ឯកឧត្តម ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា រោងចក្រគឺជាកន្លែងសុវត្ថិភាពបំផុត ព្រោះតែវាមិនមែនជាកន្លែងដែលមានជនបរទេសចេញចូលនោះទេ ហើយកម្មករកម្មាការិនី មិនសូវមានពេលចេញដើរទំនាក់ទំនងជាមួយនឹងមនុស្សខាងក្រៅច្រើននោះទេ ពោលគឺពួកគេ ច្រើនតែចេញពីផ្ទះមកធ្វើការ និងចេញពីធ្វើការទៅផ្ទះតែប៉ុណ្ណោះ។
ឯកឧត្តម ហេង សួរ មានប្រសាសន៍ថា «នៅកន្លែងរោងចក្រ មិនមែនជាកន្លែងដែលជនបរទេសចេញចូលទេ ចឹងវាជាកន្លែងដែលសុវត្ថិភាពបំផុតតាំងដើមមក ហើយជីវភាពរស់នៅរបស់បងប្អូនកម្មករកម្មារិនីរបស់យើងគឺខុសពីយើង មានន័យថា ម៉ោងធ្វើការគឺគាត់មកធ្វើការ ពេលដែលចប់ធ្វើការគឺគាត់ទៅផ្ទះត្រង់ ដែលមិនមានចលនាទាក់ទងជាមួយមនុស្សខាងក្រៅទេ ហើយមកដល់ពេលនេះ រោងចក្រនៅតែជាកន្លែងសុវត្ថិភាពបំផុត បើធៀបជាមួយកន្លែងផ្សេងទៀត ដូចជាភោជនីយដ្ឋានជាដើម»។
អត្ថបទគួរអាន
អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈរូបនេះ បានបន្ថែមទៀតថា សម្រាប់រោងចក្រដែលបានបើកដំណើរការឡើងវិញ ក្រោយពីមានវត្ថុធាតុដើមដែលត្រូវបានដឹកជញ្ជូនពីប្រទេសចិនមកនោះ រួមទាំង រោងចក្រទាំងអស់នៅកម្ពុជា បានអនុវត្តនូវវិធានអនាម័យបានយ៉ាងល្អ ដោយដាក់ចេញដោយក្រសួងការងារ និងអង្គការសុខភាពពិភពលោក។
បើតាម ការអះអាង របស់អ្នកនាំពាក្យក្រសួងការងារបានឲ្យដឹងថា មានរោងចក្រចំនួន១៧ រោងចក្រហើយ ដែលបានបើកដំណើរការឡើងវិញ ក្រោយពីវត្ថុធាតុដើមចំនួន៧នាវា បានដឹកមកដល់កម្ពុជា កាលពីពេលថ្មីៗនេះ ខណៈដែលសកម្មភាពនៃជំងឺកូវីដ១៩នៅកម្ពុជាកំពុងតែរីករាលដាល។យ៉ាងណាមិញទោះបីជាវត្ថុធាតុដើមចំនួន៧នាវាចំនួនបានជួយអោយរោងចក្រជិត ២០រោងចក្របើកដំណើរការឡើងវិញមែន ក្រសួងការងារ ចង់ឲ្យមានវត្ថុធាតុដើមកាន់តែច្រើនបន្ថែមទៀត ដើម្បីឲ្យ រោងចក្រផ្សេងៗទៀត អាចបន្តការងារដោយរលូន និងបានយូរអង្វែងជាងនេះ៕
None
