លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា និងជាប្រធាននាយកប្រតិបត្តិធនាគារអេស៊ីលីដាបានចាត់ទុកការសម្រេចបើកប្រទេសឡើងវិញពីសំណាក់រាជរដ្ឋាភិបាលកម្ពុជាជាការសម្រេចចិត្តដ៏ត្រឹមត្រូវ និងជាអ្វីដែលវិស័យធនាគារនិងមីក្រូហិរញ្ញវត្ថុ រួមជាមួយវិស័យនានាទន្ទឹងរង់ចាំ។ អ្នកជំនាញរូបនេះជឿជាក់ថា តាមរយៈយន្តការ និងវិធានការដ៏ច្បាស់លាស់ក្នុងការបើកប្រទេសឡើងវិញនេះ វានឹងជួយជំរុញឲ្យវិស័យសេដ្ឋកិច្ចកម្ពុជាក្នុងឆ្នាំ២០២១ មានកំណើនរីកលូតលាស់ឡើងវិញនៅពីរខែខាងមុខនេះ។
អ្នកជំនាញចាស់វស្សាក្នុងវិស័យហិរញ្ញវត្ថុរូបនេះក៏រំពឹងផងដែរថា តាមរយៈការបើកប្រទេសឡើងវិញនេះ វានឹងជួយឲ្យការផ្តល់ឥណទានក្នុងវិស័យធនាគារនៅកម្ពុជាមានកំណើនខ្ពស់នៅចុងឆ្នាំ២០២១ នេះ បន្ទាប់ពីអាជីវកម្មមួយចំនួន ដែលបានបិទទ្វារដោយសារវិបត្តិកូវីដ-១៩ កន្លងមក បានបើកប្រតិបត្តិការរបស់ខ្លួនឡើងវិញ។
មិនខុសគ្នាពីលោកបណ្ឌិត អ៊ិន ចាន់នី នោះទេ លោក ផល វ៉ាន់ឌី ប្រធានសមាគមមីក្រូហិរញ្ញវត្ថុកម្ពុជាយល់ឃើញថា ការបើកប្រទេសឡើងវិញលើគ្រប់វិស័យនេះ វាជាចលករមួយដ៏សំខានក្នុងការឈានទៅស្តារស្ថានភាពសង្គម និងសេដ្ឋកិច្ចកម្ពុជាឲ្យវិលទៅរកភាពល្អប្រសើរឡើងវិញ។ លោក ជឿជាក់ថា សេដ្ឋកិច្ចកម្ពុជានៅចុងឆ្នាំ២០២១ នឹងមានដំណើរការ និងកំណើនរីកលូតលាស់ទៅរកប្រក្រតីភាពឡើងវិញ ប្រសិនបើគ្មានការផ្ទុះការឆ្លងជំងឺកូវីដ-១៩ ប្រភេទថ្មីណាមួយកើតឡើង ក្រោយការបើកប្រទេសឡើងវិញទេនោះ។
អត្ថបទគួរអាន
ថ្នាក់ដឹកនាំសមាគមមីក្រូហិរញ្ញវត្ថុរូបនេះ ប្តេជ្ញាថា គ្រឹះស្ថានមីក្រូហិរញ្ញវត្ថុជាសមាជិកទាំងអស់ នឹងចូលរួមយ៉ាងសកម្មជាមួយរាជរដ្ឋាភិបាលកម្ពុជាក្នុងការស្តារ និងជំរុញកំណើនសេដ្ឋកិច្ចគ្រួសារ និងសង្គមជាតិឲ្យមានភាពប្រសើរឡើង។ អ្នកជំនាញរូបនេះ អះអាងថា គ្រឹះស្ថានមីក្រូហិរញ្ញវត្ថុបានត្រៀមខ្លួនជាស្រេចក្នុងការផ្តល់កម្ចីឥណទានជូនអតិថិជនក្នុងវិស័យសហគ្រាសធុនតូច និងមធ្យម ដើម្បីរួមចំណែកជួយស្តារវិស័យនេះឲ្យកាន់តែមានភាពល្អប្រសើរ ក្នុងអំឡុង និងក្រោយវិបត្តិកូវីដ-១៩។
គួររំលឹកថា នាពិធីបិទយុទ្ធនាការចាក់វ៉ាក់សាំងកូវីដ-១៩ ជូនកុមារអាយុ៦ឆ្នាំ និងបើកយុទ្ធនាការចាក់វ៉ាក់សាំងជូនកុមារអាយុ៥ឆ្នាំ សម្តេចតេជោនាយករដ្ឋមន្ត្រី ហ៊ុន សែន បានប្រកាសបើកដំណើរសកម្មភាពសង្គម និងសេដ្ឋកិច្ចលើគ្រប់វិស័យឡើងវិញ ចាប់ពីថ្ងៃទី១ ខែវិច្ឆិកា ឆ្នាំ២០២១ តទៅ បន្ទាប់ពីមើលឃើញពីតួលេខអ្នកឆ្លងជំងឺកូវីដ-១៩ នៅកម្ពុជាមានការថយចុះ និងចំនួនអ្នកបានចាក់វ៉ាក់សាំងមានកំណើនខ្ពស់។ តាមរយៈការបើកប្រទេសឡើងវិញនេះ សម្តេចរំពឹងថា សេដ្ឋកិច្ចកម្ពុជានឹងមានកំណើនក្នុងរង្វង់២,៦% នៅឆ្នាំ២០២១ ដែលកំណើននេះរំពឹងមានការចូលរួមចំណែកយ៉ាងធំពីវិស័យទេសចរណ៍ផ្ទៃក្នុង។
គួរបញ្ជាក់ផងដែរថា តាមការព្យាករចុងក្រោយរបស់ធនាគារពិភពលោកបានបន្ទាបការព្យាករកំណើនសេដ្ឋកិច្ចកម្ពុជានៅឆ្នាំ២០២១ ពី៤% មកនៅត្រឹម២,២%ប៉ុណ្ណោះ ខណៈធនាគារអភិវឌ្ឍន៍អាស៊ី(ADB)ក៏បានទម្លាក់ការព្យាករកំណើនសេដ្ឋកិច្ចកម្ពុជាមកនៅ ត្រឹម១,៩% ប៉ុណ្ណោះនៅឆ្នាំនេះ៕
None
