ប្រទេសកម្ពុជាប្រារព្ធពិធីបុណ្យចូលឆ្នាំថ្មីប្រពៃណីខ្មែរ ក្នុងអំឡុងពាក់កណ្ដាលខែមេសា។ ឆ្នាំនេះ បុណ្យចូលឆ្នាំខ្មែរនឹងប្រព្រឹត្តទៅពីថ្ងៃទី១៤ ដល់ថ្ងៃទី១៦ ខែមេសា។ នាឱកាសនេះ ប្រជាពលរដ្ឋខ្មែរនាំគ្នាសម្រុកធ្វើដំណើរចាកចេញពីរាជធានីភ្នំពេញ ទៅកាន់ស្រុកកំណើតកើតជានៅតាមបណ្ដាខេត្តក្រុងជិតឆ្ងាយទូទាំងប្រទេស និងខ្លះដែលមានទីកំណើតនៅភ្នំពេញ ក៏ធ្វើដំណើរចេញទៅតាមទីរមណីយដ្ឋាននានាផងដែរ។ ស្របពេលនេះ ក៏ជាឱកាសដែលអ្នករកស៊ីដឹកអ្នកដំណើរដំឡើងថ្លៃសំបុត្រ ផងដែរ។
ការដំឡើងថ្លៃសំបុត្រធ្វើដំណើរនាពេលបុណ្យចូលឆ្នាំនេះ ស្ទើរតែក្លាយជាប្រពៃណីទៅហើយ។ ចំពោះប្រជាជនដែលមានជីវភាពមធ្យម ឬធូរធារ ការឡើងថ្លៃធ្វើដំណើរពេលឱកាសបុណ្យនេះ អាចមិនជាបញ្ហាចោទទេ ប៉ុន្តែ វាជាបន្ទុកធ្ងន់សម្រាប់ពលរដ្ឋភាគច្រើន ដែលជាកម្មករកម្មការិនីរោងចក្រកាត់ដេរ ដែលមានប្រាក់ឈ្នួលតិច។
កត្តានេះបានបង្ខំឲ្យអ្នកខ្លះបង្ខំចិត្តជិះបញ្ជ្រៀតគ្នាណែនណាន់តាន់តាប់ លើរថយន្តឈ្នួលដែលយកតម្លៃថោកជាង ប៉ុន្តែ ដឹកអ្នកដំណើរញាត់ឲ្យបានច្រើន ដូចក្នុងរូបភាពខាងក្រោមស្រាប់។
តើឆ្នាំនេះនឹងដូចបណ្ដាឆ្នាំមុនៗ ដែរ ឬទេ ?
ប្រហែលជាគ្មានអ្វីប្លែកទេ នៅជិតចូលឆ្នាំមកដល់ ប្រមុខរដ្ឋាភិបាលអាចនឹងចេញសេចក្ដីអំពាវនាវសូមកុំឲ្យរថយន្តឈ្នួល-តាក់ស៊ី ដំឡើងថ្លៃធ្វើដំណើរ ដូចរាល់ឆ្នាំ។ ប៉ុន្តែ វិធានការបែបនេះ នាពេលកន្លងមក បង្ហាញថា មិនមានប្រសិទ្ធភាពទេ។ អំពាវនាវចេះតែអំពាវនាវទៅ រីឯថ្លៃធ្វើដំណើរនៅតែឡើងដដែល ព្រោះថា អ្នកប្រកបរបរដឹកអ្នកដំណើរមានហេតុផលរបស់គាត់ក្នុងការដំឡើងថ្លៃ។ ពួកគាត់ថា ពេលចូលឆ្នាំ ឬបុណ្យជាតិធំៗម្ដងៗ ប្រជាជនសម្រុកធ្វើដំណើរតែក្នុងទិសដៅពីភ្នំពេញទៅខេត្ត ដោយមិនមានអ្នកធ្វើដំណើរពីខេត្តចូលមកភ្នំពេញវិញទេ ដូច្នេះ បើពួកគេមិនដំឡើងថ្លៃ គឺមិនចំណេញទេ។
