រដ្ឋមន្ត្រីក្រសួងការងារថា កម្មករនិយោជិតក្នុងប្រព័ន្ធ ១,៥លាននាក់ ទទួលបានប្រាក់ឈ្នួលជាង ៤,៥ពាន់លានដុល្លារក្នុងមួយឆ្នាំៗ

ថ្លែងនៅក្នុងពិធីសំណេះសំណាលជាមួយប្រធានរដ្ឋបាល ប្រធានផ្នែកនៅតាមរោងចក្រ សហគ្រាស ក្រោមអធិបតីភាពឯកឧត្តមបណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់សមេ្ដចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា នាថ្ងៃទី១៤ ខែឧសភា ឆ្នាំ២០២៣ ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានលើកឡើងថា បច្ចុប្បន្ន មានសហគ្រាស គ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារជាង ១ម៉ឺន ៧ពាន់សហគ្រាស ដែលមានកម្មករនយោជិត១លាន៥សែននាក់ ទទួលបានប្រាក់ឈ្នួលជាមធ្យមជាង ៤ពាន់៥រយលានដុល្លារក្នុងមួយឆ្នាំៗ ដើម្បីផ្គត់ផ្គង់ជីវភាពក្រុមគ្រួសារ។ ឯកឧត្តម រដ្ឋមន្ត្រីបន្ថែមថា សម្រាប់វិស័យវាយនភណ្ឌ កាត់ដេរ ស្បែកជើង និងផលិតផលធ្វើដំណើរ និងកាបូបវិញ មានរោងចក្រចំនួនជាង១ពាន់៣រយរោងចក្រ ដែលបាននាំចេញទំនិញក្នុងតម្លៃសរុបជិត១៣ពាន់លានដុល្លារកាលពីឆ្នាំ២០២២ ដោយក្នុងនោះ មានកម្មករសរុបប្រមាណជាង៨៥ម៉ឺននាក់ ហើយកម្ពុជាបានក្លាយជាប្រទេសនាំមុខមួយក្នុងការនាំចេញផលិតផលកាត់ដេរនៅលើទីផ្សារអន្តរជាតិ។

ក្រៅតែពីកម្មករនិយោជិតក្នុងស្រុកដែលបានទទួលបានប្រាក់ឈ្នួលកាន់តែប្រសើរឡើងនោះ កម្ពុជាក៏មានពលករដែលកំពុងបម្រើការងារនៅក្រៅប្រទេសប្រមាណ ១លាន៣សែននាក់ផងដែរ ដោយពួកគេបានផ្ញើប្រាក់មកស្រុកកំណើតសម្រាប់ចិញ្ចឹមក្រុមគ្រួសារប្រមាណ ២ពាន់៧រយលានដុល្លារក្នុងមួយឆ្នាំៗ ហើយសាច់ប្រាក់ទាំងនោះ ក៏បានចូលរួមចំណែកក្នុងការអភិវឌ្ឍប្រទេសជាតិផងដែរ។

បើតាមឯកឧត្តម អ៊ិត សំហេង ការអនុវត្តច្បាប់ស្ដីពីសហជីព បានបន្ដលើកកម្ពស់សេរភាពអង្គការវិជ្ជាជីវៈ ដោយគិតត្រឹមត្រីមាសទី១ឆ្នាំនេះ ការចុះបញ្ជីអង្គការវិជ្ជាជីវៈនៅកម្ពុជាបានកើនឡើងដល់ជាង៦ពាន់អង្គភាព។

ឯកឧត្ដមបានបន្តទៀតថា រាជរដ្ឋាភិបាលបានត្រៀមរៀបចំផែនការបណ្តុះបណ្តាលជំនាញវិជ្ជាជីវៈដល់យុវជននៃគ្រួសារក្រីក្រ និងងាយរងគ្រោះទូទាំងប្រទេសចំនួន១លាន៥សែននាក់ ដោយរដ្ឋធានាផ្តល់ប្រាក់ឧបត្ថម្ភចាប់ពីឆ្នាំ២០២៣នេះតទៅ ដើម្បីផ្តល់ឱកាសឱ្យពួកគេទទួលបានជំនាញសម្រាប់យកទៅធ្វើការងារ ឬបង្កើតមុខរបរដោយខ្លួនឯង និងបំពេញតម្រូវការនៃកម្លាំងពលកម្មជំនាញសម្រាប់ការវិនិយោគថ្មីៗនៅកម្ពុជា៕