រដ្ឋមន្ត្រីការបរទេសសិង្ហបុរីលោក វីវៀន បាឡាគ្រីសនែន (Vivian Balakrishnan) បានលើកឡើងថា តំបន់អាស៊ានកំពុងស្ថិតក្នុងដំណាក់កាល ដែលមានទាំងឱកាសធំ និងហានិភ័យធំក្នុងពេលដំណាលគ្នា។ រដ្ឋមន្ត្រីការបរទេសរូបនេះបានលើកឡើងថា បច្ចេកវិទ្យា AI បន្ទះឈីប និងបច្ចេកវិទ្យាផ្សេងៗទៀតកំពុងជួយសេដ្ឋកិច្ចក្នុងតំបន់ឱ្យរីកចម្រើន ទោះបីពិភពលោកកំពុងប្រឈមភាពចលាចលក៏ដោយ។
ទិន្នន័យបង្ហាញថា នៅឆមាសទី១ឆ្នាំ២០២៦ សិង្ហបុរីសម្រេបានកំណើនសេដ្ឋកិច្ច៦,១% ខណៈ
វៀតណាមសម្រេចបានកំណើនជាង៨% ហើយម៉ាឡេស៊ី និងឥណ្ឌូនេស៊ីសម្រេចបានកំណើនជាង៥%។ ការនាំចេញគ្រឿងអេឡិចត្រូនិករបស់សិង្ហបុរី ក៏បានកើនឡើង១៣២% កាលពីអំឡុងខែសីហា បើធៀបនឹងឆ្នាំមុន។
កំណើននេះត្រូវបានជំរុញមួយផ្នែកដោយកំណើនតម្រូវការ AI និងបន្ទះឈីប ខណៈប្រទេសនានាក្នុងតំបន់កាន់តែចូលរួមក្នុងខ្សែច្រវាក់ផ្គត់ផ្គង់បច្ចេកវិទ្យាពិភពលោក។ ប៉ុន្តែការពឹងផ្អែកខ្លាំងពេកលើ AI ក៏មានហានិភ័យផងដែរ ប្រសិនបើការវិនិយោគលើវិស័យនេះថយចុះ។ ទន្ទឹមនឹងនេះ រដ្ឋមន្ត្រីការបរទេសសិង្ហបុរីជំរុញឱ្យអាស៊ានប្រើប្រាស់សម្ទុះនេះ ដើម្បីពង្រឹងសមាហរណកម្មសេដ្ឋកិច្ចក្នុងតំបន់ ខណៈសិង្ហបុរីត្រៀមធ្វើជាប្រធានអាស៊ាននៅឆ្នាំ២០២៧៕
ដោយ: តែម សុខុម
