លោកញឹម បូរាណ ម្ចាស់កសិដ្ឋានចិញ្ចឹមក្រពើនៅខេត្តសៀមរាប បានប្រាប់ឲ្យដឹងថា តម្លៃកូនក្រពើបានធ្លាក់ចុះច្រើនឆ្នាំមកហើយ ដែលធ្វើឲ្យម្ចាស់កសិដ្ឋានកំពុងប្រឈមមុខនឹងការលំបាកកាន់តែខ្លាំង រហូតបានធ្វើឲ្យអ្នកខ្លះលក់ក្រពើចោលអស់ ងាកទៅរកស៊ីរបរអ្វីផ្សេងទៀត។ លោក បូរាណ បានបញ្ជាក់ទៀតថា នៅឆ្នាំនេះ តម្លៃកូនក្រពើកាលពីដើមដៃ លក់បានតម្លៃប្រមាណ ១០ដុល្លារដែរ ក្នុងមួយក្បាល តែក្រោយមកបន្តចុះទាបទៅៗមកនៅត្រឹមតែតម្លៃទាបបំផុតប្រមាណ ២ដុល្លារ ទៅ២ដុល្លារកន្លះប៉ុណ្ណោះ ក្នុងមួយក្បាល។
ម្ចាស់កសិកដ្ឋានចិញ្ចឹមក្រពើរូបនេះ បានគូសបញ្ជាក់ទៀតថា ស្របពេលដែលក្រពើធ្លាក់ថ្លៃ ដោយសារតែទប់នឹងការចំណាយលើចំណីក្រពើមិនបានម្ចាស់កសិដ្ឋានខ្នាតតូច ដែលមិនមានដើមទុនបង្វិលគ្រប់គ្រាន់ ក៏បានសម្រេចលក់មេក្រពើរបស់ខ្លួនចេញ ហើយមានអ្នកខ្លះទៀតលក់ក្រពើចោលអស់ ទៅរកស៊ីរបរផ្សេងទៀតក៏មាន។
ត្រីចំណីក្រពើភាគច្រើនទិញមកពីប្រទេសថៃ ដែលមានតម្លៃប្រមាណ ជាង២លានរៀលក្នុងមួយតោន ខណៈដែលក្រពើមេមួយក្បាលត្រូវចំណាយលើចំណីប្រមាណ៥០ ដុល្លារសម្រាប់រយៈពេល១ឆ្នាំ។ នេះបើតាមការបញ្ជាក់របស់ម្ចាស់កសិដ្ឋានចិញ្ចឹមក្រពើខេត្តសៀមរាប។
អត្ថបទទាក់ទង!
ស្របពេលដែល ក្រពើធ្លាក់ថ្លៃ ម្ចាស់កសិដ្ឋានខ្នាតធំមានទុនច្រើន ក៏បានឆ្លៀតឱកាសទិញមេក្រពើពូជទុក ដោយរំពឹងថា ទីផ្សារកូនក្រពើនឹងងើបឡើងថ្លៃវិញ។
យ៉ាងណាមិញ លោក ញឹម បូរាណ បានលើកឡើងថា លោកក៏បានប្រមូលទិញក្រពើពីអ្នកចិញ្ចឹមខ្នាតតូច មកចិញ្ចឹមបន្តដែរ ដោយកាលពីប៉ុន្មានឆ្នាំមុន ក្រពើលោកមានតែជាង ១០០ ក្បាលទេ ប៉ុន្ដែឥឡូវកើនដល់ទៅ ជាង៣០០ ក្បាលហើយ។ យ៉ាងណាក៏ដោយ មកទល់នឹងឆ្នាំនេះ តម្លៃក្រពើនៅតែយ៉ាប់យឺនដដែល ដែលបានជំរុញឲ្យលោក ញឹម បូរាណកំពុងពិចារណាលក់មេក្រពើចេញវិញខ្លះដែរ ប៉ុន្ដែ ហាក់ដូចជាស្ងាត់អ្នកទិញទៅវិញ នៅមួយរយៈចុងក្រោយនេះ។
លោក វ៉ា សំណព្វ ម្ចាស់កសិដ្ឋានចិញ្ចឹមក្រពើវ៉ា សំណព្វនៅខេត្តសៀមរាប បានបញ្ជាក់ថា បញ្ហាទីផ្សារក្រពើធ្លាក់ថ្លៃនេះ គឺបានអូសបន្លាយមក៥ឆ្នាំមកហើយ។ លោកបន្ថែមថា ទីផ្សារនាំចេញក្រពើ ដ្បិតតែមានទីផ្សារសម្រាប់នាំចេញមែន តែការចិញ្ចឹមរបស់ម្ចាស់កសិដ្ឋានភាគច្រើននៅមានកម្រិតបច្ចេកទេសនៅឡើយ មិនទាន់អាចឆ្លើយតបតាមស្ដង់ដារនៅឡើយ។ លើសពីនេះ តម្លៃសម្រាប់ការចំណាយលើការរៀបចំនីតិវិធីនាំចេញក្រពើក៏មានខ្ពស់ដែរ ពោលគឺខ្ពស់ជាងប្រទេសជិតខាងទៅទៀត ដោយសារតែមានការចំណាយក្រៅផ្លូវការច្រើន ចំណាយក្រោមតុនានា។ ដូច្នេះ លោក ក៏ស្នើដល់រាជរដ្ឋាភិបាលជួយសម្រួលដល់នីតិវិធីនាំចេញក្រពើនេះ ឲ្យមានភាពងាយស្រួល និងតម្លៃទាបអាចប្រកួតប្រជែងបាន។
