ផលិតផលជលផលកម្ពុជា៤មុខបន្ថែមទៀត ត្រូវបានអនុញ្ញាតឱ្យនាំចេញទៅប្រទេសចិន

លោកជំទាវ អ៊ឹម រចនា អ្នកនាំពាក្យក្រសួងកសិកម្មរុក្ខាប្រមាញ់ និងនេសាទបានគូសបញ្ជាក់ថា មិនយូរទៀតទេផលិតផលជលផលរបស់កម្ពុជា៤ប្រភេទបន្ថែមទៀតរួមមានបង្កងប៉ាក អន្ទង់ ត្រីដំរី និងខ្យងនឹងមានវត្តមានលើទីផ្សារប្រទេសចិន ដែលជាទីផ្សារមួយដ៏ធំទាំងនៅក្នុងតំបន់ និងពិភពលោក។ ភាពជោគជ័យលើការនាំចេញផលិតផលជនផលទៅកាន់ទីផ្សារចិននេះ គឺវាបានបង្ហាញពីប្រសិទ្ធភាពនៃគោលនយោបាយច្បាស់លាស់របសរាជរដ្ឋាភិបាល ក៏ដូចជាក្រសួងកសិកម្មដែលបានដាក់ចេញកន្លងមក ក្នុងការធានាសន្តិសុខស្បៀងនៅក្នុងប្រទេស និងការស្វែងរក និងបើកទីផ្សារសម្រាប់កសិផលខ្មែរដែលមានគុណភាពខ្ពស់ ស្របទៅតាមអនាម័យ និងភូតគាមអនាម័យទៅកាន់ទីផ្សារពិភពលោក។

អ្នកនាំពាក្យក្រសួងកសិកម្មរុក្ខាប្រមាញ់ ជំទាវ អ៊ឹម រចនា រំពឹងថា តាមរយៈការនាំចេញផលិតផលជលផលទាំង៤មុខរបស់កម្ពុជាបន្ថែមទៀតនេះ វានឹងជួយធ្វើឲ្យផលិតផលជលផលធម្មជាតិរបស់កម្ពុជាកាន់តែមានទីផ្សារល្អ នឹងក្លាយជាទីពេញនិយមរបស់ប្រជាជនចិន។ សម្រាប់មន្ត្រីជាន់ខ្ពស់រូបនេះ ការនាំចេញផលិតផលជលផលធម្មជាតិទៅកាន់ទីផ្សារចិនមិនត្រឹមតែជួយពង្រឹង និងពង្រីកការធ្វើពាណិជ្ជកម្មរវាងប្រទេសទាំងពីរកម្ពុជា-ចិនឲ្យកាន់តែល្អប្រសើរប៉ុណ្ណោះទេ ថែមទាំងបានរួមចំណែកជួយលើកម្ពស់ជីវភាពរបស់ប្រជានេសាទកម្ពុជាផងដែរ។

ស្ថានទូតចិនប្រចាំនៅកម្ពុជាបានបញ្ជាក់កាលពីពេលថ្មីៗថា ក្រោយរដ្ឋបាលគយចិនបានធ្វើបច្ចុប្បន្នភាពពីបញ្ជីឈ្មោះប្រទេស ឬតំបន់ និងប្រភេទជលផលដែលអនុញ្ញាតឲ្យនាំចេញទៅកាន់ប្រទេសចិន ក្រុមហ៊ុនខ្មែរ Cambodian Tienit International Trading បានជាប់ក្នុងដំណាក់កាលនៃការត្រួតពិនិត្យរបស់រដ្ឋបាលគយចិន និងបានបញ្ចប់ការចុះបញ្ជីរបាយការណ៍ក្នុងការនាំចេញជលផលទៅកាន់ប្រទេសចិនហើយ។ ផ្អែកលើពាណិជ្ជកម្មប្រពៃណីដែលមានស្រាប់លើផលិតផលជលផលរវាងចិន និងកម្ពុជា ដូច្នេះកម្ពុជាអាចនាំចេញផលិតផលជលផលធម្មជាតិចំនួន៤មុខរួមមានបង្កងប៉ាក អន្ទង់ ត្រីដំរី និងខ្យង ទៅកាន់ប្រទេសចិនបានហើយ។

សូមបញ្ជាក់ថា ផលិតផលជលផលធម្មជាតិរបស់កម្ពុជាទាំង៤មុខនេះ គឺជាផលិតផលទី៣នៃវិស័យកសិកម្មរបស់កម្ពុជា ដែលត្រូវបានអនុញ្ញាតឱ្យនាំចេញទៅកាន់ទីផ្សារចិននៅក្នុងឆ្នាំ២០២៣នេះ ខណៈផលិតផលជលផលធម្មជាតិចំនួន១២មុខផ្សេងទៀតបានទទួលការអនុញ្ញាតឲ្យនាំចេញទៅកាន់ទីផ្សារចិនកាលពីពេលកន្លងទៅ។ ដោយឡែកដំណាំម្រេច គឺជាកសិផលដំបូងគេរបស់កម្ពុជា ដែលត្រូវបានអនុញ្ញាតឱ្យនាំចេញទៅប្រទេសចិនក្នុងឆ្នាំនេះ៕