ក្រុមហ៊ុន Apple កំពុងពិភាក្សាជាមួយអ្នកផ្គត់ផ្គង់របស់ខ្លួនពីលទ្ធភាពបង្កើតរោងចក្រដំឡើងទូរសព្ទ iPhone ស៊េរីចុងក្រោយនៅប្រទេសឥណ្ឌូនេស៊ី ដែលជាបងធំនៅតំបន់អាស៊ាន ដែលការផ្លាស់ប្តូរមួយគួរឱ្យកត់សម្គាល់សម្រាប់ក្រុមហ៊ុននេះ។ ផែនការបង្កើតរោងចក្រផ្គុំ និងដំឡើងទូរសព្ទ iPhone ស៊េរីចុងក្រោយនៅឥណ្ឌូនេស៊ី ធ្វើឡើងក្រោយអាជ្ញាធររបស់ប្រទេសនេះហាមឃាត់មិនឱ្យលក់ទូរសព្ទ iPhone ស៊េរីចុងក្រោយនៅក្នុងទឹកដីខ្លួន។
ប្រសិនបើគម្រោងនេះក្លាយជាការណ៍ពិតមែននោះ វានឹងធ្វើឱ្យឥណ្ឌូនេស៊ីក្លាយជាប្រទេសដំបូងគេនៅតំបន់អាស៊ាន ដែលមានរោងចក្រផលិតទូរសព្ទ iPhone ហើយវាជាផ្នែកមួយនៃកិច្ចខិតខំរបស់ឥណ្ឌូនេស៊ី ក្នុងការបង្កើតការងារ និងលើកកម្ពស់ឧស្សាហកម្មបច្ចេកវិទ្យា ដោយហេតុថាខ្សែច្រវាក់ផ្គត់ផ្គង់ទូរសព្ទ iPhone ជាផ្នែកមួយដ៏ទំនើបបំផុតសម្រាប់គ្រឿងអេឡិចត្រូនិកសម្រាប់អ្នកប្រើប្រាស់។
ប្រភពមួយក្នុងចំណោមបួននាក់ ដែលបានដឹងពីបញ្ហានេះ បានអះអាងថា ក្រុមហ៊ុន Apple គ្រោងបង្កើតសាខារោងចក្រដំឡើងទូរសព្ទ iPhone នៅទីក្រុងមួយក្នុងប្រទេសឥណ្ឌូនេស៊ី ខណៈបច្ចុប្បន្នក្រុមហ៊ុននេះកំពុងជួលវិស្វករ។ តែយ៉ាងណា ការសម្រេចចិត្តចុងក្រោយពាក់ព័ន្ធនឹងការបង្កើតរោងចក្រដំឡើងទូរសព្ទ iPhone នេះកំពុងស្ថិតក្នុងដំណើរការចរចាគ្នារវាងក្រុមហ៊ុន Apple និងរដ្ឋាភិបាលរបស់ឥណ្ឌូនេស៊ីនៅឡើយទេ។ ប្រសិនបើភាគីទាំងមានការព្រមព្រៀងគ្នា នោះរោងចក្រនេះអាចនឹងលេចចេញជារូបរាងក្នុងរយៈពេល១ឆ្នាំខាងមុខនេះ។
ដំណឹងនៃការបង្កើតរោងចក្រដំឡើងទូរសព្ទ iPhone នៅឥណ្ឌូនេស៊ីនេះ កើតឡើងចំពេលក្រុមហ៊ុន Apple បានជាប់គាំងក្នុងការចរចាជាច្រើនខែជាមួយមន្ត្រីឥណ្ឌូនេស៊ី តាំងពីប្រទេសនេះបានហាមឃាត់ការលក់ទូរសព្ទ iPhone 16 នៅក្នុងប្រទេស ក្រោមហេតុផលក្រុមហ៊ុននេះមិនបានបំពេញតាមតម្រូវការមាតិកាក្នុងស្រុក៕
អត្ថបទ៖ សុខ មង្គល
