មានការចោទប្រកាន់ថា ការចែករំលែកផ្សព្វផ្សាយ«ព័ត៌មានមិនពិត» ឬ fake news តាមបណ្ដាញសង្គមហ្វេសប៊ុក (Facebook) ដើរតួនាទីមួយផ្នែកនៅពីក្រោយជ័យជំនះរបស់លោក ដូណាល់ ត្រាំ ដែលទើបស្បថកាន់តំណែងជាប្រធានាធិបតីអាមេរិកទី៤៥ កាលពីខែមុន។
ភ្លាមៗបន្ទាប់ពីមានការចោទប្រកាន់នេះ ស្ថាបនិកបណ្ដាញព័ត៌មានសង្គម ហ្វេសប៊ុក លោក Mark Zuckerberg បានទទួលស្គាល់ថា ពិតជាមានការផ្សព្វផ្សាយ«ព័ត៌មានមិនពិត» នៅលើបណ្ដាញព័ត៌មានសង្គមមែន ប៉ុន្តែ លោកច្រានចោលការចោទប្រកាន់ដែលថា ព័ត៌មានមិនពិតនៅលើបណ្ដាញសង្គមជះឥទ្ធិពលទៅលើលទ្ធផលបោះឆ្នោតប្រធានាធិបតីអាមេរិក។
ការពារប្រសើរជាងព្យាបាល
ដោយមានមេរៀនពីការបោះឆ្នោតប្រធានាធិបតីអាមេរិក ក្រុមហ៊ុនអ៊ិនថឹណិតយក្សចំនួន ២ គឺ Facebook និង Google បានរួមដៃគ្នាជាមួយស្ថាប័នសារព័ត៌មានធំៗ ដើម្បីទប់ស្កាត់ការចែករំលែក«ព័ត៌មានមិនពិត» នៅក្នុងប្រទេសបារាំង នៅមុនការបោះឆ្នោតប្រធានាធិបតីបារាំង។ ប្រទេសបារាំងនឹងបោះឆ្នោតជ្រើសរើសប្រធានាធិបតីអាណត្តិថ្មី នៅខែមេសា ឆ្នាំ២០១៧។
គួរអានអត្ថបទនេះផងដែរ!
សារព័ត៌មានធំៗ រួមមាន AFP, L’ Express និង Le Monde និងសារព័ត៌មានមួយចំនួនទៀត បានចូលរួមសហការនៅក្នុងយុទ្ធនាការនេះ។
Facebook មានអ្នកប្រើប្រាស់ ២៤លាននាក់ នៅក្នុងប្រទេសបារាំង ដែលចំនួននេះស្មើនឹងជាង ១ភាគ៣ នៃប្រជាជនសរុបរបស់ប្រទេសនេះ។ នៅក្នុងការប្រយុទ្ធប្រឆាំងនឹងការផ្សព្វផ្សាយព័ត៌មានមិនពិត Facebook ពឹងផ្អែកលើអ្នកប្រើប្រាស់ក្នុងការឲ្យសញ្ញាទៅលើព័ត៌មានណាមួយដែលសង្ស័យថាជាព័ត៌មានមិនពិត រួចហើយស្ថាប័នព័ត៌មានជាដៃគូនឹងផ្ទៀងផ្ទាត់ថាតើវាជាព័ត៌មានមិនពិត ឬយ៉ាងណា។
បន្ទាប់មក បើគេចាត់ទុកថាព័ត៌មានណាមួយជាព័ត៌មានមិនពិត នោះ Facebook នឹងដាក់សញ្ញាប្រាប់ថា «ព័ត៌មាននេះត្រូវគេជំទាស់» ដើម្បីប្រាប់អ្នកអានឲ្យដឹង។
ជាមួយគ្នានេះដែរ Facebook ក៏គាំទ្រដល់គំនិតផ្ដួចផ្ដើមដាច់ដោយឡែកមួយទៀតរបស់ Google ដែលមានឈ្មោះថា «CrossCheck» ដែលណែនាំអ្នកប្រើប្រាស់ឲ្យបញ្ជូនអត្ថបទដែលគេសង្ស័យថា មិនពិត ទៅកាន់គេហទំព័រជាក់លាក់មួយ ដើម្បីធ្វើការស៊ើបអង្កេត។
នៅឯប្រទេសអាល្លឺម៉ង់ Facebook ក៏កំពុងចាត់វិធានការប្រឆាំងនឹងព័ត៌មានមិនពិត នៅទីនោះដែរ បន្ទាប់ពីមន្ត្រីរដ្ឋាភិបាលអាល្លឺម៉ង់បានសម្ដែងការបារម្ភថា ដំណឹង ឬព័ត៌មានមិនពិត និងពាក្យសម្ដីញុះញង់ការស្អប់ខ្ពើមនៅលើអ៊ិនថឹណិត អាចនឹងជះឥទ្ធិពលដល់ការបោះឆ្នោតសហព័ន្ធ នាខែកញ្ញាខាងមុខនេះ។
ចំពោះនៅប្រទេសបារាំង និងនៅប្រទេសអាល្លឺម៉ង់ គេនឹងរង់ចាំមើលថា តើអាចនឹងមានបញ្ហាការផ្សព្វផ្សាយ«ព័ត៌មានមិនពិត» ជុំវិញការបោះឆ្នោត ដូចនៅអាមេរិក ឬយ៉ាងណា?៕
