អឺរ៉ុបដំឡើងពន្ធ៣៨% លើរថយន្តអគ្គិសនីចិន ដោយធ្វើឱ្យក្រុងប៉េកាំង ខឹងសម្បារយ៉ាងខ្លាំង និងជំរុញឱ្យពិចារណាឡើងវិញ

ដើម្បីជួយគាំទ្រ និងការពារបណ្ដាក្រុមហ៊ុនផលិតរថយន្តអគ្គីសនីក្នុងស្រុកពីការលក់បង្ខូចតម្លៃនៅលើទីផ្សារ គណៈកម្មការអឺរ៉ុប កាលពីថ្ងៃទី១២ ខែមិថុនា បានប្រកាសដំឡើងពន្ធនាំចូលរហូតដល់ទៅ៣៨%លើរថយន្តអគ្គិសនីចិន។ ទោះជាយ៉ាងណា វិធានការនេះមិនសុទ្ធតែទទួលបានការគាំទ្រ និងការសាទរពីគ្រប់ប្រទេសជាសមាជិករបស់សហភាពអឺរ៉ុបនោះទេ។ តួយ៉ាង ប្រទេសហុងគ្រី ដែលជាសមាជិកមួយរបស់សហភាពអឺរ៉ុប បានចេញសេចក្ដីថ្លែងការណ៍ភ្លាមៗថា ខ្លួនមិនយល់ស្របនឹងការដំឡើងពន្ធលើរថយន្តអគ្គិសនីចិន បែបនេះនោះទេ ព្រោះគោលនយោបាយគាំពារនិយមបែបនេះមិនមែនជាដំណោះស្រាយឡើយ ហើយវាបង្ហាញពីការរើសអើងយ៉ាងខ្លាំង។

នៅខែកក្កដា ខាងមុខនេះ ប្រទេសហុងគ្រី នឹងត្រូវទទួលតំណែងជាប្រធានក្រុមប្រឹក្សាអឺរ៉ុប ពីប្រទេសបែលហ្ស៊ិក សម្រាប់រយៈពេល៦ខែ។ គេដឹងថា នាយករដ្ឋមន្ត្រីហុងគ្រី លោក វីកទ័រ អូបាន (Viktor Orban) មានទំនាក់ទំនងយ៉ាងជិតស្និទ្ធជាយូរមកហើយជាមួយបណ្ដាក្រុមហ៊ុនផលិតរថយន្តអគ្គិសនីរបស់ប្រទេសចិន ដោយលោកមានគោលបំណងប្រែក្លាយប្រទេសហុងគ្រី ទៅជាមជ្ឈមណ្ឌលផលិតកម្មរថយន្តអគ្គិសនីថ្នាក់តំបន់។

ទាក់ទិននឹងការប្រកាសដំឡើងពន្ធនាំចួលរបស់សហភាពអឺរ៉ុបលើរថយន្តអគ្គិសនីចិននេះ ក្រសួងពាណិជ្ជកម្មចិន បានឆ្លើយតបភ្លាមៗក្នុងថ្ងៃដដែលថា ពន្ធគយរបស់សហភាពអឺរ៉ុប គឺខ្ពស់ហួសហេតុ និងខ្វះមូលដ្ឋានផ្លូវច្បាប់ និងភាពជាក់ស្ដែង។ អ្នកនាំពាក្យក្រសួងពាណិជ្ជកម្មចិន បានអះអាងថា កាស៊ើបអង្កេត និងការសន្និដ្ឋានរបស់សហភាពអឺរ៉ុប ជាទង្វើគាំពារនិយមយ៉ាងច្បាស់ក្រឡែត ហើយវានឹងបង្កើនភាពតានតឹងផ្នែកពាណិជ្ជកម្មកាន់តែខ្លាំង ហើយថា ប្រទេសចិន នឹងចាត់រាល់វិធានការចាំបាច់ ដើម្បីការពារសិទ្ធិ និងផលប្រយោជន៍ស្របច្បាប់របស់បណ្ដាសហគ្រាសចិន៕

ដោយ: តែម សុខុម