កាលពីខែមុន លោក Hodges ដែលអតីតជាមេទ័ពកំពូលមួយរូបរបស់អាមេរិកនោះ បាននិយាយថា ទាហានរុស្ស៊ីដែលបានអស់កម្លាំងនោះ អាចនឹងត្រូវបានបង្ក្រាបដោយយោធាអ៊ុយក្រែននៅចុងឆ្នាំនេះ ខណៈដែលកងទ័ពអ៊ុយក្រែនដណ្តើមបានមកវិញនូវតំបន់មួយចំនួនដែលកាន់កាប់ដោយរុស្ស៊ីនៅក្នុងទីក្រុង Kharkiv។
បរិមាណសព្វាវុធ និងគ្រាប់បែកដ៏ច្រើនសន្ធឹកសន្ធាប់ត្រូវបានកងទ័ពរុស្ស៊ីបន្សល់ទុកចោលខណៈដែលពួកគេបានដកថយយ៉ាងប្រញាប់ប្រញាល់ ដោយសារខ្លាចការឡោមព័ទ្ធរបស់កងទ័ពអ៊ុយក្រែន។ លោក Hodges បានប្រាប់សារព័ត៌មាន Times កាលពីថ្ងៃទី ១២ ខែកញ្ញា ថា បស្ចិមលោកប្រហែលជាកំពុងសម្លឹងមើលការដួលរលំនៃសហព័ន្ធរុស្ស៊ី ដែលអាចនឹងមានក្នុងរយៈពេល ៤ ឬ ៥ ឆ្នាំខាងមុខទៀតនេះ។ បស្ចិមលោកមិនបានត្រៀមសម្រាប់ការដួលរលំសហភាពសូវៀតនៅក្នុងឆ្នាំ១៩៩១នោះទេ ប៉ុន្តែពួកគេត្រូវតែត្រៀមសម្រាប់លទ្ធភាពនៃការដួលរលំនៅពេលនេះ។ នេះបើតាមការអះអាងរបស់លោក Ben Hodges ជាអតីតឧត្ដមសេនីយ៍យោធាអាមេរិកប្រចាំតំបន់អឺរ៉ុប។
លោកបានពន្យល់ពីមូលហេតុដែលនាំឱ្យរុស្ស៊ីអាចដួលរលំបែបនេះថា កម្លាំងយោធា និងអំពើពុករលួយដែលលោកគិតថា នឹងមិនអាចទ្រាំទ្របានសម្រាប់ពលរដ្ឋរុស្ស៊ីនោះទេ ហើយនៅមានសសរ ស្តម្ភឧស្សាហកម្មដ៏សំខាន់ទាំង២របស់រុស្ស៊ីថែមទៀត គឺការនាំចេញថាមពល និងការនាំចេញអាវុធដែលលោកគិតថា កម្មវត្ថុទាំង២នេះនឹងធ្វើឲ្យរុស្ស៊ីរងគ្រោះខ្លាំងបំផុត។
អត្ថបទគួរអាន
ទោះយ៉ាងណាអតីតប្រមុខកងទ័ពអង់គ្លេសលោក Lord Dannatt បាននិយាយថា អ៊ុយក្រែនត្រូវការសព្វាវុធ«កាន់តែច្រើនឡើងថែមទៀត»ពីប្រទេសបស្ចិមលោក ដើម្បីបន្តដាក់សម្ពាធលើប្រទេសរុស្ស៊ី ហើយលោកបានបន្ថែមថា កងទ័ពរុស្ស៊ីបានដកខ្លួនកាន់តែច្រើនឡើងចេញពីតំបន់ខាកៀវរបស់អ៊ុយក្រែន ដែលជាការបង្ហាញពីការរត់ចោលទីតាំងរបស់ពួកគេយ៉ាងខ្លាំង។
រុស្ស៊ីបានសារភាពថា ខ្លួនពិតជាបានដកទ័ពរបស់ខ្លួនចេញមែន ប៉ុន្តែបានអះអាងថា នោះគឺគ្រាន់តែជាការសម្រេចចិត្តបែបយុទ្ធសាស្ត្រមួយ ដើម្បីឱ្យពួកគេអាច«បង្កើតក្រុមឡើងវិញ»តែប៉ុណ្ណោះ។
លោក Lord Dannattអតីតប្រមុខកងទ័ពអង់គ្លេស បានប្រាប់ Sky News កាលពីថ្ងៃចន្ទដើមសប្ដាហ៍នេះថា បស្ចិមលោកកំពុងមើលឃើញទិដ្ឋភាពមិនគួរឱ្យជឿមួយចំនួនដោយលោកបានបន្ថែមថា ថ្វីបើអ៊ុយក្រែនបានវាយសំរុកទៅមុខយ៉ាងលឿនគួរឱ្យកត់សម្គាល់ក៏ដោយ ប៉ុន្តែទឹកដីរបស់អ៊ុយក្រែនជាច្រើននៅតែស្ថិតក្នុងការកាន់កាប់របស់រុស្ស៊ីនៅឡើយ ដូច្នេះវាស្ថិតនៅលើផ្លូវមួយវែងឆ្ងាយទៅមុខទៀតដើម្បីទទួលបានជ័យជម្នះទាំងស្រុង៕
អត្ថបទ៖ សុខ ជា
