ការវិនិយោគរបស់ចិន នៅអាស៊ី កើនឡើង៣៧% ក្នុងឆ្នាំ២០២៣ ដោយឥណ្ឌូនេស៊ីឈានមុខគេ

របាយការណ៍ដែលធ្វើឡើងរួមគ្នាដោយសកលវិទ្យាល័យ ហ្គ្រីហ្វីហ្វ (Griffith) មានមូលដ្ឋាននៅទីក្រុងប៊្រីសបេន (Brisbane) ប្រទេសអូស្ត្រាលី និងសកលវិទ្យាល័យ ហ៊្វូតាន (Fudan) មានមូលដ្ឋាននៅក្រុងសៀងហៃ ប្រទេសចិនបានបង្ហាញថា ការវិនិយោគរបស់មហាយក្សចិន មានទំហំសរុបជិត២០ពាន់លានដុល្លារអាម៉េរិកនៅទូទាំងអាស៊ី-ប៉ាស៊ីហ្វិក កាលពីឆ្នាំមុន ដោយកើនឡើង៣៧%។

ទន្ទឹមនេះមហាយក្សចិន ក៏បានចុះកិច្ចសន្យាសាងសង់ក្នុងទំហំទឹកប្រាក់ប្រមាណ១៧ពាន់លានដុល្លារអាម៉េរិកផងដែរ ដោយកើនឡើងប្រមាណ១៤% បើធៀបនឹងឆ្នាំ២០២២។ កំណើនខ្ពស់នៃការវិនិយោគរបស់មហាយក្សចិនក្នុងតំបន់អាស៊ីនេះ វាហាក់ផ្ទុយគ្នាស្រឡះនឹងការវិនិយោគផ្ទាល់ពីបរទេស(FDI) សរុបចូលក្នុងបណ្ដាប្រទេសដែលមានសេដ្ឋកិច្ចកំពុងរីកចម្រើនឆាប់រហ័សក្នុងតំបន់អាស៊ីបានធ្លាក់ចុះ១២%កាលពីឆ្នាំមុន។

ការបញ្ចេញទិន្នន័យនេះ ធ្វើឡើងក្នុងសប្តាហ៍តែមួយ ដែលរដ្ឋាភិបាលចិន បានកំណត់គោលដៅកំណើនផលិតផលក្នុងស្រុកសរុប(GDP) ក្នុងរង្វង់ប្រមាណ៥% សម្រាប់ឆ្នាំ២០២៤ ដែលប្រហាក់ប្រហែលគ្នានឹងកំណើន GDP កាលពីឆ្នាំមុន ទោះបីជាក្រុមអ្នកវិភាគមើលឃើញសម្ពាធយ៉ាងខ្លាំងទៅលើសេដ្ឋកិច្ចរបស់មហាយក្សចិន រាប់ចាប់ពីការធ្លាក់ចុះនៃតម្រូវការសកល និងក្នុងស្រុក ការរាំងស្ទះផលិតកម្ម និងការដាំក្បាលចុះជាបន្តបន្ទាប់នៃវិស័យអចលនទ្រព្យយ៉ាងណាក្ដី។

យោងតាមទិន្នន័យផ្ដល់ដោយលោក គ្រីស្តូហ្វ នីដូភីល (Christoph Nedopil) នាយកវិទ្យាស្ថានអាស៊ី នៃសកលវិទ្យាល័យ ហ្គ្រីហ្វីហ្វ (Griffith Asia Institute) បង្ហាញថា សកម្មភាពវិនិយោគរបស់មហាយក្សចិន នៅក្រៅប្រទេសភាគច្រើន គឺផ្តោតលើបណ្ដាប្រទេស ដែលគាំទ្រគំនិតផ្តួចផ្តើមខ្សែក្រវាត់ និងផ្លូវ (BRI) របស់ក្រុងប៉េកាំង ដែលមានមហិច្ឆតាកសាងបណ្តាញហេដ្ឋារចនាសម្ព័ន្ធលាតសន្ធឹងពីអាស៊ីដល់អឺរ៉ុប និងលើសពីនេះ។ ទន្ទឹមនេះការវិនិយោគក្នុងបណ្តាប្រទេសដែលមិនគាំទ្រគំនិតផ្តួចផ្តើមខ្សែក្រវាត់ និងផ្លូវ (BRI) បានធ្លាក់ចុះដល់កម្រិតទាបបំផុតមិនធ្លាប់មានមកនៅត្រឹម១២០លានដុល្លារអាម៉េរិក ពោលគឺធ្លាក់ចុះរហូតដដល់ទៅ៩០% បើធៀបនឹងឆ្នាំ២០២២។

លោក គ្រីស្តូហ្វ នីដូភីល (Christoph Nedopil) បានប្រាប់សារព័ត៌មាន Nikkei Asia ថា និន្នាការគួរឱ្យចាប់អារម្មណ៍បំផុតរបស់មហាយក្សចិន ដែលគេមើលឃើញនៅក្នុងឆ្នាំ២០២៣ កន្លងទៅ គឺមហាយក្សចិនបានសម្រុកវិនិយោគលើថាមពល និងការវិនិយោគលើការជីកយករ៉ែ៕

ដោយ: តែម សុខុម