ដូច្នេះ ឆ្នាំនេះ គេអាចទាយទុកមុនបានថា រឿងរថយន្តឈ្នួល-តាក់ស៊ីឡើងថ្លៃនេះ នឹងគ្មានអ្វីប្រែប្រួលទេ។ លើកលែងតែអាជ្ញាធររដ្ឋាភិបាលមានវិធានការអ្វីផ្សេងក្រៅតែពីអំពាវនាវកុំឲ្យដំឡើងថ្លៃ។
ឆ្នាំនេះ វិស័យឯកជនចូលរួមជួយសម្រាលបន្ទុកអ្នកធ្វើដំណើរទៅចូលឆ្នាំ
ក្រុមហ៊ុនស្រាបៀ Ganzberg (ហ្គេនស៍បឺគ) បានស្ម័គ្រចិត្តប៉ាវរថយន្តក្រុងចំនួន ១០០គ្រឿង ដើម្បីផ្ដល់ការដឹកជញ្ជូនដោយឥតគិតថ្លៃ ដល់ប្រជាពលរដ្ឋ ជាពិសេស កម្មករកម្មការិនីរោងចក្រកាត់ដេរ ទៅតាមបណ្ដាខេត្ត ក្នុងពេលចូលឆ្នាំថ្មីប្រពៃណីខ្មែរខាងមុខនេះ។
ក្រុមហ៊ុនស្រាបៀរ ហ្គេនស៍បឺគ ផ្ដល់រថយន្តក្រុង១០០គ្រឿងដឹកអ្នកដំណើរទៅស្រុកកំណើតពេលចូលឆ្នាំខ្មែរ។
តំណាងក្រុមហ៊ុនស្រាបៀរហ្គេនស៍បឺគ បានលើកឡើងថា៖ «ដើម្បីចូលរួមអបអរសាទរក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ជាមួយពលរដ្ឋកម្ពុជា នៅទូទាំងប្រទេសនាពេលខាងមុខ ក្រុមហ៊ុនស្រាបៀរហ្គេនស៍បឺគ បានបង្កើតកម្មវិធីពិសេសមួយពុំធ្លាប់មានពីមុនមក ដោយបានរៀបចំរថយន្តក្រុងចំនួន ១០០គ្រឿង ហៅថា GANZBERG UBER BUS ដើម្បីសម្រួលដល់ការដឹកជញ្ជូនប្រជាពលរដ្ឋខ្មែរ ដោយសុវត្ថិភាពទៅជួបជុំញាតិមិត្តបងប្អូននិងក្រុមគ្រួសារនៅស្រុកកំណើត ចំនួន១៥ខេត្ត-ក្រុង ដោយធ្វើដំណើរឆ្លងកាត់ផ្លូវជាតិចំនួន ៨ខ្សែទូទាំងប្រទេស»។
សូមបញ្ជាក់ថា ខេត្តក្រុងទាំង១៥ដែលរថយន្ត GANZBERG UBER BUS ធ្វើដំណើរទៅដល់មានដូចជា ខេត្ដស្វាយរៀង ខេត្តតាកែវ ខេត្តកំពត ក្រុងព្រះសីហនុ ខេត្តកំពង់ឆ្នាំង ខេត្តពោធ៍សាត់ ខេត្តបាត់ដំបង ខេត្តបន្ទាយមានជ័យ ខេត្តកំពង់ធំ ខេត្តសៀមរាប ខេត្តកំពង់ចាម ខេត្តត្បូងឃ្មុំ ខេត្តក្រចេះ និងខេត្ដព្រៃវែង។
អាស្រ័យហេតុនេះ សម្រាប់ប្រជាពលរដ្ឋខ្មែរ ដែលត្រូវធ្វើដំណើរពីរាជធានីភ្នំពេញ ឆ្ពោះទៅកាន់បណ្តាខេត្តក្រុងនានាទាំង១៥នេះ សូមអញ្ជើញមកទទួលសំបុត្រដោយឥតគិតថ្លៃ ពីស្តង់ GANZBERG UBER BUS នៅមជ្ឈមណ្ឌលកោះពេជ្រ ចាប់ពីថ្ងៃទី៩ ខែមេសា ម៉ោង២រសៀលតទៅ និងចែកជូនរហូតដល់អស់សំបុត្រ៕
