ទីក្រុងហូជីមីញ គ្រោងនឹងអនុញ្ញាតបើកទទួលទេសចរបរទេស ដោយគ្មានការធ្វើចត្តាឡីស័កចាប់ពីខែធ្នូនេះតទៅ

នាយកដ្ឋានទេសចរណ៍ទីក្រុងហូជីមីញ បានរៀបចំផែនការកម្មវិធីលិខិតឆ្លងដែនវ៉ាក់សាំងជាបីដំណាក់កាល សម្រាប់ទទួលទេសចរមកពីអឺរ៉ុប អាស៊ីអាគ្នេយ៍ អាស៊ីភាគឦសាន អូស្ត្រាលី អាមេរិកខាងជើង និងមជ្ឈិមបូព៌ាជាដើម។  តើបីដំណាក់កាលនោះ មានអ្វីខ្លះ?

ដំណាក់ទី១ អ្នកដំណើរបរទេសតម្រូវឱ្យកក់កញ្ចប់ដំណើរកម្សាន្តជាមួយភ្នាក់ងារទេសចរណ៍វៀតណាម ហើយភ្ញៀវទេសចរអាចធ្វើដំណើរមកតាមជើងហោះហើរ ឬកប៉ាល់ទេសចរណ៍ ព្រមទាំងត្រូវស្នាក់សណ្ឋាគារ និងរមណីយដ្ឋានដែលបានកំណត់ដោយរដ្ឋាភិបាលផងដែរ។

ដំណាក់កាលទី២ ដែលគិតចាប់ពីខែមករា ឆ្នាំ ២០២២តទៅ ភ្ញៀវទេសចរអាចទៅទស្សនាខេត្ត គៀនយ៉ា, ណាមត្រាង,  ដាណាង, ឃ័ង ណាម និង ឃ័ង និញ បន្ទាប់ពីបានបញ្ចប់ដំណើរកម្សាន្តរយៈពេល ៧ ថ្ងៃនៅទីក្រុងហូជីមិញ។

ចំពោះដំណាក់កាលទី៣ ទីក្រុងហូជីមិញនឹងបើកដំណើរការឡើងវិញទាំងស្រុងសម្រាប់ទេសចរណ៍អន្តរជាតិ ក៏ប៉ុន្តែអាជ្ញាធរមិនទាន់បញ្ជាក់ពីពេលវេលាច្បាស់លាស់នៅឡើយទេ។

តែយ៉ាងណាមិញ អាជ្ញាធរទេសចរណ៍ទីក្រុងហូជីមិញបាននិយាយថា ក្នុងឆ្នាំ ២០២១ នេះ ទីក្រុងហូជីមីញផ្តោតតែលើការស្តារទេសចរណ៍ក្នុងស្រុកឡើងវិញប៉ុណ្ណោះ ហើយនឹងពិចារណាទទួលភ្ញៀវទេសចរបរទេសចាប់ពីឆ្នាំក្រោយតទៅ។

យ៉ាងណាមិញ ក្នុងរយៈពេល ៩ ខែដំបូងក្នុងឆ្នាំ ២០២១ ទីក្រុងហូជីមីញទទួលបានភ្ញៀវទេសចរក្នុងស្រុកចំនួន ៧ លាន ៧សែននាក់។

គួររំឭកថា រដ្ឋាភិបាលវៀតណាមបានបិទព្រំដែន និងលុបចោលជើងហោះហើរអន្តរជាតិទាំងអស់តាំងពីខែមីនា ឆ្នាំ ២០២០មកម្ល៉េះ ហើយចាប់តាំងពីពេលនោះមក មានតែជនជាតិវៀតណាម អ្នកជំនាញបរទេស និងកម្មករជំនាញប៉ុណ្ណោះ ដែលត្រូវបានអនុញ្ញាតឱ្យចូលមកប្រទេសវៀតណាមក្រោមវិធានការកូវីដ១៩ដ៏តឹងរឹង៕

អត្ថបទ ស៊ើង និមល់