អ្នកជំនាញ៖ កូវីដ-១៩ ទាញទម្លាក់ឧស្សាហកម្មកៅស៊ូធម្មជាតិចូលទៅក្នុងវិបត្តិ

នៅឆ្នាំនេះ ផលិតកម្មកៅស៊ូធម្មជាតិសកលលោក កំពុងជួបបញ្ហាមិនចាញ់វិស័យផ្សេងទៀតទេ នៅចំពេលដែលការផ្ទុះឡើងនៃមេរោគកូវីដ-១៩។ យ៉ាងណាមិញ បើតាមការព្យាករ ផលិតកម្មកៅស៊ូ ទំនងជាធ្លាក់ចុះប្រមាណ ៥% នៅឆ្នាំនេះ ខណៈដែលការរាតត្បាតនៃមេរោគកូវីដ-១៩ បានធ្វើឲ្យប៉ះពាល់ដល់តម្រូវការកៅស៊ូ ហើយវាក៏បានអូសទាញឲ្យឧស្សហកម្មនេះ ធ្លាក់ចូលទៅក្នុងវិបត្តិផងដែរ។ នេះបើតាមការអះអាងរបស់ សមាគមប្រទេសផលិតជ័រកៅស៊ូធម្មជាតិ។

កម្មករកំពុងធ្វើការក្នុងរោងចក្រកែច្នៃកៅស៊ូ ក្នុងប្រទេសថៃ (http://www.thanhniennews.com)

សមាគមប្រទេសផលិតជ័រកៅស៊ូធម្មជាតិ បានចាប់ផ្ដើមធ្វើការព្យាករតាំងពីដើមឆ្នាំមក អំពីផលិតកម្ម និងតម្រូវការជ័កៅស៊ូ ដែលថា នឹងមានការកើនឡើងនៅឆ្នាំនេះ ប៉ុន្ដែមកដល់ពេលឥឡូវនេះ សមាគមបានមើលឃើញថា ទិន្នផលកៅស៊ូបានធ្លាក់ចុះគួរឲ្យកត់សម្គាល់ ជាពិសេសនៅក្នុងប្រទេសឥណ្ឌូនេស៊ី ដែលជាប្រទេសផលិតជ័រកៅស៊ូលំដាប់ទី២ របស់ពិភពលោក ដោយសារតែមេរោគរាតត្បាត បានធ្វើឲ្យប៉ះពាល់ដល់សេដ្ឋកិច្ច និងឧស្សាហកម្មរថយន្ដ។

លោក Premadasa អគ្គលេខាធិការសមាគមប្រទេសផលិតជ័រកៅស៊ូធម្មជាតិ បានឲ្យដឹងថា ការផ្ទុះរាលដាលនៃមេរោគកូវីដ-១៩ បានធ្វើឲ្យឧស្សាហកម្មកៅស៊ូធ្លាក់ចូលក្នុងវិបត្តិមួយ ដែលអាក្រក់បំផុត ក្នុងរយៈពេល ៣ទសវត្សរ៍មកនេះ ហើយបានជំរុញឲ្យភាគីពាក់ព័ន្ធនៅក្នុងខ្សែច្រវាក់តម្លៃទាំងមូល ក៏បានធ្លាក់ចូលក្នុងភាពច្របូកច្របល់ដែរ។

តម្រូវការ ពីក្រុមហ៊ុនផលិតសម្បកកង់ដូចជា Bridgestone ដែលជាក្រុមហ៊ុនធំជាងគេបំផុតលើពិភពលោកនោះ ក៏បានធ្លាក់ចុះដោយសារតែ ការផលិតរថយន្ដបានធ្លាក់ចុះ ព្រោះតែការផ្ទះរាលដាលនៃមេរោគឆ្លង ហើយក្រុមហ៊ុនជប៉ុនមួយនេះ ក៏បានផ្អាកប្រតិបត្តិការរោងចក្រមួយចំនួនរបស់ខ្លួនផងដែរ តាំងពីចុងខែមេសា និងដើមខែឧសភា។
សមាគមប្រទេសអ្នផលិតជ័រកៅស៊ូធម្មជាតិ បានរំពឹងថា ទិន្នផលកៅស៊ូនៅឆ្នាំប្រទេសឥណ្ឌូនេស៊ីនៅឆ្នាំនេះ អាចនឹងធ្លាក់ចុះ ១២,៦% មកនៅត្រឹមប្រមាណ ៣លានតោនប៉ុណ្ណោះក្នុងឆ្នាំ២០២០នេះ ខណៈដែលប្រទេសផលិតជ័រកៅស៊ូលំដាប់ទី១ គឺប្រទេសថៃ នឹងមានផលិតកម្មធ្លាក់ចុះប្រមាណ ១%។

