ប្រទេសចិននៅចុងសប្ដាហ៍មុនបានបំបែកកំណត់ត្រាអ្នកឆ្លងកូវីដ១៩ប្រចាំថ្ងៃរបស់ខ្លួន ដោយកាលពីថ្ងៃសៅរ៍បានរកឃើញករណីឆ្លងកូវីដ១៩ក្នុងសហគមជាង១ពាន់៨រយនាក់ និងនៅថ្ងៃអាទិត្យបានរកឃើញករណីឆ្លង១ពាន់៣រយនាក់។ មន្ត្រីសុខាភិបាលតំបន់របស់ចិនបានអះអាងថា រដ្ឋាភិបាលនៅក្នុងតំបន់មួយចំនួនមិនបានយកចិត្តទុកដាក់នៃការចាត់វិធានការទប់ស្កាត់ការឆ្លងរីករាលដាលនៃ មេរោគបំប្លែងថ្មី អូមីក្រុងគ្រប់គ្រាន់នៅឡើងនោះទេ ទើបបណ្ដាលឲ្យករណីឆ្លងកើនខ្ពស់ដល់ជាង១ពាន់នាក់ក្នុងមួយថ្ងៃបែបនេះ។
លោក Zhang Yan អនុប្រធានគណៈកម្មការសុខភាពក្នុងខេត្ត ជីលីន ប្រទេសចិន បាននិយាយថា តំបន់មួយចំនួនមានភាពទន់ខ្សោយផ្នែកសេវាសុខភាព និងមិនអាចបំពេញតម្រូវការឱ្យបានពេញលេញ ស្របតាមការកើនឡើងយ៉ាងឆាប់រហ័សនៃអ្នកជំងឺយ៉ាងនោះទេ។
ទោះបីជាយ៉ាងនេះក្តី វិធានការទប់ស្កាតកូវីដ១៩ ក៏បានដាក់ចេញនៅតាមទីក្រុង និងតំបន់ជាច្រើនផងដែរ ដូចជាមានការបិទសាលារៀន និងផ្អាកសកម្មភាពអាជីវកម្មមួយចំនួនជាដើម។
ដោយឡែក នៅទីក្រុងសៀងហៃភាគខាងកើតនៃប្រទេសចិន មនុស្សជាង ៣ ម៉ឺន នាក់ត្រូវបានគេរកឃើញថាមានជាប់ទាក់ទងផ្ទាល់ និង ប្រយោល ជាមួយអ្នកវិជ្ជមានមេរោគបំប្លែងថ្មី អូមីក្រុង។
លោក Wu Fan សមាជិកនៃក្រុមអ្នកជំនាញគ្រប់គ្រងជំងឺរបស់ក្រុងសៀងហៃ បានផ្តល់អនុសាសន៍ឱ្យប្រជាជនកាត់បន្ថយការជួបជុំ ធ្វើការពីផ្ទះ និងជៀសវាងការប្រើសេវាដឹកជញ្ជូនសាធារណៈក្នុងអំឡុងពេលនៃការរីករាលដាលដែលកំពុងមានការកើនឡើងខ្លាំងនេះ។
អត្ថបទគួរអាន
គួរកត់សម្គាល់ថា ការចាត់វិធានការ កូវី១៩ ដែលចិនទើបតែបានដាក់ចេញនេះ ក៏បានប៉ះពាល់ដល់ក្រុមហ៊ុនផ្គត់ផ្គង់ធំៗមួយចំនួនក្នុងប្រទេសចិនផងដែរ។ ក្នុងនោះ ក្រុមហ៊ុន Foxconn ដែលជាអ្នកផ្គត់ផ្គង់ផលិតផលឲ្យក្រុមហ៊ុន Apple របស់អាមេរិក ក៏ត្រូវបានបង្ខំឱ្យផ្អាកការផលិត បន្ទាប់ពីប្រទេសចិនបានបិទតំបន់មួយចំនួនក្នុងទីក្រុង សៀងហៃ និង Shenzhen ដើម្បីប្រយុទ្ធប្រឆាំងនឹងការកើនឡើងនៃករណីឆ្លងកូវីដ ១៩។
រដ្ឋាភិបាលក្រុង Shenzhen បាននិយាយថា ការដឹកជញ្ជូនសាធារណៈនៅក្នុងទីក្រុងនឹងត្រូវបញ្ឈប់ ហើយអាជីវកម្មមិនសំខាន់ទាំងអស់ត្រូវបានបញ្ជាឱ្យផ្អាកប្រតិបត្តិការចាប់ពីថ្ងៃទី១៤ ដល់ថ្ងៃទី ២០ ខែមីនា ខណៈ មានតែអាជីវកម្មដែលចាំបាច់ដូចជា ផ្សារ ឱសថស្ថាន និងស្ថាប័នវេជ្ជសាស្ត្រតែប៉ុណ្ណោះដែលត្រូវបានអនុញ្ញាតឱ្យបន្តដំណើរការដូចធម្មតា។
សូមបញ្ជាក់ថា ទីក្រុង Shenzhen គឺជាកន្លែងសម្រាប់ក្រុមហ៊ុនបច្ចេកវិទ្យាធំៗដូចជា Huawei, Oppo និង TCL ហើយក៏ជាមជ្ឈមណ្ឌលផលិតកម្មដ៏ធំបំផុតមួយសម្រាប់ក្រុមហ៊ុនតៃវ៉ាន់ Foxconnផងដែរ៕
អត្ថបទ វ៉ាន់ ស្រីរ័ត្ន
None
