ស្រីលង្កា ជាប្រទេសមួយស្ថិតនៅតំបន់អាស៊ីខាងត្បូង ដែលមានប្រជាជនចំនួន ២២ លាននាក់ កំពុងស្ថិតក្នុងវិបត្តិសេដ្ឋកិច្ចដ៏អាក្រក់បំផុតមិនធ្លាប់មានចាប់តាំងពីទទួលបានឯករាជ្យនៅឆ្នាំ១៩៤៨មក ដោយសារតែខ្វះខាតរូបិយបណ្ណបរទេសយ៉ាងច្រើនដើម្បីទូទាត់សម្រាប់ការនាំចូលទំនិញពីក្រៅប្រទេស។
ក្រុមហ៊ុនអគ្គិសនីផ្តាច់មុខរបស់រដ្ឋបាននិយាយថា ខ្លួនបានបង្កើនចំនួនម៉ោងនៃការផ្ដាច់ចរន្តអគ្គិសនីពីរយៈពេល ៧ ម៉ោងឡើងទៅដល់ ១០ ម៉ោងជារៀងរាល់ថ្ងៃ ចាប់តាំងពីដើមខែមីនានេះមក ដោយសារមិនមានប្រេងគ្រប់គ្រាន់សម្រាប់ផ្គត់ផ្គង់ម៉ាស៊ីនភ្លើង។
ក្រុមមន្ត្រីស្រីលង្កាបាននិយាយថា ការផ្គត់ផ្គង់អគ្គិសនីជាង ៤០ ភាគរយនៅប្រទេសស្រីលង្កា គឺពឹងផ្អែកទៅលើថាមពលវារីអគ្គីសនី ប៉ុន្តែទឹកនៅក្នុងអាងស្តុកទឹកសម្រាប់ផលិតថាមពលវារីអគ្គិសនីមានកម្រិតទាបពេក មិនអាចផលិតអគ្គិសនីបានទេ ដោយសារគ្មានភ្លៀងធ្លាក់ជាយូរខែមកហើយបង្កជាគ្រោះរាំងស្ងួតយ៉ាងខ្លាំង។
ការផលិតថាមពលអគ្គិសនីភាគច្រើន គឺពឹងលើការដុតធ្យូងថ្ម និងប្រេងឥន្ធនៈដែលជាកត្តាសំខាន់បំផុតប៉ុន្តែពេលនេះវាកំពុងខ្វះខាតការផ្គត់ផ្គង់យ៉ាងខ្លាំងដោយសារប្រទេសនេះមិនមានប្រាក់គ្រប់គ្រាន់ដើម្បីទូទាត់សម្រាប់ការនាំចូល ឬការផ្គត់ផ្គង់ថាមពលទាំង២នេះ។
ទន្ទឹមនឹងនេះដែរ ក្រុមហ៊ុនសារជីវកម្មលក់ប្រេងឥន្ធៈដ៏សំខាន់គឺក្រុមហ៊ុន Ceylon Petroleum Corporation (CPC) ដែលគ្រប់គ្រងដោយរដ្ឋបានប្រកាសថា ក្រុមហ៊ុននេះនឹងដាច់ស្តុកប្រេងម៉ាស៊ូតនៅក្នុងប្រទេសនេះ សម្រាប់រយៈពេលយ៉ាងហោចណាស់២ថ្ងៃ ហើយក្រុមហ៊ុននេះបានប្រាប់ម្ចាស់យានយន្តដែលកំពុងរង់ចាំទិញប្រេងនៅស្ថានីយរបស់ខ្លួនឱ្យបំបែកជួរគ្នាត្រឡប់ទៅផ្ទះវិញផងដែរ។
អត្ថបទគួរអាន
តម្លៃប្រេងឥន្ធនៈបានឡើងថ្លៃជាបន្តបន្ទាប់ដោយតម្លៃប្រេងសាំងកើនឡើង ៩២ % និងប្រេងម៉ាស៊ូតកើនឡើង ៧៦ % ចាប់តាំងពីដើមឆ្នាំមកទល់ពេលនេះ។ ក្រុមមន្ត្រីស្រីលង្ការ បាននិយាយថា រដ្ឋាភិបាលបានចំណាយពេល ១២ ថ្ងៃ ដើម្បីស្វែងរកប្រាក់ចំនួន ៤៤ លានដុល្លារអាមេរិក សម្រាប់ចំណាយលើការដឹកជញ្ជូនចុងក្រោយបង្អស់នូវឧស្ម័ន LP និងប្រេងកាត។
រដ្ឋាភិបាលទីក្រុងកូឡុំបូបានដាក់បម្រាមនាំចូលយ៉ាងច្រើនកាលពីខែមីនា ឆ្នាំ២០២០ដើម្បីសន្សំរូបិយបណ្ណបរទេស ដែលកំពុងតែត្រូវការចាំបាច់សម្រាប់ទូទាត់បំណុលបរទេសចំនួន ៥១ ពាន់លានដុល្លាររបស់ខ្លួន។ ប៉ុន្តែទង្វើនេះបានបង្កឱ្យមានកង្វះខាតយ៉ាងខ្លាំងនូវទំនិញប្រើប្រាស់សំខាន់ៗជាហេតុធ្វើឱ្យតម្លៃទំនិញកើនឡើងយ៉ាងខ្លាំងរហូតមកដល់ពេលនេះ។
ការកាត់ផ្ដាច់ការផ្គត់ផ្គង់អគ្គិសនីរយៈពេលច្រើនម៉ោងនេះ បានបង្ខំឱ្យមន្ទីរពេទ្យជាច្រើនសម្រេចចិត្តបញ្ឈប់ការវះកាត់តាមទម្លាប់របស់ខ្លួន ហើយផ្សារទំនើបជាច្រើនទៀតក៏ត្រូវបានបង្ខំឲ្យមានការកម្រិតលើការលក់ចំណីអាហារទៅតាមចំនួនសមរម្យផងដែរ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
