ផលិតផលទេសចរដ៏ថ្មីសន្លាងមួយនេះ គឺជាការវិនិយោគរបស់ក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀម ដែលនេះជាផលិតទេសចរណ៍ថ្មី និងសំខាន់មួយទៀតរបស់កម្ពុជា សម្រាប់ជាមេដែកទាក់ទាញភ្ញៀវទេសចរជាតិ និងអន្តរជាតិ។ តាមការរំពឹងទុក ការដាក់ឲ្យបើកដំណើរការលើកដំបូងនេះ ជម្រកអភិរក្សសត្វនេះនៅខេត្តសៀមរាបមួយនេះ រំពឹងថាអាចទទួលបានភ្ញៀវទេសចររាប់ម៉ឺននាក់ចូលទស្សនាផងដែរ។
គម្រោងជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វនេះ ដែលស្ថិតនៅភូមិ ក្បួន, ឃុំខ្ចាស់, ស្រុក សូទ្រនិគម, ខេត្តសៀមរាប។ គម្រោងនេះ គឺជាផលិតផលិតទេសចរណ៍ថ្មីមួយទៀតរបស់ខេត្តសៀមរាប ដែលមានការបង្ហាញអាងចិញ្ចឹមត្រីជាច្រើនប្រភេទ ដែលមានទិដ្ឋភាពប្លែកគួរឲ្យចាប់អារម្មណ៍។ នៅក្នុងគម្រោងនេះ មានការបង្ហាញនូវពូជត្រីទឹកសាប ទឹកប្រៃ និងសត្វជាច្រើនប្រភេទ ដែលត្រូវបាននាំមកពីតំបន់ផ្សេងៗ។
ពាក់ព័ន្ធនឹងការបើកនូវផលិតផលទេសចរថ្មីមួយនៅលើទឹកដីខេត្តសៀមរាបនេះដែរ លោក សុខ ថុល ប្រធានរដ្ឋបាលខេត្តសៀមរាប បានគូសបញ្ជាក់ថា ការបើកនូវផលិតផលទេសចរថ្មីៗបន្ថែមទៀតនេះ គឺអាចទាក់ទាញភ្ញៀវទេសចរមកកម្សាន្តនៅខេត្តសៀមរាបកាន់តែច្រើន និងចំណាយពេលច្រើនថ្ងៃផងដែរជាពិសេសគឺភ្ញៀវទេសចរក្នុងស្រុកតែម្តង ដោយសារតែការមកម្សាន្តនៅខេត្តសៀមរាប បច្ចុប្បន្ន មាននូវកន្លែងទេសចរកែច្នៃ សួនសិប្បនិម្មិតថ្មីៗជាច្រើន ក្រៅតែពីមកទស្សនាតាមតំបន់ប្រាសាទនានា។
អត្ថបទគួរអាន
គម្រោងជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វនឹង ក្លាយជាគោលដៅលំដាប់ពិភពលោកនៅក្នុងខេត្តសៀមរាបនៅលើផ្ទៃដី១០០ហិកតា ហើយគោលដៅរបស់គម្រោងនេះ គឺ នឹងក្លាយជាគោលដៅទាក់ទាញបំផុតទី២នៅក្នុងខេត្តសៀមរាប បន្ទាប់ពីប្រាង្គប្រាសាទអង្គរវត្ត។
សូមបញ្ជាក់ថា នៅរយៈពេល៧ខែឆ្នាំ២០២២នេះ ខេត្តសៀមរាបទាំងមូលទទួលបានភ្ញៀវទេសចរសរុបចំនួនជាង១លាន២សែននាក់ កើនឡើងប្រមាណ ៨៩០% ប្រៀបធៀបរយៈពេលដូចគ្នានៅឆ្នាំ២០២១ ក្នុងនោះមានភ្ញៀវទេសចរជាតិចំនួនជាង ១លាន១៥ម៉ឺននាក់ និងភ្ញៀវទេសចរអន្តរជាតិចំនួនជាង៨ម៉ឺននាក់ និងព្យាករណ៍ថា ខេត្តសៀមរាបនឹងទទួលបានភ្ញៀវបរទេសសរុបជាង១លាននាក់ក្នុងឆ្នាំ២០២២នេះ និង២លាននាក់នៅឆ្នាំ២០២៣។ នេះបើយោងតាមការបញ្ជាក់របស់រដ្ឋមន្រ្តីក្រសួងទេសចរណ៍៕
