តម្លៃប្រេងឆៅហក់ឡើងមួយរំពេចក្រោយ OPEC+ ប្រកាសពន្យារពេលបង្កើនទិន្នផលប្រេងរហូតដល់ចុងខែធ្នូ

សន្ទស្សន៍តម្លៃប្រេងឆៅនៅទីផ្សារអង់គ្លេសនៅថ្ងៃចន្ទ សប្តាហ៍នេះបានកើនឡើង១,៣៩ដុល្លារក្នុងមួយធុងបារ៉ែល ឬ១,៩% ដោយឡើងដល់៧៤,៤៩ដុល្លារក្នុងមួយបារ៉ែល ខណៈសន្ទស្សន៍តម្លៃប្រេងឆៅនៅទីផ្សារអាម៉េរិក West Texas Intermediate (WTI) បានកើនឡើង១,៤១ដុល្លារក្នុងមួយធុងបារ៉ែល ឬ២% ឡើងដល់៧០,៩០ដុល្លារក្នុង១បារ៉ែល។

ការហក់ឡើងតម្លៃប្រេងឆៅនេះ បានកើតឡើងមួយថ្ងៃបន្ទាប់ពីអង្គការផលិតប្រេង OPEC+ បានប្រកាសពីការពន្យារពេលកាត់បន្ថយទិន្នផលប្រេងចំនួន២,២លានបារ៉ែលក្នុងមួយថ្ងៃរហូតដល់ដាច់ឆ្នាំនេះ ក្រោយពីបានពន្យារពេលម្ដងរួចមកហើយកាលពីខែតុលា ដោយសារតម្លៃ និងតម្រូវការប្រេងធ្លាក់ចុះ។

ដំបូងឡើយ អង្គការផលិតប្រេងនេះគ្រោងនឹងបង្កើនទិន្នផលប្រេងឱ្យបាន១៨ម៉ឺនធុងបារ៉ែល ចាប់ពីខែធ្នូ ឆ្នាំនេះតទៅ ប៉ុន្តែពួកគេបានសម្រេចចិត្តពន្យារពេលរហូតដាច់ឆ្នាំនេះតែម្ដង។

ទន្ទឹមនឹងនេះ ទីផ្សារប្រេងកំពុងរង់ចាំមើលលទ្ធផលនៃការបោះឆ្នោតប្រធានាធិបតីអាម៉េរិក ដោយការស្ទង់មតិបង្ហាញថា អនុប្រធានាធិបតីលោកស្រី កាម៉ាឡា ហារីស និងអតីតប្រធានាធិបតីលោក ដូណាល់ ត្រាំ មានសំឡេងគាំទ្រប្រកៀកប្រកិតគ្នា ខណៈក្រុមសេដ្ឋវិទូរំពឹងថា ធនាគារកណ្ដាលអាម៉េរិកនឹងកាត់បន្ថយអត្រាការប្រាក់០,២៥% ថែមទៀតនៅថ្ងៃព្រហស្បតិ៍ សប្ដាហ៍នេះ។

ទន្ទឹមនឹងនេះ ទីផ្សារប្រេង ក៏កំពុងរង់ចាំមើលលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍នៃសភារបស់ប្រជាជនចិន នៅប្រទេសចិនចាប់ពីថ្ងៃចន្ទ ដល់ថ្ងៃសុក្រ សប្ដាហ៍នេះផងដែរ ដោយគេរំពឹងថា គណៈកម្មាធិការនេះនឹងអនុម័តការជំរុញថែមទៀត ដើម្បីជំរុញសេដ្ឋកិច្ចដែលកំពុងធ្លាក់ចុះ ទោះបីជាអ្នកវិភាគនិយាយថា ការជំរុញភាគច្រើនអាចជួយកាត់បន្ថយបំណុលរដ្ឋាភិបាលមូលដ្ឋានយ៉ាងណាក៏ដោយ៕

អត្ថបទ៖ សុខ មង្គល