តម្លៃប្រេងឆៅធ្លាក់ចុះមួយរំពេច ក្រោយរុស្ស៊ីឯកភាពតាមសំណើលោក ត្រាំ ផ្អាកបាញ់លើហេដ្ឋារចនាសម្ព័ន្ធថាមពលរបស់អ៊ុយក្រែនរយៈ

តម្លៃប្រេងឆៅនៅលើទីផ្សារអង់គ្លេសបានធ្លាក់ចុះ១២សេន ឬ០,២%មកនៅត្រឹមជាង៧០ដុល្លារក្នុង1ធុងបារ៉ែលនៅក្នុងការជួញដូរនៅថ្ងៃពុធ សប្តាហ៍នេះ ខណៈតម្លៃប្រេងឆៅលើទីផ្សារអាម៉េរិក West Texas Intermediate បានធ្លាក់ចុះ១៥សេនមកនៅត្រឹមជិត៦៧ដុល្លារក្នុងមួយធុងបារ៉ែល។

ការធ្លាក់ចុះតម្លៃប្រេងឆៅនេះបានកើតឡើងក្រោយប្រធានាធិបតីរុស្ស៊ីលោក វ្ល៉ាឌីមៀ ពូទីន បានជជែកគ្នាតាមទូរសព្ទជាមួយលោក ដូណាល់ ត្រាំ រយៈពេលជាង៩០នាទីកាលពីថ្ងៃអង្គារ សប្តាហ៍នេះ ដោយលោកបានយល់ព្រមឈប់វាយប្រហារលើរោងចក្រថាមពលអ៊ុយក្រែន ប៉ុន្តែលោកមិនបានយល់ព្រមចំពោះបទឈប់បាញ់ទាំងស្រុងរយៈពេល៣០ថ្ងៃតាមការចង់បានរបស់លោក ត្រាំ ឡើយ។

គួរបញ្ជាក់ថា រុស្ស៊ីប្រទេសផ្គត់ផ្គង់ប្រេងដ៏ធំមួយក្នុងចំនោមអ្នកផ្គត់ផ្គង់ប្រេងលំដាប់កំពូលៗនៅលើពិភពលោក ប៉ុន្តែការនាំចេញប្រេងឆៅរបស់ប្រទេសនេះមានការធ្លាក់ចុះយ៉ាងខ្លាំងក្រោយមានការដាក់ទណ្ឌកម្មពីសហរដ្ឋអាម៉េរិក និងសហភាពអឺរ៉ុប បន្ទាប់ពីមហាអំណាចយោធាមួយនេះបើកការវាយឈ្លានពានប្រទេសអ៊ុយក្រែន។

ក្រុមអ្នកវិភាគជឿជាក់ថា បទឈប់បាញ់នេះអាចនាំឱ្យមានការបន្ធូរបន្ថយទណ្ឌកម្ម ដែលអាចបង្កើនការផ្គត់ផ្គង់ប្រេង និងបន្ធូរបន្ថយតម្លៃប្រេងផងដែរ ខណៈការដាក់ពន្ធគយរបស់អាម៉េរិកលើប្រទេសកាណាដា ម៉ិកស៊ិក និងចិនបានបង្កើនការភ័យខ្លាចក្នុងការធ្វើឱ្យធ្លាក់ចុះសេដ្ឋកិច្ច ដែលនឹងដាក់សម្ពាធបន្ថែមទៀតលើតម្លៃប្រេង ព្រោះវាធ្វើឱ្យប៉ះពាល់ដល់តម្រូវការប្រេងឆៅ។

ទន្ទឹមនេះ ទិន្នន័យស្តុកប្រេងឆៅរបស់អាម៉េរិកបានបង្ហាញថា ស្តុកប្រេងឆៅបានកើនឡើង រីឯស្តុកប្រេងចម្រាញ់មានការធ្លាក់ចុះ ក្នុងនោះស្តុកប្រេងឆៅបានកើនឡើងជិត៥លានធុងបារ៉ែលក្នុងសប្តាហ៍ តែស្តុកប្រេងសាំងធ្លាក់ចុះជិត២លានធុងបារ៉ែល និងស្តុកប្រេងសម្រាប់ចម្រាញ់ធ្លាក់ចុះជាង២លានធុងបារ៉ែល៕

អត្ថបទ៖ សុខ មង្គល