វ៉ាក់សាំងបង្ការជំងឺកូវីដ១៩ ចំនួន៥លានដូស ជាជំនួយរបស់ចិនបានដឹកមកដល់ប្រទេសកម្ពុជាហើយ

ប្រទេសចិន គឺជាប្រទេសដែលបានផ្ដល់ជំនួយវ៉ាក់សាំងបង្ការជំងឺកូវីដ១៩ ដំបូងគេមកកាន់ប្រទេសកម្ពុជា ដែលក្នុងនោះវ៉ាក់សាំងជំនួយចំនួន ៦០ម៉ឺនដូស ត្រូវបានដឹកមកដល់ប្រទេសកម្ពុជាជាលើកដំបូងកាលពីខែកុម្ភៈ ឆ្នាំ២០២១។ ដើម្បីគាំទ្រកម្ពុជាលើការប្រយុទ្ធប្រឆាំងជំងឺកូវីដ១៩ និងការពារអាយុជីវិតពលរដ្ឋកម្ពុជា ពីជំងឺរាតត្បាតសាកលមួយនេះ ប្រទេសចិនបានផ្តល់ជំនួយជាបន្តបន្ទាប់ផងដែរ ហើយមកដល់ពេលនេះ ប្រទេសចិន បានផ្តល់ជំនួយវ៉ាក់សាំងមកកាន់កម្ពុជាសរុបជាង ២៨លានដូស ក្នុងនោះ ២០លានដូស ជាជំនួយថ្មី។ បន្ថែមពីនេះ កម្ពុជាក៏បានបញ្ជាទិញវ៉ាក់សាំងមួយចំនួនទៀតពីប្រទេសចិនផងដែរ។

សូមជម្រាបថា អត្រាចាក់វ៉ាក់សាំងកូវីដ១៩ នៅកម្ពុជា ចាប់ពីអាយុ ៣ឆ្នាំឡើង  គិតត្រឹមថ្ងៃទី២៨ ខែមីនា មានចំនួន ៩២,៥៩% នៃប្រជាជនសរុប ១៦លាននាក់ ដែលវាលទ្ធផលដ៏ល្អប្រសើរ លើការងារចាក់វ៉ាក់សាំងបង្ការជំងឺកូវីដ១៩នេះ ដោយក្នុងនោះ កម្ពុជាបានយកវ៉ាក់សាំងចិន ធ្វើជាបង្អែកនៅក្នុងប្រតិបត្តិការរបស់ខ្លួនផងដែរ៕

អត្ថបទ សោម ស្រីពេជ្រ