លោកស្រី គ្រីស្តាលីនា ចចជីវ៉ា នាយកគ្រប់គ្រងអង្គការរូបិយវត្ថុអន្តរជាតិ IMF និយាយកាលពីថ្ងៃចន្ទដើមសប្តាហ៍នេះថា នៅក្នុងបរិបទបច្ចុប្បន្ននៃការរឹតបន្តឹងគោលនយោបាយរូបិយវត្ថុ គោលនយោបាយសារពើពន្ធមិនអាចនៅទ្រឹងបានទេ ព្រោះអតិផរណា ទំនិញ និងថ្លៃចំណាយនានាសម្រាប់ជីវភាពរស់នៅតែឡើងថ្លៃ កំពុងវាយលុកទៅគ្រប់ផ្នែកនៃសង្គម។
ត្រូវបានស្រង់សំដីក្នុងបទសម្ភាសន៍ជាមួយរ៉យទ័រ លោកស្រី ចចជីវ៉ា និយាយថា៖ ក្នុងនិន្នាការដ៏លំបាកនេះ ធនាគារកណ្តាលតាមប្រទសនីមួយៗដើរតួសំខាន់ណាស់លើការសម្រេចចិត្ត ចំពោះគោលនយោបាយរៀងៗខ្លួន។ ហេតុអ្វីបានជាធនាគារកណ្តាលដើរតួនាទីសំខាន់? សំខាន់ក៏ដោយដោយសារអតិផរណានៅពេលនេះមានចរិតរឹងរូសខ្លាំង មានន័យថា ងាយឡើងតែមិនងាយធ្លាក់ចុះវិញទេ ហើយវាមិនល្អឡើយសម្រាប់កំណើនសេដ្ឋកិច្ច និងកាន់តែអាក្រក់ថែមទៀត សម្រាប់ជនក្រីក្រ និងជនងាយរងគ្រោះ។
លោកស្រីបន្ថែមថា គោលនយោបាយសារពើពន្ធ និងទៅគាំទ្រគ្រប់គ្នាដោយមិនមានការរើសអើង នោះគឺតាមរយៈការគ្រប់គ្រងលើតម្លៃថាមពល និងផ្តល់ការឧបត្ថម្ភធន់ដើម្បីបញ្ចុះតម្លៃ។
ការផ្តល់យោបល់ពីមន្ត្រីជាន់ខ្ពស់ IMF រូបនះ ធ្វើឡើងនៅបន្ទាប់ពី រដ្ឋាភិបាលជុំវិញពិភពលោកកាន់តែច្រើនឡើង កំពុងបង្កើនជំនួយដល់ប្រជាជនរបស់ពួកគេ ចំពេលអតិផរណាខ្ពស់ និងកង្វះខាតស្បៀងអាហារ ហើយក៏ស្របពេលដែលមានការដំឡើងអត្រាការប្រាក់គោលពីធនាគារកណ្តាលសហរដ្ឋអាមេរិក ធ្វើឱ្យទីផ្សារហិរញ្ញវត្ថុកំពុងមានភាពរង្គោះរង្គើ។
កាលពីពេលថ្មីនេះ ទីភ្នាក់ងារអង្គការសហប្រជាជាតិ ក៏បានព្រមានអំពីផលវិបាកធ្ងន់ធ្ងរនៃវិបត្តិសេដ្ឋកិច្ចសកល ពិសេសសម្រាប់ប្រទេសកំពុងអភិវឌ្ឍន៍ ដែលបង្កឡើងដោយការដំឡើងអត្រាការប្រាក់គោលឥតឈប់ឈរ។ ជំនួសមកវិញភ្នាក់ងាររបស់អង្គការសហប្រជាជាតិ បានអំពាវនាវឱ្យប្រើប្រាស់យុទ្ធសាស្ត្រផ្សេង ដូចជាការកាត់បន្ថយពន្ធ និងការធានាបាននូវការផ្គត់ផ្គង់ទំនិញ ស្បៀងអាហារ ជាដើម។
សូមជម្រាបថា មូលនិធិរូបិយវត្ថុអន្តរជាតិ IMF កាលពីខែកក្កដាបានព្យាករពីទស្សនវិស័យសេដ្ឋកិច្ចពិភពលោកថានឹងនៅតែបន្តធ្លាក់ចុះថែមទៀត ហើយប្រទេសមួយចំនួនក៏រំពឹងថា នឹងធ្លាក់ចូលទៅក្នុងវិបត្តិសេដ្ឋកិច្ច នៅក្នុងឆ្នាំ២០២៣ខាងមុខ។ IMF បានកែសម្រួលការព្យាករការកំណើនសេដ្ឋកិច្ចពិភពលោករបស់ខ្លួនមកនៅត្រឹម ៣,២%ក្នុងឆ្នាំ២០២២ និង២,៩% នៅឆ្នាំ២០២៣ ហើយស្ថាប័នមួយនេះ នឹងបញ្ចេញទស្សនវិស័យថ្មីមួយទៀតក្នុងខែតុលានេះផងដែរ៕
