក់បានបង្ហាញឲ្យឃើញពីសញ្ញាមួយដែលថា មេដឹកនាំទាំងពីរអាចនឹងជួបជជែកទល់មុខគ្នានៅពេលឆាប់ៗនេះ ខណៈដែលពួកគេ នឹងត្រូវចូលរួមក្នុងកិច្ចប្រជុំ G20 នៅខែក្រោយ។
ប្រធានាធិបតីចិន លោកស៊ី ជីនពីង បានថ្លែងនៅក្នុងសារមួយទៅកាន់គណៈកម្មាធិការជាតិស្តីពីទំនាក់ទំនងអាមេរិក-ចិនកាលពីថ្ងៃពុធទី ២៦តុលាថា៖ «ក្នុងនាមជាប្រទេសមហាអំណាចពិភពលោក ប្រទេសចិន និងសហរដ្ឋអាមេរិកគួរតែពង្រឹងទំនាក់ទំនង និងកិច្ចសហប្រតិបត្តិការ ដើម្បីជួយផ្តល់ស្ថិរភាពដល់ពិភពលោក»។
នៅថ្ងៃដដែលនោះដែរ ប្រធានាធិបតីអាមេរិក លោក ចូ បៃដិន ក្នុងជំនួបជាមួយទីប្រឹក្សាយោធាកំពូលៗរបស់ខ្លួនបាននិយាយថា៖ «សហរដ្ឋអាមេរិកមិនដែលមានបំណងស្វែងរកជម្លោះ ឬបញ្ហាជាមួយប្រទេសចិននោះទេ ហើយលោក ស៊ី ត្រូវតែយល់អំពីររឿងនេះ»។ លោកបានបន្ថែមថា សហរដ្ឋអាមេរិកនឹងនៅតែបន្តដោះស្រាយបញ្ហាចាក់ស្រេះមួយចំនួន រាប់ចាប់ពីការឈ្លានពានរបស់រុស្ស៊ីនៅអ៊ុយក្រែន រហូតដល់បញ្ហាការប្រែប្រួលអាកាសធាតុ និងបញ្ហាតំបន់ឥណ្ឌូប៉ាស៊ីហ្វិក។
អត្ថបទគួរអាន
ដោយឡែក យោងទៅតាមទូរទស្សន៍រដ្ឋចិន CCTV លោកស៊ី ជីនពីងបានគូសបញ្ជាក់ទៀតថា «ពិភពលោកសព្វថ្ងៃនេះនឹងមិនមានសន្តិភាព ឬភាពស្ងប់ស្ងាត់នោះទេ បើសិនជាចិន និងសហរដ្ឋអាមេរិកមិនជួយបង្កើនស្ថិរភាព និងលើកកម្ពស់សន្តិភាព និងការអភិវឌ្ឍន៍នោះ»។
មែនទែនទៅ ប្រទេសចិន និងសហរដ្ឋអាមេរិកបាននិងកំពុងធ្លាក់ផុងជ្រៅចូលទៅក្នុងភាពប្រេះឆាកាន់តែខ្លាំងឡើងលើបញ្ហាជាច្រើនចាប់ពីសេណារីយ៉ូនៃការឈ្លានពានរបស់ទីក្រុងប៉េកាំងទៅលើតៃវ៉ាន់ និងការបង្រ្កាបពីសំណាក់ប៉ូលិសលើក្រុមបាតុករនៅទីក្រុងហុងកុង ក៏ដូចជាការចោទប្រកាន់ថាមានការរំលោភសិទ្ធិនៅតំបន់ស៊ីនជាំងជាដើម។
បន្ថែមពីនេះ នៅខែតុលានេះ រដ្ឋបាលលោក បៃដិន បានចាត់ទុកប្រទេសចិន គឺជាដៃគូប្រកួតប្រជែងតែមួយគត់ជាមួយសហរដ្ឋអាមេរិក «ដោយមានទាំងចេតនាក្នុងការកែប្រែសណ្តាប់ធ្នាប់អន្តរជាតិ និងការរះត្រដែតកាន់តែខ្លាំងឡើងនៃអំណាចសេដ្ឋកិច្ច ការទូត យោធា និងបច្ចេកវិទ្យា ដើម្បីឆ្ពោះទៅគោលដៅនោះតែម្តង»។
ទោះបីជាយ៉ាងណាក៏ដោយ លោក Xi និងលោក Biden ត្រូវបានគេរំពឹងថា នឹងចូលរួមកិច្ចប្រជុំកំពូល G20 នៅកោះបាលី ប្រទេសឥណ្ឌូនេស៊ី ក្នុងខែវិច្ឆិកាខាងមុខនេះ ប៉ុន្តែមិនមានប្រភពច្បាស់ការណាមួយបញ្ជាក់ថា មេដឹកនាំប្រទេសទាំងពីរជួបប្រជុំទ្វេភាគីនោះទេ៕
