ទោះយ៉ាងណា មន្ត្រីជាន់ខ្ពស់ផ្សារមូលបត្រកម្ពុជាលើកឡើងថា ទោះបីជាលទ្ធផលនៃការបោះផ្សាយបណ្ណបំណុលរដ្ឋខុសពីអ្វីដែលរំពឹងទុកក៏ពិតមែន ប៉ុន្តែរាជរដ្ឋាភិបាលកម្ពុជា នឹងនៅតែបន្ដនីតិវិធីបោះផ្សាយបណ្ណបំណុលរបស់ខ្លួនជាបន្តបន្ទាប់តទៅមុខទៀតដដែល ។
ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុ(CSX) ជាបានគូសបញ្ជាក់ថា ស្ថានភាពនៃការផ្សាយលក់មូលបត្ររដ្ឋនាពេលបច្ចុប្បន្ននេះ ហាក់មិនសូវទទួលបានការគាំទ្រច្រើនពីអ្នកវិនិយោគនៅឡើយនោះទេ ដោយសារតែ ការបោះផ្សាយលក់មូលបត្រនេះ វាស្របពេលទៅនឹងស្ថានភាពសេដ្ឋកិច្ចពិភពលោករួមទាំងកម្ពុជាកំពុងប្រឈមនឹងបញ្ហាជាច្រើនដែលរងឥទ្ធិពលនៃសង្គ្រាមនៅអ៊ុយក្រែន។ ជាពិសេសគឺការដំឡើងអត្រាការប្រាក់ដុល្លាររបស់សហរដ្ឋអាមេរិកមានការកើនឡើងយ៉ាងគំហុកនាពេលបច្ចុប្បន្ននេះ។ កត្តាទាំងអស់នេះហើយ បានធ្វើឱ្យការបោះផ្សាយលក់មូលបត្ររបស់រដ្ឋ មិនសូវទទួលបានការគាំទ្រច្រើន និងលទ្ធផលខ្ពស់ដូចអ្វីដែលបានរាជរដ្ឋាភិបាលបានរំពឹងទុកនោះទេ។
អត្ថបទគួរអាន
តែយ៉ាងណាក៏ដោយចុះ ឯកឧត្តម ហុង សុហួរ អះអាងថាបើទោះបីជាលទ្ធផលនៃការបោះផ្សាយបណ្ណបំណុលរដ្ឋមកទល់ពេលនេះ ខុសពីអ្វីដែលរំពឹងទុកក៏ដោយ ប៉ុន្ដែរាជរដ្ឋាភិបាលកម្ពុជា នឹងនៅតែបន្ដនីតិវិធីបោះផ្សាយបណ្ណបំណុលរបស់ខ្លួនដដែល។ តាមការវាយតម្លៃថ្នាក់ដឹកនាំផ្សារមូលបត្រកម្ពុជារូបនេះ ដរាបណាអត្រាការប្រាក់នៅលើពិភពលោកនៅតែមានកម្រិតខ្ពស់ដូចពេលបច្ចុប្បន្ននេះ រាជរដ្ឋាភិបាលកម្ពុជាកម្ពុជា នឹងមិនទាន់សូវមានការជំរុញខ្លាំងក្នុងការបោះផ្សាយបណ្ណបំណុលនេះឱ្យបានក្នុងទំហំធំដូចអ្វីដែលធ្លាប់បានគ្រោងទុកនោះទេ ប៉ុន្តែរាជរដ្ឋាភិបាលនឹងនៅតែបន្តធ្វើទៅក្នុងកម្រិតមួយតិចតួចជាបន្តបន្ទាប់ ដ្បិតរាជរដ្ឋាភិបាលត្រូវការចាយពេលច្រើនបន្ថែមទៀតលើការបោះផ្សាយលក់មូលបត្របំណុលនេះ ដើម្បីទទួលបានការគាំទ្រពីអតិថិជនជាបន្តបន្ទាប់ទៅទៀត។
គួរជម្រាបថា បើការបញ្ជាក់របស់ធនាគារជាតិនៃកម្ពុជា មូលបត្របំណុលរបស់រដ្ឋដែលមានតម្លៃសរុប ៣០០លានដុល្លារនោះ គឺមានតម្លៃ១លានរៀលក្នុង១បណ្ណ ជាមួយការផ្តល់អត្រាគូប៉ុង ឬការប្រាក់ក្នុងតម្លៃថេរ ២,៤៤% ហើយការទូទាត់សងគូប៉ុងត្រូវធ្វើឡើងរៀងរាល់៦ខែម្តង៕
