ជុំវិញទៅនឹងបញ្ហានេះ ក្រុមអ្នកជំនួញនិងជំនាញនៅក្នុងវិស័យនេះ បានលើកឡើងថា ទីផ្សារនៃផ្នែកម្ហូបអាហារនិងសេវាកម្មនៅក្នុងប្រទេសកម្ពុជា នៅមានទំហំធំក្នុងចំណោមប្រជាជនថ្នាក់កណ្តាល និងប្រជាជនថ្នាក់ខ្ពស់ ស្របពេលការកើនឡើងនៃទំនោររបស់អតិថិជនទម្លាប់ខ្លួនទៅនឹងជីវិតរស់នៅបែបបស្ចិមប្រទេស ក៏បានជំរុញឲ្យប្រជាពលរដ្ឋចំណាយច្រើនទៅលើម្ហូបអាហារ ភេសជ្ជៈ ដែលមានស្តង់ដារអនាម័យ ប្រណីតភាព និងមានភាពស៊ីវិល័យ។
ថ្លែងក្នុងពិព័រណ៍វិស័យម្ហូបអាហារនិងសណ្ឋាគារ CAMFOOD AND HOTEL ប្រចាំឆ្នាំ២០១៨ រយៈពេល៣ថ្ងៃ ដោយទទួលបានការគាំទ្រនិងសាទរយ៉ាងខ្លាំងពីសំណាក់ភ្ញៀវជាតិនិងអន្តរជាតិ និងក្រុមហ៊ុន ដែលបានចូលរួម អ្នកជំនាញនិងអ្នកជំនួញនៅក្នុងវិស័យម្ហូបអាហារធំៗមួយចំនួន សុទ្ធតែបានលើកឡើងថា ប្រជាជនថ្នាក់កណ្តាលនិងថ្នាក់ខ្ពស់ក្នុងទីក្រុងភ្នំពេញ បានចំណាយប្រាក់សរុបប្រមាណ ២០០ ទៅ ៣០០លានដុល្លារក្នុងមួយខែៗ ទៅលើម្ហូបអាហារ និងផលិតផលទាក់ទងនឹងម្ហូបអាហារ ភេសជ្ជៈ និងការចំណាយលើការបរិភោគតាមភោជនីយដ្ឋាន ផ្សារទំនើប ជាដើម។
ជាទូទៅ ការចំណាយរបស់ប្រជាជនថ្នាក់កណ្តាលនិងថ្នាក់ខ្ពស់នៅក្នុងទីក្រុងភ្នំពេញក្នុងមួយថ្ងៃ សម្រាប់ម្ហូបអាហារនិងភេសជ្ជៈមានទំហំប្រមាណច្រើនជាង ១,៥លានដុល្លារក្នុងមួយថ្ងៃ។
តើអ្នកបានអានអត្ថបទនេះ ឬនៅ?
លោក អ៊ឹង វីនស៊ិន (VINCENT) នាយកប្រតិបត្តិក្រុមហ៊ុន AusKhmer Import and Export បានលើកឡើងថា សេដ្ឋកិច្ចប្រទេសកម្ពុជាកំពុងតែរីកលូតលាស់យ៉ាងឆាប់រហ័ស ដែលធ្វើឲ្យតម្រូវការទីផ្សារម្ហូបអាហារ និងភេសជ្ជៈ មានការកើនឡើងយ៉ាងខ្លាំង ហើយពិព័រណ៍នេះក៏អនុញ្ញាតឲ្យក្រុមហ៊ុនមានឱកាសចាប់យកអតិថិជន និងជួយដល់អាជីវកម្មរបស់ពួកគាត់ផងដែរ។
លោក វីនស៊ីន បានបន្តថា ដោយសារមើលឃើញពីទំហំទីផ្សារម្ហូមអាហារនិងភេសជ្ជៈបច្ចុប្បន្ន មានតម្រូវការខ្ពស់ បានតម្រូវឲ្យក្រុមហ៊ុន AusKhmer របស់លោក ដែលមានបទពិសោធន៍ជាង១៥ឆ្នាំ លើផ្នែកនេះ បានផ្គត់ផ្គង់ប្រភេទស្រាប្រណីតៗ ប្រមាណជាង ៣ពាន់ប្រភេទផ្សេងៗគ្នា ប្រភេទគ្រឿងទេស និងសាច់ សម្រាប់ម្ហូបអឺរ៉ុបជាច្រើនមុខ ទៅកាន់ភោជនីយដ្ឋានធំៗ ភោជនីយដ្ឋានបែប Fast Food សណ្ឋាគារធំៗ និងផ្សារទំនើបជាច្រើនផងដែរ។
តើអ្នកបានអានអត្ថបទនេះ ឬនៅ?
លោក វីនស៊ីន បញ្ជាក់បន្ថែមថា ពិព័រណ៍ CAMFOOD AND HOTEL 2018 បានចូលរួមលើកកម្ពស់វិស័យម្ហូបអាហារនិងសណ្ឋាគារក្នុងស្រុក ឲ្យកើនឡើងមួយកម្រិតទៀត ដោយបានទាក់ទាញភ្ញៀវទេសចរណ៍ និងបើកឱកាសឲ្យពាណិជ្ជករទាំងក្នុងនិងក្រៅស្រុក បានផ្សព្វផ្សាយពីផលិតផល ក៏ដូចជាអភិវឌ្ឍជំនាញពាក់ព័ន្ធនឹងម្ហូបអាហារ និងបដិសណ្ឋារកិច្ច ជាពិសេស គឺមានឱកាសចាប់ដៃគូពាណិជ្ជកម្មក្នុងទីផ្សារកម្ពុជា។
ចំណែកអ្នកនាង គា ម៉ារ៉ា នាយកប្រតិបត្តិទីផ្សារក្រុមហ៊ុន L.S.H Cambodia បានលើកឡើងដែរថា តម្រូវការទីផ្សារម្ហូបអាហារនិងភេសជ្ជៈនៅប្រទេសកម្ពុជា ពិតជាមានការកើនឡើង ខណៈការផ្គត់ផ្គង់ទៅកាន់អតិថិជនរបស់ក្រុមហ៊ុនកើនឡើងជាង ២០ភាគរយក្នុងឆ្នាំនេះ។ តាមរយៈពិព័រណ៍នេះ បានផ្តល់ឱកាសឲ្យក្រុមហ៊ុន ចាប់យកអតិថិជនថ្មីៗ ព្រមទាំងសហការជាមួយដៃគូបន្ថែមទៀតផង។
គួរជម្រាបដែរថា នេះជាឆ្នាំទី៦ហើយ ដែលក្រុមហ៊ុន AMB Tarsus Events Group បានរៀបចំពិព័រណ៍វិស័យម្ហូបអាហារនិងសណ្ឋាគារខ្នាតអន្តរជាតិ នៅប្រទេសកម្ពុជា ហើយនឹងធ្វើឡើងជាបន្តបន្ទាប់ទៀត នៅឆ្នាំក្រោយៗផងដែរ។ យ៉ាងណាមិញ ក្នុងឆ្នាំ២០១៨នេះ មានការចូលរួមពីក្រុមហ៊ុនជាង ៣៥០ក្រុមហ៊ុន ទាំងក្នុងស្រុកនិងក្រៅស្រុក មកពី ៩ប្រទេស ដូចជា បារាំង អាមេរិក ចិន ថៃ សិង្ហបុរី តៃវ៉ាន់។ល៕
