មិនតែប៉ុណ្ណោះ សម្រាប់ការចុះបញ្ជីលក់ភាគហ៊ុន សម្រាប់វិស័យ SMEs នេះ គឺមានលក្ខខណ្ឌអនុគ្រោះជាងការចុះបញ្ជីរបស់ក្រុមហ៊ុនធំៗ ទាំងដើមទុន និងឯកសារតម្រូវផ្សេងៗ។ ថ្នាក់ដឹកនាំផ្សារមូលបត្រកម្ពុជា រំពឹងថា តាមរយៈការបន្ធូរបន្ថយលក្ខខណ្ឌនេះ នឹងទាក់ទាញសហគ្រាសធុនតូច និងមធ្យមឲ្យមកចុះបញ្ជីលក់ភាគហ៊ុនកាន់ច្រើននៅឆ្នាំនេះ។
វាជាការបោះជំហានទៅមុខមួយកម្រិតទៀតសម្រាប់ទីផ្សារមូលបត្រនៅកម្ពុជា បន្ទាប់ពីទីផ្សារកំណើនទើបទទួលបានក្រុមហ៊ុនថ្មីដំបូងគេចូលមកបោះផ្សាយលក់មូលបត្រកម្មសិទ្ធិរបស់ខ្លួននាពេលថ្មីៗនេះ ដែលវាកំពុងបង្ហាញច្រកទ្វារឲ្យសហគ្រាសខ្នាតតូច និងមធ្យមដទៃទៀត អាចសម្លឹងមើលឱកាសស្វែងរកប្រភពទុនពីផ្សារមូលបត្រកម្ពុជា។
ឯកឧត្តម ហុង សុហួរ អគ្គនាយកផ្សារមូលបត្រកម្ពុជាបានអះអាងប្រាប់ខេមបូណូមីសថា សហគ្រាសខ្នាតតូច និងមធ្យមក្នុងវិស័យ SMEs ដែលមានដើមទុនក្រោម៥០ម៉ឺនដុល្លារ ក៏អាចចុះបញ្ជីបោះផ្សាយលក់ភាគហ៊ុនរបស់ខ្លួនក្នុងទីផ្សារកំណើនបានដែរ។ ឯកឧត្តម បន្ថែមថា បច្ចុប្បន្ន ផ្សារមូលបត្រកម្ពុជា បាននិងកំពុងបន្ដលើកទឹកចិត្តឲ្យក្រុមហ៊ុន សហគ្រាសក្នុងវិស័យ SMEs ដែលមានសក្តានុពលឲ្យមកចុះបញ្ជីបោះផ្សាយលក់មូលបត្ររបស់ខ្លួន ដ្បិតថាផ្សារមូលបត្រកម្ពុជា គឺជាច្រកមួយដ៏សំខាន់ក្នុងការប្រមូលប្រភពទុន សម្រាប់ SME ក្នុងការពង្រីកអាជីវកម្ម និងបន្តប្រតិបត្តិការ។
អត្ថបទទាក់ទង
ពាក់ព័ន្ធលក្ខខណ្ឌចុះបញ្ជីលក់ភាគហ៊ុនសម្រាប់ក្រុមហ៊ុន សហគ្រាសខ្នាតតូច និងមធ្យមនេះត្រូវបានឯកឧត្តម ហុង សុហួរ អះអាងថា ការចុះបញ្ជីសម្រាប់ក្រុមហ៊ុន សហគ្រាសក្នុងវិស័យ SMEs គឺមានលក្ខខណ្ឌអនុគ្រោះជាងការចុះបញ្ជីរបស់ក្រុមហ៊ុនធំៗ។ ឯកឧត្តមបានគូសបញ្ជាក់ថា សម្រាប់សហគ្រាសធុនតូច និងមធ្យមការចុះបញ្ជីបោះផ្សាយលក់មូលបត្រមិនកំណត់ដើមទុននោះទេ ពោលគឺមានដើមទុនត្រឹម២០ម៉ឺនដុល្លារ ឬក្រោមនេះក៏អាចចុះបញ្ជីបានដែរ ប៉ុន្ដែទាមទារក្រោយបោះផ្សាយ IPO រួចធ្វើយ៉ាងណាឲ្យដើមទុន៥០ម៉ឺនដុល្លារ។ ចំណែកពាក់ព័ន្ធប្រាក់ចំណូល គឺមិនកំណត់នោះទេ ហើយឯកសារហិរញ្ញវត្ថុ គឺទាមទារតែរយៈពេលមួយឆ្នាំប៉ុណ្ណោះ។
អគ្គនាយកក្រុមហ៊ុនផ្សារមូលបត្រកម្ពុជា រំពឹងថានៅឆ្នាំនេះ ផ្សារមូលបត្រកម្ពុជានឹងក្រុមហ៊ុនចំនួន៣ចុះបញ្ជីលក់ភាគហ៊ុន និងពីរទៀតចុះបញ្ជីសញ្ញាបណ្ណ។ ជាក់ស្ដែងនៅដើមសប្ដាហ៍នេះ មានក្រុមហ៊ុនថ្មីមួយបាន គឺ ឌី ប៊ី ឌី អ៊ិនជីនារីង. ដែលជាក្រុមហ៊ុនពហុមុខងារផ្នែកវិស្វកម្ម និងសំណង់ បានចុះបញ្ជីលក់មូលបត្រកម្មសិទ្ធិលើកដំបូងរបស់ខ្លួនជាសាធារណៈ នៅក្នុងទីផ្សារកំណើនរបស់ផ្សារមូលបត្រកម្ពុជា។ ដោយឡែ នៅថ្ងៃទី ៩ខែ កញ្ញានេះ ក្រុមហ៊ុនថ្មីមួយបន្ថែមទៀត គឺក្រុមហ៊ុន តែលកូថេក ដែលគេស្គាល់ថា ជាក្រុមហ៊ុនរបស់អ្នកឧកញ៉ា គិត ម៉េង ក៏បោះផ្សាយលក់មូលបត្របំណុលរបស់ខ្លួនជាផ្លូវការផងដែរ៕
None
