«មរកត» ជាក្រុមហ៊ុនថ្មីថ្មោងមួយក្នុងចំណោក្រុមហ៊ុន៣ ដែលទទួលទុនវិនិយោគមួយចំនួន ពីមូលនិធិសម្រាប់អាជីវកម្មបែបឌីជីថល ផ្តួចផ្តើមឡើងដោយក្រុមហ៊ុនទូរស័ព្ទ ស្មាត ដែលមានមូលនិធិសរុប ៥លានដុល្លារសហរដ្ឋអាមេរិក សម្រាប់ចាំជួយសហគ្រិនវ័យក្មេង ដែលមានឆន្ទៈនិងចង់ពង្រីកខ្លួនទៅកាន់ទីផ្សារតំបន់និងពិភពលោក។
លោក ឃួន សុភ័ទ្ទ ដែលមានវ័យ៣៧ឆ្នាំ បានផ្តល់បទសម្ភាសជូនសារព័ត៌មាន ខេមបូណូមីស ថា ក្រុមហ៊ុននេះបង្កើតឡើងដំបូងក្នុងឆ្នាំ២០១៥ ដោយមានស្ថាបនិកជនជាតិខ្មែរ៣នាក់ ដើម្បីរៀបចំ Software System សម្រាប់ដោះស្រាយលើវិស័យហិរញ្ញវត្ថុ។
លោករំឭកថា៖ «កាលមុន ខ្ញុំធ្វើការនៅមីក្រូហិរញ្ញវត្ថុ Vision Fund រយៈពេល១០ឆ្នាំ ផ្នែក IT និង Business Development។ ខ្ញុំជាអ្នកប្រឡូកក្នុងវិស័យ Software System ហើយយើងត្រូវទិញ System ពីប្រទេសស្វ៊ីស វាថ្លៃណាស់ ហើយត្រូវជួលអ្នកបច្ចេកទេសគេទៀត។ យើងឃើញលុយហូរចេញពីស្រុកខ្មែរស្រស់ៗពេក។ ហើយក៏គិតថា មីក្រូហិរញ្ញវត្ថុនៅស្រុកខ្មែរមានច្រើន ប៉ុន្តែ អ្នកទាំងអស់ហ្នឹង មិនដល់ ៥ភាគរយផង ដែលមានលទ្ធភាពទិញ Software ពីក្រៅប្រទេស ព្រោះវាថ្លៃពេក តិចបំផុតក៏ ៥០ម៉ឺនដុល្លារ។ ដូច្នេះ គាត់បង្ខំចិត្តប្រើ Excel និង System ហួសសម័យចាស់ៗ តែវាអត់ស្តង់ដារ និងអត់ល្អទេ»។
ក្រុមហ៊ុន Morakot Technology ជាក្រុមហ៊ុនមួយទើបតែទទួលបានទុនវិនិយោគពី មូលនិធិសម្រាប់អាជីវកម្មឌីជីថល របស់ក្រុមហ៊ុន ស្មាត។
តើអ្នកបានអានអត្ថបទនេះឬនៅ?
លោកបន្តថា៖ «ដូច្នេះ ពួកខ្ញុំឃើញវាមានឱកាស វាមានទីផ្សារមួយដែលនៅខ្វះចន្លោះ ជាពិសេស អ្នកតូចៗអត់លទ្ធភាព ហើយឥឡូវធនាគារជាតិ តម្រូវឲ្យមានស្តង់ដារ និងកត់ត្រាបញ្ជីស្នាមត្រឹមត្រូវ ដែលធ្វើឲ្យ ពួកគាត់លំបាកណាស់ ព្រោះត្រូវការមនុស្សច្រើន។ ហេតុនេះ ក៏ពិភាក្សាជាមួយស្ថាបនិកពីរនាក់ទៀត។ ខ្ញុំក៏លាឈប់ពីការងារ មកចាប់ដៃគ្នាធ្វើការងារនេះ»។
បើតាម លោក ឃួន សុភ័ទ្ទ ការប្រើ Excel និងកត់ត្រាដោយដៃ គឺមិនងាយស្រួលឡើយ ដ្បិតនៅពេលមានអតិថិជនកើនឡើង ទាល់តែបន្ថែមបុគ្គលិកកាន់តែច្រើន និងបង្កការស្មុគស្មាញច្រើន។ ដូច្នេះ ការកសាង Software វាជួយទាំងអស់ ដូចជា កម្ចីចេញ តើគេបង់ឲ្យគ្រប់នៅ? ខ្វះប៉ុន្មាន? ខាតប៉ុន្មាន? ហើយថ្ងៃហ្នឹងខាត ឬចំណេញប៉ុន្មាន?... គឺម៉ាស៊ីនចេញឲ្យដឹងទាំងអស់។
