កន្លងមកប្រធានបទនេះ ធ្លាប់ត្រូវបានសហភាពអឺរ៉ុបលើកយកមកពិភាក្សាម្តងជាពីរដងរួចមកហើយ ប៉ុន្តែការបង្កើតកងកម្លាំងប្រដាប់អាវុធរបស់អឺរ៉ុប ហាក់មិនបានលេចចេញជារូបរាង ដុំកំភួនអ្វីនោះទេ ក្រៅតែពីកងទ័ពចម្រុះប្រមាណ ១.៥០០នាក់ដែលគេរៀបចំឡើងកាលពីឆ្នាំ២០០៧ ប៉ុន្តែមិនធ្លាប់ត្រូវបានចេញធ្វើប្រតិបត្តិការណាមួយឡើយ ដោយសារបញ្ហាប្រាក់ឧត្ថម្ភ និងភាពស្ទាក់ស្ទើរក្នុងការដាក់ពង្រាយកងទ័ព។
យ៉ាងណាមិញ ក្រោយវិបត្តិនៅអាហ្វហ្គានីស្ថាន និងក្រោយពេលដែលអាមេរិកចាកចេញ ដោយបានជម្លៀសមនុស្សស្ទើរមិនទាន់ចេញពីក្រុង កាប៊ុល ប្រធានបទបង្កើតកងទ័ពរបស់អឺរ៉ុបត្រូវបានគេលើកយកមកដាក់លើតុពិភាក្សាជាថ្មី។ ក្នុងន័យនេះអឺរ៉ុប ចង់មានកងទ័ពមួយដោយខ្លួនឯង ដែលអាចប្រើប្រាស់សម្រាប់អន្តរាគមន៍យោធានានា ឧទារហ៍ជាក់ស្តែង ដូចជាការជម្លៀសមនុស្សចេញពីអាហ្វហ្គានីស្ថានជាដើម។
លោក ចូសេប បូរេល ប្រធានគោលនយោបាយអឺរ៉ុបបានបង្ហាញក្តីសង្ឃឹមថា ផែនការខាងលើនឹងត្រូវលេចចេញជារូបរាងត្រឹមខែតុលាឬ វិច្ឆិកាខាងមុខ ដោយជំហានដំបូងលោកចង់បានកងទ័ពប្រមាណ ៥ពាន់នាក់សិន។ លោក បូ រេល បន្តថា លោកចង់កាត់បន្ថយការពឹងផ្អែកទៅលើកងទ័ពអាមេរិក ពេលមានអាសន្នម្តងៗ។
អត្ថបទគួរអាន
យ៉ាងណាមិញ ប្រភពពីមន្ត្រីជាន់ខ្ពស់អឺរ៉ុបដែលសុំមិនបញ្ចេញអត្តសញ្ញាណ បានប្រាប់រ៉យទ័រថា គម្រោងនេះមិនទាន់មានការសម្រេចចិត្តនៅឡើយទេ ព្រោះគណៈកម្មការអឺរ៉ុប មិនអាចធ្វើការសម្រេចចិត្តដោយខ្លួនឯង និងដោយគ្មានសម្លេងគាំទ្រពីសមាជិកទាំង ២៧ប្រទេសនោះទេ។ លើសពីនេះ គេត្រូវរង់ចាំការសម្រេចរបស់សភាអឺរ៉ុប ក៏ដូចជាអង្គការសហប្រជាជាតិផងដែរ។
គួរជម្រាបថា គម្រោងបង្កើតកងទ័ពរបស់ EU ទំនងជាពិបាកទៅរួចបន្តិច ដោយសារបញ្ហាហិរញ្ញវត្ថុផ្គត់ផ្គង់ដល់កងទ័ព។ ជាក់ស្តែង បើគេមើលទៅលើការចំណាយផ្នែកយោធារបស់ប្រទេសសមាជិក EU ភាគច្រើននៅមានកម្រិតទាបនៅឡើយ។ ការចំណាយគិតជាមធ្យមរបស់ប្រទេសសមាជិកទាំង២៧ របស់សហភាពអឺរ៉ុបលើវិស័យការពារជាតិមានចំនួនត្រឹមតែ ១,២% នៃGDPប៉ុណ្ណោះ។ នេះបើតាមទិន្នន័យនៅឆ្នាំ២០១៩៕
None
