បើតាមអ្នកជំនាញបានគូសបញ្ជាក់ទៀតថា សកម្មភាពដឹកជញ្ជូនទំនិញមានសញ្ញាងើបឡើងនេះ ដោយសារនៅប្រទេសចិននិងនៅប្រទេសមួយចំនួនទៀតហាក់មានភាពធូស្រាលជាងមុន ពីជំងឺកូវីដ-១៩។
លោក ស៊ិន ចន្ធី ប្រធានសមាគមភស្តុភាកម្មកម្ពុជាបានឲ្យដឹងថា សកម្មភាពដឹកជញ្ជូនគិតចាប់ពីចុងខែមិថុនា និងដើមខែកក្កដានេះចាប់ផ្តើមប្រសើរឡើងជាងមុនបន្តិច ខណៈកាលពីខែកុមម្ភៈដល់ខែឧសភា សកម្មភាពដឹកជញ្ជូនបានធ្លាក់ចុះរហូតដល់៦០ ភាគរយ។
បើទោះបីជាពេលកន្លងមកសកម្មភាពដឹកជញ្ជូនធ្លាក់ចុះខ្លាំងក៏ដោយ ប៉ុន្ដែលោក ស៊ិន ចន្ធី អះអាងថា គិតមកទល់នឹងពេលនេះ មិនទាន់សមាជិកណាមួយប្រកាសព្យូរការងារជាបណ្តោះអាសន្ននោះឡើយ បើទោះបី ចំណូលរបស់ពួកគេនៅរកបានត្រឹមតែ៣០ភាគរយក៏ដោយចុះ។ ចំណូលដែលនៅរកបានទាំងនោះ គឺតាមរយៈការដឹកជញ្ជូនទំនិញចាំបាច់មួយចំនួនរួមាន ម្ហូបអាហារ អង្ករ និងទំនិញពីឧស្សាហកម្មរោងចក្រខ្លះនៅតែអាចនាំចេញបាន។
អត្ថបទទាក់ទង!
អ្នកជំនាញលើវិស័យដឹកជញ្ជូនទំនិញរូបនេះ បានអះអាងទៀតថា បើទោះជាការដឹកជញ្ជូនតាមផ្លូវអាកាសមិនទាន់ដំណើរការឡើងវិញក៏ដោយចុះ ក៏ការដឹកជញ្ជូននេះកំពុងត្រូវបានជំនួសដោយការដឹកជញ្ជូនតាមផ្លូវគោក និងផ្លូវទឹក គឺមានការបើកឲ្យដំណើរការជាធម្មតា ដោយគ្រាន់តែមិនសូវមានទំនិញដឹកជញ្ជូនច្រើននៅឡើយ។ ប៉ុន្តែ វាហាក់មានការសកម្មភាពស្ទុះងើបឡើងវិញបន្តិចនៅក្នុងខែកក្កដានេះ។ ជាងនេះទៅទៀត នៅក្នុងអំឡុងពេលនេះ ការដឹកជញ្ជូនទំនិញឆ្លងកាត់តាមច្រកព្រំដែន កម្ពុជា ថៃ គឺនៅតែមមាញឹកជាងការដឹកជញ្ជូនទំនិញឆ្លងកាត់តាមច្រកព្រំដែនកម្ពុជា និងវៀតណាម។
សូមបញ្ជាក់ថា គិតមកទល់បច្ចុប្បន្ននេះ ចំនួនក្រុមហ៊ុនដឹកជញ្ជូនដែលបានចុះបញ្ជីនៅក្នុងក្រសួងពាណិជ្ជកម្មកម្ពុជាមានប្រមាណជិត ៤០០ ក្រុមហ៊ុនហើយ ខណៈក្រុមហ៊ុនដឹកជញ្ជូនដែលជាសមាជិកសមាគមភ្នាក់ងារបញ្ជូនទំនិញកម្ពុជា មានជាង ១០០ ក្រុមហ៊ុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