លោកបន្តថា សម្រាប់មីក្រូហិរញ្ញវត្ថុកណ្តាល និងតូច ដោយមិនកែកុនកម្មវិធីច្រើន ក្រុមហ៊ុនរបស់លោកយកតម្លៃ៤ម៉ឺន៥ពាន់ដុល្លារ ទៅ ៧ម៉ឺនដុល្លារក្នុងមួយកញ្ចប់។ ប៉ុន្តែ បើក្រុមហ៊ុនធំៗ មានតម្លៃ តាមទំហំ ការងារច្រើនឬតិច។ លោកលម្អិតថា សម្រាប់ប្រតិបត្តិករឥណទាន ដែលតូចៗអត់លទ្ធភាពទិញកញ្ចប់ Software ទាំងមូល ក្រុមហ៊ុន «មរកត» ផ្តល់លទ្ធភាពឲ្យពួកគេបង់ប្រចាំខែ។
លោកពន្យល់យ៉ាងដូច្នេះថា៖ «សម្រាប់អ្នកគ្មានលទ្ធភាព គឺយើងឲ្យគាត់បង់ប្រចាំខែ។ ឧទាហរណ៍ អតិថិជនរបស់គាត់ម្នាក់ តម្រូវចូលខាងខ្ញុំ ០.៣ដុល្លារ អ៊ីចឹងបើអតិថិជនកើនគឺពួកខ្ញុំបានច្រើនតាមហ្នឹង តែបើច្រើន គឺយើងបញ្ចុះតម្លៃឲ្យទាបជាងនេះ។ នេះជាយុទ្ធសាស្រ្តឈ្នះទាំងអស់គ្នា គាត់ក៏អាចទិញ System ដែលមានស្តង់ដារ បើទោះបីមិនមានប្រាក់គ្រប់គ្រាន់ក៏ដោយ»។
តើអ្នកបានអានអត្ថបទនេះឬនៅ?
បច្ចុប្បន្ន ក្រុមហ៊ុនដែលបង្កើតឡើងដោយអ្នកខេត្តបន្ទាយមានជ័យរូបនេះ កំពុងមានអតិថិជនមកទាក់ទងពីប្រទេសមីយ៉ាន់ម៉ា ៣ក្រុមហ៊ុនទៀត និងបង្ហាញមហិច្ឆតាយ៉ាងមានក្តីសង្ឃឹមខ្ពស់ ក្នុងការបោះជំហានទៅប្រទេសហ្វីលីពីន និងក្នុងទីផ្សារពិភពលោកនៅថ្ងៃអនាគត។
លោក ឃួន សុភ័ទ្ទ ចាត់ទុក លោក Steve Jobs និង Elon Musk ជា Idols
បុរសមាឌកណ្តាញ់ និងមានសម្បុរសណ្តែកបាយរូបនេះ បានអត្ថាធិប្បាយថា ការបោះជំហានរបស់ខ្លួនចូលក្នុងមុខជំនួញឌីជីថល គឺចង់បង្កើតស្នាដៃមួយសម្រាប់ដោះស្រាយបញ្ហារបស់មនុស្ស។
«ខ្ញុំមិនប្រកួតប្រជែងក្រុមហ៊ុនក្នុងស្រុកនោះទេ តែខ្ញុំចង់មានក្រុមហ៊ុន Software របស់ខ្មែរ ទៅប្រកួតប្រជែងក្នុងទីផ្សារពិភពលោក។ នៅពេលយើងបង្កើតអ្វីមួយ ដែលជួយដោះស្រាយបញ្ហារបស់មនុស្សបាន នោះយើងនឹងមានតម្លៃ ហើយលុយនឹងហូរចូលតាមក្រោយទេ»។ នេះជាក្តីស្រមៃរបស់លោក ឃួន សុភ័ទ្ទ ដោយបន្តថា អ្នកដែលលោកយកគំរូតាម គឺលោក Steve Jobs ស្ថាបនិកក្រុមហ៊ុន Apple Inc. និង លោក Elon Musk អគ្គនាយកក្រុមហ៊ុន Tesla Inc. ដែលផលិតរថយន្តដោយប្រើថាមពលអគ្គិសនី។
លោកបន្តថា ដ្បិតក្រុមហ៊ុន Tesla Inc. មិនទាន់ចំណេញ តែគាត់ប្រឹងប្រែងដោះស្រាយបញ្ហារបស់មនុស្ស និងបរិស្ថាន។ លោកថា គ្មាននរណាគេជឿថា គាត់អាចផលិតរថយន្តស្ព័រ ប្រើអគ្គិសនីបានដោយគ្រាន់តែសាកថ្មត្រឹម ៣០នាទីទៅ ១ម៉ោងពេញ ហើយជិះបានរាប់រយគីឡូម៉ែត្រ ដោយមិនចាំបាច់ចាក់សាំង តែគាត់ធ្វើបាន ដែលនេះហើយជាតម្លៃរបស់គាត់សម្រាប់មនុស្សជាតិទាំងមូល៕
None
