ទន្ទឹមនឹងនេះ ថ្នាក់ដឹកនាំក្រសួងសាធារណការ ក៏បានបង្ហាញពីការងារអាទិភាពមួយចំនួន ក្នុងការជួយប្រែក្លាយកម្ពុជាឲ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៥០ ផងដែរ ហើយវាក៏ត្រូវមានការចូលរួមយ៉ាងសំខាន់ពីវិស័យដឹកជញ្ជូន និងឡូជីស្ទិក។
នាកិច្ចប្រជុំត្រួតពិនិត្យវឌ្ឍនភាពលើការរៀបចំផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្មនិងផែនការមេគ្រប់ជ្រុងជ្រោយ ស្ដីពីប្រព័ន្ធដឹកជញ្ជូនអន្តរមធ្យោបាយកម្ពុជាឆ្នាំ២០២២-២០៣០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ស្នើឲ្យអ្នកជំនាញ និងភាគីពាក់ព័ន្ធជួយផ្តល់មតិយោបល់ និងធាតុចូលបន្ថែមក្នុងការៀបចំសេចក្តីព្រាងផែនការមេទាំងនេះ។ ការស្នើបែបនេះ ក្នុងគោលបំណងធ្វើយ៉ាងណាឲ្យការរៀបចំផែនការមេទាំងនេះមានភាពល្អប្រសើរ និងមានលក្ខណៈគ្រប់ជ្រុងជ្រោយដែលអាចទទួលយកបានពីគ្រប់ភាគី និងមជ្ឈដ្ឋានទូទៅ។
ជាមួយគ្នានេះឯកឧត្តមទេសរដ្ឋមន្រ្តី បានណែនាំឲ្យអង្គភាពពាក់ព័ន្ធទាំងអស់ផ្តល់ធាតុចូលឱ្យបានឆាប់ ទៅលើសេចក្តីព្រាងផែនការមេគ្រប់ជ្រុងជ្រោយ ស្ដីពីប្រព័ន្ធដឹកជញ្ជូនអន្តរមធ្យោបាយកម្ពុជាឆ្នាំ២០២២-២០៣០ ដែលរៀបចំឡើងដោយឧត្តមក្រុមប្រឹក្សាសេដ្ឋកិច្ចជាតិ និងបន្ថែមនូវចំណុចដែលខ្វះខាតនានា ដោយផ្អែកលើផែនការមេអន្តរកាល ដែលបានអនុម័តជាផ្លូវការដោយក្រុមប្រឹក្សាជាតិភ័ស្តុភាកម្មកាលពីខែមករា ឆ្នាំ២០២០។
អត្ថបទគួរអាន
ទន្ទឹមនឹងនេះ ឯកឧត្តមទេសរដ្ឋមន្ត្រី ស៊ុន ចាន់ថុល បានគូសបញ្ជាក់ពីគម្រោងមួយចំនួន ដែលក្រសួងបាន និងកំពុងខិតខំប្រឹងប្រែងសហការជាមួយក្រុមហ៊ុនឯកជននានា ដើម្បីបង្កើតឡើងនាពេលខាងមុខផងដែរ។ គម្រោងទាំងនោះរួមមានការបង្កើតមជ្ឈមណ្ឌលភស្តុភារកម្មភ្នំពេញ គម្រោងសិក្សាអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ គម្រោងសិក្សាអភិវឌ្ឍផ្លូវនាវាចរណ៍ទន្លេបាសាក់ គម្រោងសិក្សាធ្វើទំនើបកម្មផ្លូវរថភ្លើងល្បឿនលឿន និងគម្រោងសាងសង់ផ្លូវល្បឿនលឿនភ្នំពេញ-បាវិត។ បន្ថែមលើនេះរាជរដ្ឋាភិបាល ក៏បានជំរុញឲ្យក្រសួងសិក្សាក្នុងការសាងសង់ផ្លូវកំពង់ធំ-កំពង់ឆ្នាំង និងផ្លូវបាត់ដំបង-សៀមរាបផងដែរ។
ជាមួយគ្នានេះ ឯកឧត្តមទេសរដ្ឋមន្ត្រី ក៏បានគូសបញ្ជាក់ផងដែរអំពីគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ដែលសំដៅប្រែក្លាយកម្ពុជាឲ្យក្លាយជាប្រទេសមានចំណូលមធ្យមកម្រិតទាបនៅឆ្នាំ២០៣០ និងចំណូលមធ្យមកម្រិតខ្ពស់នៅឆ្នាំ២០៥០។ គោលនយោយនេះ ផ្តោតសំខាន់លើការងារអាទិភាពសំខាន់ចំនួន៤រួមមានការបញ្ចុះតម្លៃអគ្គិសនីឱ្យនៅកម្រិតទាប, ការអភិវឌ្ឍធនធានមនុស្សល្អ, ការបញ្ចុះតម្លៃភស្តុភាកម្ម និងដឹកជញ្ជូន និងការរៀបចំខេត្តព្រះសីហនុទាំងមូលឱ្យក្លាយជាតំបន់សេដ្ឋកិច្ចពិសេស៕