ជាមួយគ្នានេះដែរ លោក កាំង សារិនម្ចាស់កសិដ្ឋាន Cambo Crocodile Farm ដែលជាកសិដ្ឋានចិញ្ចឹមក្រពើដ៏ធំនិងមានអាយុកាលយូរជាងគេបង្អស់ នៅសង្កាត់ព្រែកកំពឹស ខណ្ឌដង្កោ រាជធានីភ្នំពេញ បានប្រាប់ឲ្យដឹងថា ស្របពេលដែលក្រពើកំពុងធ្លាក់ថ្លៃខ្លាំងយ៉ាងដូច្នេះ អ្នកដែលមិនមានមុខរបរផ្សេង ឬទុនបង្វិលមកទប់នឹងការចំណាយទេ នោះពិតជាប្រឈមនឹងការបិទកសិដ្ឋានមែន។
លោក កាំង សារិន បានបញ្ជាក់ថា បញ្ហាក្រពើធ្លាក់ថ្លៃនៅប៉ុន្មានឆ្នាំមកនេះ គឺដោយសារតែទីផ្សារកូនក្រពើរបស់កម្ពុជា ពឹងផ្អែកខ្លាំងតែលើទីផ្សារវៀតណាមតែមួយគត់ ខណៈដែលថៃធ្លាប់តែចូលមកទិញកូនក្រពើដែរនោះ លែងចូលមកទិញដូចមុន ព្រោះថៃក៏មានចិញ្ចឹមក្រពើច្រើនណាស់ដែរបច្ចុប្បន្ននេះ។ ដូច្នេះហើយ ធ្វើឲ្យឈ្មួញវៀតណាមបានឱកាសជិះសេះលែងដៃ ទាញទម្លាក់ថ្លៃទីផ្សារក្រពើកម្ពុជា។
លោកកាំង សារិន បានលើកឡើងទៀតថា អំឡុងពេលក្រពើធ្លាក់ថ្លៃនេះដែរ លោកក៏បានឆ្លៀតទិញមេក្រពើពូជទុកចិញ្ចឹម និងរំពឹងថា ទីផ្សារនឹងងើបឡើងថ្លៃវិញ នៅឆ្នាំក្រោយៗទៀត ដោយមួយរយៈចុងក្រោយនេះ លោកបានទិញក្រពើប្រមាណ៤០០ក្បាលបន្ថែម ធ្វើឲ្យកសិដ្ឋានរបស់លោក មានក្រពើកើនដល់ទៅប្រមាណ២ពាន់ក្បាលហើយ។
ម្ចាស់កសិដ្ឋានចិញ្ចឹមក្រពើសំណូមពរឲ្យរដ្ឋាភិបាលគិតគូជួយធ្វើយ៉ាងណាជួយឲ្យមានក្រពើអាចនាំចេញផ្ទាល់ទៅកាន់ប្រទេសចិនបន្ថែមទៀត ព្រោះបច្ចុប្បន្នចិនកំពុងមានតម្រូវការខ្ពស់ ហើយវៀតណាមទិញកម្ពុជាទៅ ក៏យកទៅចិញ្ចឹមដើម្បីផ្គត់ផ្គង់ទីផ្សារចិនដែរ។
ទាក់ទិននឹងបញ្ហាទីផ្សារក្រពើធ្លាក់ថ្លៃនេះដែរ មន្ត្រីនាយកដ្ឋានអភិរក្សជលផលនៃក្រសួងកសិកម្មរុក្ខាប្រមាញ់ និងនេសាទ បានបញ្ជាក់ដោយស្នើសុំមិនបញ្ចេញឈ្មោះថា វាជានិ្នការទីផ្សារពិភពលោក ដែលវាមានឡើងមានចុះជារឿងធម្មតា ហើយក៏មិនមែនមានតែទីផ្សារក្រពើទេ ដែលធ្លាក់ថ្លៃ ដំណាំកសិផលផ្សេងៗទៀតក៏ធ្លាក់ថ្លៃដូចគ្នាដែរ។ យ៉ាងណាក៏ដោយ រដ្ឋាភិបាលក៏បាននិងកំពុងយកចិត្តទុកដាក់លើបញ្ហានេះដែរ។
អត្ថបទគួរឲ្យចាប់អារម្មណ៍
ជុំវិញការលើកឡើងថា ក្រពើគ្មានទីផ្សារ មន្ត្រីនាយកដ្ឋានអភិរក្សជលផល បានអះអាងថា វាការលើកឡើងមិនពិតនោះទេ បច្ចុប្បន្ន កម្ពុជាមានទីផ្សារច្រើនដូចជាចិន ម៉ាឡេស៊ី និងថៃជាដើម ដើម្បីនាំចេញស្បែកក្រពើ ប៉ុន្ដែម្ចាស់កសិដ្ឋានភាគច្រើនគាត់ច្រើនតែចិញ្ចឹមលក់យកកូនដើម្បីបានចំណូលបានមកវិញបានលឿន។
យ៉ាងណាក៏ដោយចុះ ម្ចាស់កសិដ្ឋានចិញ្ចឹមក្រពើ បានបញ្ជាក់ដែរថា ការចិញ្ចឹមក្រពើយកស្បែកនេះវាជាការចំណាយពេលយូរ និងដើមទុនច្រើន ហើយវាក៏ទាមទារឲ្យមានបច្ចេកទេសចិញ្ចឹមតាមស្ដង់ដារកំណត់ផងដែរ ដែលវាពិតជារឿងលំបាកណាស់សម្រាប់កសិដ្ឋានធ្វើតាមការកំណត់នោះ៕
None
