តាមសេចក្ដីប្រកាសព័ត៌មានរបស់ក្រសួងពាណិជ្ជកម្ម មកដល់ដើមខែកុម្ភៈនេះ តម្លៃប្រេងឥន្ធនៈ បានបន្តឡើងថ្លៃ៥០រៀលថែមទៀតក្នុង១លីត្រ ដោយប្រេងសាំងធម្មតាត្រូវលក់ចេញចាប់ពីថ្ងៃទី ១ ដល់ថ្ងៃទី ១៥ ខែកុម្ភៈ ឆ្នាំ២០២១ ក្នុងតម្លៃ ៣.៤០០រៀលក្នុង១លីត្រ ខណៈប្រេងម៉ាស៊ូតលក់ចេញក្នុងតម្លៃ ៣.០៥០រៀលក្នុង១លីត្រ។
តម្លៃប្រេងឥន្ធនៈ បានចាប់ផ្ដើមឡើងថ្លៃចាប់តាំងពីពាក់កណ្តាលខែវិច្ឆិកា ឆ្នាំ២០២០ មកម្ល៉េះ ពោលគឺ បើប្រៀបធៀបតម្លៃប្រេងសាំង និងម៉ាស៊ូតបច្ចុប្បន្ន ជាមួយតម្លៃ កាលពីពាក់កណ្ដាលខែវិច្ឆិកា ឆ្នាំ២០២០ ប្រេងសាំងធម្មតាបានឡើងថ្លៃខ្ពស់ជាងមុន ៤៥០រៀល ខណៈប្រេងម៉ាស៊ូតឡើង ៥០០រៀលក្នុងមួយលីត្រ។
អត្ថបទទាក់ទង
បើតាមឯកឧត្តម ស៊ាង ថៃ រដ្ឋលេខធិការក្រសួងពាណិជ្ជកម្ម មូលហេតុដែលធ្វើឲ្យតម្លៃប្រេងនៅកម្ពុជាឡើងថ្លៃនេះ ដោយសារផ្អែកលើតម្លៃប្រេងឆៅនៅលើទីផ្សារអន្តរជាតិឡើងថ្លៃ។ ពោលគឺក្រសួងគ្មានសិទ្ធិក្នុងការបញ្ចុះ ឬដំឡើងតម្លៃប្រេងនោះទេ គ្រាន់តែជាអ្នកសម្របសម្រួលប៉ុណ្ណោះ។
បើក្រលេកទៅមើល តម្លៃប្រេងឆៅនៅលើទីផ្សារពិភពលោក ដូចជានៅទីផ្សារ WTI របស់អាមេរិកឃើញថា មានស្ទុះងើបឡើងវិញចាប់តាំងពីខែវិច្ឆិកាឆ្នាំ២០២០មក ដោយងើបឡើងពីតម្លៃជិត ៣៦ដុល្លារអាមេរិក ក្នុងមួយបារ៉ែល មកដល់តម្លៃជាង ៥៤ដុល្លារក្នុងមួយប៉ារ៉ែលគិតត្រឹមថ្ងៃទី២ ខែកុម្ភៈ ឆ្នាំ២០២១ ខណៈដែលតម្លៃប្រេងឆៅនៅលើទីផ្សារអង់គ្លេស នៅតែបន្ដកំណើនដូចគ្នាដែរ ដោយគិតនៅថ្ងៃទី ០២ ខែកុម្ភៈ ឆ្នាំ២០២១ ប្រេងមួយបារ៉ែលតម្លៃជិត៥៧ដុល្លារ៕
None
