ការនាំចេញរបស់ចិនបានកើនឡើងក្នុងល្បឿនពីរខ្ទង់ក្នុងខែឧសភាកន្លងមកនេះ ដែលជាសញ្ញាវិជ្ជមានមួយ សម្រាប់ប្រទេសដែលមានសេដ្ឋកិច្ចធំបំផុតទីពីរក្នុងពិភពលោកមួយនេះក្រោយជួបព្យុះភ្លៀងកូវីដ១៩ខ្លាំងក្លានៅរយៈពេល២ ទៅ៣ខែចុងក្រោយនេះ។ រោងចក្រជាច្រើនបានចាប់ផ្ដើមដំណើរការឡើងវិញ ហើយការដឹកជញ្ជូនក៏បានធូរស្រាលផងដែរ បន្ទាប់ពីអាជ្ញាធរបានដកការបិទខ្ទប់ និងបន្ធូរបន្ថយវិធានការទប់ស្កាត់ជំងឺកូវីដ១៩មួយចំនួននៅទីក្រុងស៊ាងហៃ ដែលទីក្រុងដ៏សំខាន់មួយនេះ បានបិទខ្ទប់មកអស់រយៈពេលប្រហែល២ខែ ដោយសារកូវីដ១៩រាតត្បាតខ្លាំង។
ការនាំចេញរបស់ចិនក្នុងខែឧសភាបានកើនឡើងប្រមាណ១៧% បើធៀបនឹងរយៈពេលដូចគ្នាកាលពីឆ្នាំមុន ហើយវាជាកំណើនខ្ពស់បំផុត បើគិតចាប់តាំងពីខែមករាឆ្នាំនេះមក ពោលគឺវាបានកើនលើសទ្វេដងពីការរំពឹងទុករបស់ក្រុមអ្នកវិភាគដែលថា នឹងមានកំណើននាំចេញត្រឹមតែ៨%។
ទន្ទឹមនឹងនេះ ការនាំចូលរបស់ចិនក៏បានកើនឡើងជាង ៤% ដែរនៅក្នុងខែឧសភា បើធៀបនឹងរយៈពេលដូចគ្នាកាលពីឆ្នាំមុន ដែលជាការកើនឡើងលើកដំបូងក្នុងរយៈពេល ៣ ខែមកនេះ។
អត្ថបទគួរអាន
ការនាំចូលក៏បានកើនឡើងនេះ បានផ្តល់នូវការធូរស្បើយក្នុងចិត្តដល់ក្រុមអ្នកបង្កើតគោលនយោបាយរបស់ចិន ខណៈដែលពួកគេបានព្យាយាមបង្កើតនូវមាគ៌ាសេដ្ឋកិច្ច ដើម្បីចាកចេញពីផលប៉ះពាល់ខ្សែចង្វាក់ផ្គត់ផ្គង់ ដែលបានធ្វើឱ្យរង្គោះរង្គើដល់ទីផ្សារពាណិជ្ជកម្ម និងហិរញ្ញវត្ថុពិភពលោកក្នុងប៉ុន្មានខែកន្លងមកនេះ។
ទោះជាយ៉ាងណាក៏ដោយ ទស្សនវិស័យពាណិជ្ជកម្មរបស់ប្រទេសចិននៅតែជាកត្តាប្រឈម សម្រាប់ហានិភ័យសកលដដែល រួមទាំងហានិភ័យតម្លៃវត្ថុធាតុដើមឡើងថ្លៃខ្ពស់ ភាពមិនប្រាកដប្រជាពីសង្គ្រាមអ៊ុយក្រែន និងការធ្លាក់ចុះនៃតម្រូវការនៅក្រៅប្រទេសផងដែរ។
សូមបញ្ជាក់ថា ការព្យាករថ្មីចុងក្រោយរបស់ធនាគារពិភពលោកចំពោះកំណើនសេដ្ឋកិច្ចចិន នៅឆ្នាំ២០២២នេះ គឺបានបង្ហាញពីក្ដីរំពឹងកាន់តែទាបជាងការព្យាករកាលពីលើកមុនទៅទៀត។ ពោលគឺ ធនាគារពិភពលោកបានព្យាករថា សេដ្ឋកិច្ចចិននឹងអាចកើនឡើង៤,៣% ប៉ុណ្ណោះ ខណៈការព្យាករកាលពីមុនថានឹងមានកំណើន៥,១%៕
អត្ថបទ៖ សុខ ជា
None