ទោះយ៉ាងណា សមាគមបានបញ្ជាក់ថា តម្រូវការកៅស៊ូដើម្បីផលិតជាផលិតផលសម្ភារសម្រាប់ការការពារមេរោគឆ្លង ក៏បានចូលរួមចំណែកក្នុងការទូទាត់ចំពោះការធ្លាក់ចុះនៃតម្រូវការកៅស៊ូនៅក្នុងឧស្សាហកម្មផលិតរថយន្ដបានខ្លះផងដែរ។

តាមការប៉ាន់ស្មានរបស់សមាគម ផលិតកម្មកៅស៊ូសកលលោកនៅឆ្នាំនេះ នឹងធ្លាក់ចុះ ប្រហែល៥% មកនៅត្រឹមតែប្រមាណជាង ១៣លានតោនប៉ុណ្ណោះ ខណៈដែលកាលពីដើមឆ្នាំនេះ សមាគមធ្លាប់បានព្យាករថា ផលិតកម្មនឹងមានការកើនឡើងប្រហែលជិត ៤% និងការប្រើប្រាស់វិញនឹងកើនជិត៣%។ ក៏ប៉ុន្ដែ ឥឡូវនេះ ចំពោះតម្រូវការកៅស៊ូគឺត្រូវបានមើលឃើញថា នឹងធ្លាក់ចុះ៦% មកនៅត្រឹមប្រមាណ ១៣លានតោនប៉ុណ្ណោះ។

កៅស៊ូធម្មជាត្រូវបាននាំចូលដោយប្រទេសចិន ដែលជាអ្នកប្រើប្រាស់កៅស៊ូធំបំផុតរបស់ពិភពលោកនោះ អាចនឹងធ្លាក់ចុះប្រមាណជាងជាង ៥% ធៀបនឹងឆ្នាំមុន ពៅលគឺមកនៅត្រឹមប្រមាណ ៥លានតោន ខណៈដែលតម្រូវការកៅស៊ូនៅប្រទេសឥណ្ឌា ដែលជាអ្នកប្រើប្រាស់លំដាប់ទី២ និងជាអ្នកផលិតជ័រកៅស៊ូដែរនោះ នឹងមានការធ្លាក់ចុះ ជាង ២១%ដែរ ដោយសារតែប្រទេសនេះ បានបចាក់សោរបិទប្រទេស ដើម្បីការពារការឆ្លងរាលដាលនៃមេរោគ ហើយឧស្សាហកម្មរថយន្ដក៏មានរងផលប៉ះពាល់ដែរ។

ទាក់ទិន្ននឹងទីផ្សារកៅស៊ូនេះដែរ បើយើងក្រឡេកមើលកម្ពុជាវិញ ឃើញថា នៅខែឧសភាកន្លងទៅនេះ កម្ពុជាបាននាំចេញកៅស៊ូប្រមាណជិត ២ម៉ឺនតោន ធៀបនឹងខែឧសភាឆ្នាំមុន កើនឡើង ២២%។ ក៏ប៉ុន្ដែ ចំពោះតម្លៃកៅស៊ូវិញ កាលពីខែឧសភានេះ លក់បានក្នុងតម្លៃជាមធ្យមជិត ១២០០ ដុល្លារអាមេរិក ថយចុះជាង ២០០ ដុល្លារ បើធៀបនឹងតម្លៃកាលពីខែមេសា ហើយបើធៀបនឹងខែឧសភាកាលពីឆ្នាំមុន គឺថយចុះជាង ១៧០ ដុល្លារ៕

None