ការលើកឡើងពីជោគវាសនាតៃវ៉ាន់ នឹងកាន់តែត្រូវរងសម្ពាធធ្ងន់ពីសំណាក់ក្រុងប៉េកាំងនេះ ធ្វើឡើងនៅក្រោយពេលដែល លោកស៊ី ជីនពីងកំពុងក្ដាប់អំណាចក្នុងអាណត្តិទី៣យ៉ាងតឹងណែនពេញដី ហើយមន្ត្រីកំពូលៗនៅកោះតៃវ៉ាន់ក៏ធ្លាប់បានបារម្ភទុកមុនរួចស្រេចទៅហើយថា កាលណាលោកស៊ី ជីនពីងកាន់អំណាចបន្ដ នោះតៃវ៉ាន់ នឹងត្រូវប្រឈមសម្ពាធតានតឹងកាន់តែរឹងតែខ្លាំងដូចគ្នាដែរ ប៉ុន្ដែ កោះប្រជាធិបតេយ្យមួយនេះ នៅតែប្រកាសមិនចុះញ៉មបន្ដិចសោះឡើយ។
ថ្លែងនៅក្នុងបទសម្ភាសន៍មួយដែលរៀបចំឡើងដោយសារព័ត៌មាន Bloomberg លោក ប្លីនខេន បាននិយាយថា៖ «ជំហរខុសគ្នាដែលទីក្រុងវ៉ាស៊ីនតោន និងទីក្រុងប៉េកាំងព្រមព្រៀងគ្នារាប់ទសវត្សរ៍ក្នុងការដោះស្រាយជាមួយកោះតៃវ៉ាន់ដោយសន្តិវិធីនោះ ចិនបាននិងកំពុងផ្លាស់ប្តូរហើយ»។
រដ្ឋមន្ត្រីការបរទេសអាមេរិករូបនេះបានសង្កត់ធ្ងន់ថា «អ្វីដែលបានផ្លាស់ប្តូរនេះគឺថា ការសម្រេចចិត្តរបស់រដ្ឋាភិបាលនៅទីក្រុងប៉េកាំង គឺលែងទទួលស្គាល់ស្ថានការដើមនៃកោះមួយនេះតទៅទៀត ដោយត្រូវតែពន្លឿនការបង្រួបបង្រួមចិនតែមួយឡើងវិញឲ្យបានឆាប់»។
លោកបានបន្ថែមថា ប្រទេសចិនក៏បានធ្វើការដាក់សម្ពាធស្ទើគ្រប់បែបយ៉ាងលើទីក្រុងតៃប៉ិ ហើយក៏ត្រៀមប្រើសន្លឹកបៀរចុងក្រោយនោះដែរ គឺការប្រើកម្លាំងយោធា ប្រសិនបើការដាក់សម្ពាធមិនទទួលបានលទ្ធផលអ្វីនោះ។ លោក ប្ល៊ីងខេន ថា «នោះហើយជាអ្វីដែលចិនខ្លួនឯងបានផ្លាស់ប្តូរ»។
អត្ថបទគួរអាន
យ៉ាងណាមិញ រដ្ឋមន្ត្រីការបរទេសអាមេរិករូបនេះ បាននិយាយដោយឥតលាក់លៀមថា វ៉ាស៊ីនតោនមិនដែរប៉ងប្រាថ្នាចង់បាន «សង្រ្គាមត្រជាក់ជាថ្មីទេ» ហើយក៏មិនដែលព្យាយាមរាំងខ្ចប់ការរះឡើងរបស់ចិននោះដែរ តែប៉េកាំងត្រូវដឹងប្រាកដក្នុងចិត្តថា អាមេរិកនឹងធ្វើគ្រប់តម្លៃទាំងអស់ដើម្បីការពារផលប្រយោជន៍របស់ខ្លួន។
កាលពីសប្តាហ៍មុន មន្ត្រីការទូតកំពូលរបស់សហរដ្ឋអាមេរិកម្នាក់បាននិយាយថា ទីក្រុងប៉េកាំងបាននឹងកំពុងប្តេជ្ញាបន្តធ្វើការបង្រួបបង្រួមជាមួយតៃវ៉ាន់ «ក្នុងពេលវេលាមួយដ៏លឿន» ទោះបីជាមន្រ្តីរូបនោះមិនបានបញ្ជាក់ពេលវេលាជាក់លាក់ណាមួយក៏ដោយ។
កាលពីឆ្នាំមុន ឧត្តមសេនីយកំពូលរបស់សហរដ្ឋអាមេរិកម្នាក់ក៏បាននិយាយដែរថា ប្រទេសចិនទំនងជាមិនព្យាយាមដណ្តើមកាន់កាប់តៃវ៉ាន់ដោយប្រើកម្លាំងយោធាក្នុងរយៈពេលពីរបីឆ្នាំខាងមុខនេះនោះទេ ក៏ប៉ុន្តែមេបញ្ជាការនៃបញ្ជាការដ្ឋានតំបន់ឥណ្ឌូប៉ាស៊ីហ្វិករបស់សហរដ្ឋអាមេរិករូបនេះ បានប្រាប់សភាអាមេរិកថា ការគំរាមកំហែងខ្លាំងនឹងបង្ហាញខ្លួននៅប្រាំមួយឆ្នាំទៀត។
មែនទែនទៅ ការលើកឡើងរបស់មេទ័ព និងមន្ត្រីកំពូលៗរបស់សហរដ្ឋអាមេរិកមិនមែនធ្វើឡើងតាមតែការនឹកឃើញនោះទេ ក្រោមការដឹកនាំប្រកបដោយមហិច្ឆតារបស់បុរសខ្លាំងរដ្ឋចិន លោកស៊ី ជីនពីង មហាយក្សចិនបានរះឡើងលឿនស្លេវតាមពីក្រោយសហរដ្ឋអាមេរិកទាំងសេដ្ឋកិច្ច និងយោធា ជាពិសេសការពង្រីកឥទ្ធិពលកាន់តែខ្លាំងឡើងពីតំបន់អាស៊ីរហូតដល់ទ្វីបអាហ្រិក។
មិនតែប៉ុណ្ណោះ ក្រោយពីបានមើលឃើញការពីការក្តោបក្តាប់អំណាចកាន់តែណែនក្នុងដៃ បន្ទាប់ពីបានជាប់ជាអគ្គលេខាធិការបក្សកុម្មុយនិស្តចិនក្នុងអាណត្តិទី៣មិនធ្លាប់មានក្នុងសមាជបក្សលើកទី២០នាពេលថ្មីៗនេះ លោក ស៊ី ជីនពីង បានប្តេជ្ញាថា ចិនត្រូវតែបង្រួបបង្រួមគ្នាជាមួយតៃវ៉ាន់ឡើងវិញ ទោះក្នុងតម្លៃណាក៏ដោយ រួមទាំងសិទ្ធិប្រើប្រាស់កម្លាំងយោធាក្តី ព្រោះលោកចាត់ទុកថា វាគឺជា «ការរស់ឡើងវិញដ៏អស្ចារ្យនៃប្រជាជាតិចិនទាំងមូល»៕
