ក្រុមហ៊ុនទាំងបីនេះ បានរៀបចំចុះហត្ថលេខាលើកិច្ចសហការ ដាច់ដោយឡែកពីរផ្សេងៗគ្នា ក្នុងពេលតែមួយកាលពីថ្ងៃទី៣ ខែកុម្ភៈ ឆ្នាំ២០២២ លើគោលបំណង ជំរុញឱ្យវិស័យធនាគារ និងវិស័យអចលនទ្រព្យ អាចបំពេញបន្ថែមឱ្យគ្នាទៅវិញទៅមក ជាពិសេសតាមរយៈការដាក់ឱ្យប្រើប្រាស់សេវាវាយតម្លៃអចលនទ្រព្យតាមប្រព័ន្ធឌីជីថល ឱ្យកាន់តែទូលំទូលាយដល់ស្ថាប័នហិរញ្ញវត្ថុ ក្នុងការផ្តល់សេវាឥណទានពេលវេលាដល់អ្នកប្រើប្រាស់។ ក្នុងនោះ ការវាយតម្លៃការស្នើសុំប្រាក់កម្ចីជាមួយធនាគារ ហត្ថា នឹងមានភាពជឿនលឿន និងរហ័ស ការព្រោះការប្រើប្រាស់បច្ចេកវិទ្យាឌីជីថល ដើម្បីវាយតម្លៃទ្រព្យហៅថា “indication plus” របស់ក្រុមហ៊ុនVTrust ។
លោក វង្ស សុខាល ប្រធានក្រុមប្រឹក្សាភិបាល ក្រុមហ៊ុន Vtrust Appraisal បានថ្លែងក្នុងពិធីចុះហត្ថលេខាថា កិច្ចសហការនេះនឹងជំរុញឱ្យការប្រើប្រាស់សេវាវាយតម្លៃអចលនទ្រព្យកាន់តែទូលំទូលាយ និងបង្កើនប្រសិទ្ធភាពប្រតិបត្តិការសេវាឥណទានដល់ធនាគារ ហត្ថា ។
លោក វង្ស សុខាល៖ «ពីមុនការវាយតម្លៃអចលនទ្រព្យ ប្រើរយៈពេលដល់ទៅបីថ្ងៃ ទើបអាចដឹងតម្លៃពីអចលនទ្រព្យនោះ។ ប៉ុន្តែបច្ចុប្បន្នយើងប្រើពេលខ្លីប៉ុណ្ណោះ អាចដឹងពីតម្លៃនៃអចលនទ្រព្យនោះ តាមរយៈការប្រើប្រាស់សេវា Indication Plus Platform ព្រោះផ្លេតហ្វមនេះ អ្នកប្រើប្រាស់អាចចូលទៅប្រើ និងស្នើការវាយតម្លៃអចលនទ្រព្យ បានគ្រប់ពេលវេលា ងាយស្រួល ឆាប់រហ័សប្រកបដោយទំនុកចិត្តខ្ពស់ ព្រមទាំងបានដឹងពីតម្លៃអចលនទ្រព្យគ្រប់ទីកន្លែងនៅទូទាំងប្រទេស»។
លោកឧកញ៉ា ហួត អៀងតុង ប្រធានអគ្គនាយក នៃធនាគារ ហត្ថា មានប្រសាសន៍ថា ការសម្រេចកិច្ចសហការនៅថ្ងៃនេះ ជាការបោះជំហានទៅមុខកាន់តែប្រសើរឡើងមួយកម្រិតទៀតក្នុងការវាយតម្លៃអចលនទ្រព្យ សម្រាប់ការសិក្សាឥណទានដល់អតិថិជនរបស់ធនាគារ ហត្ថា ប្រកបដោយគុណភាព និងប្រសិទ្ធភាពខ្ពស់តាមរយៈការទទួលបាននូវទិន្នន័យដ៏ច្បាស់លាស់ និងកាន់តែឆាប់រហ័សពីក្រុមហ៊ុនជំនាញ ដូចជា Indication Plus Platform របស់ក្រុមហ៊ុន Vtrust Appraisal ។
លោកឧកញ៉ា៖ «ធនាគារ ហត្ថា សង្ឃឹមថានឹងទទួលបានផលប្រយោជន៍ច្រើន ពីប្រព័ន្ធវាយតម្លៃទំនើបតាមឌីជីថលនេះ ដូចជាការផ្តល់ឥណទានរបស់យើងនឹងមានភាពលឿនរហ័ស និងមានសុក្រឹត្យភាពជាងមុន។ ខ្ញុំជឿថា កិច្ចសហការនៅថ្ងៃនេះ នឹងបំពេញបន្ថែមឱ្យគ្នាទៅវិញទៅមក ដើម្បីភាពរីកចម្រើនទាំងអស់គ្នា»។
បច្ចេកវិទ្យាឌីជីថល Indication Plus Platform គឺជាសេវាកម្មវាយតម្លៃអចលនទ្រព្យទំនើប ដែលអាចវិភាគ និងចេញជារបាយការណ៍វាយតម្លៃអចលនទ្រព្យដោយស្វ័យប្រវត្តិ ដោយមានការរៀបចំចងជាប្រព័ន្ធរូបមន្តត្រឹមត្រូវដោយអ្នកជំនាញ និងតាមស្តង់ដារវាយតម្លៃអចលនទ្រព្យអន្តរជាតិ។ មិនថែមតែប៉ុណ្ណោះ នាពេលអនាគតដ៏ខ្លីខាងមុខនេះ ការទូទាត់សម្រាប់សេវាកម្មអចលនទ្រព្យនឹងកាន់តែមានភាពងាយស្រួល ដោយសារអតិថិជនអាចប្រើប្រាស់ Hattha mobile និង Z1 App ដែលអាចធ្វើការបង់ប្រាក់សម្រាប់សេវាកម្មអចលនទ្រព្យទាំងអស់នៅទូទាំងប្រទេស។
ជម្រាបជូនថា ធនាគារ ហត្ថា បានវិវឌ្ឍខ្លួនពីគ្រឹះស្ថានហិរញ្ញវត្ថុ ក្លាយជាធនាគារពាណិជ្ជមួយក្នុងចំណោមធនាគារឈានមុខនៅកម្ពុជា។ រហូតមកដល់បច្ចុប្បន្ន ទ្រព្យសកម្មរបស់ធនាគារ ហត្ថា បានកើនដល់ប្រមាណ ២ពាន់លានដុល្លារ ចាប់តាំងពីស្ថាប័ននេះបានបើកដំណើរការក្នុងអំឡុងឆ្នាំ១៩៩៤។ ការរីកធំធាត់នេះ បានធ្វើឱ្យ ធនាគារ ហត្ថា ពង្រីកសាខារហូតដល់ ១៧៧សាខា និងដាក់ដំណើរការម៉ាស៊ីនអេធីអឹមចំនួន១៣៧ នៅទូទាំងប្រទេសកម្ពុជា ហើយការចុះកិច្ចព្រមព្រមនៅថ្ងៃនេះ នឹងក្លាយជាការរួមចំណែកដ៏សំខាន់ ក៏ដូចជាការបំពេញបន្ថែមភាពរីកចម្រើនវាងស្ថាប័នទាំងបី៕
