សារព័ត៌មានអន្តរជាតិធំៗជាច្រើនបានរាយការណ៍ថា នៅក្នុងជំនួញពាណិជ្ជកម្មដ៏ធំនេះការនាំចេញទំនិញរបស់ចិន មានជាង ៨៨០ពាន់លានដុល្លារអាមេរិក ធ្លាក់ចុះ ៤,៧% ខណៈការនាំចូលពីក្រៅប្រទេសមកវិញ មានជាង ៧៥០ពាន់លានដុល្លារអាមេរិក ធ្លាក់ចុះដូចគ្នាប្រមាណ ៥,២% បើធៀបនឹងពេលដូចគ្នា កាលពីឆ្នាំមុន។
ដោយឡែកសម្រាប់ខែឧសភាកន្លងទៅ ទំហំពាណិជ្ជកម្មក្រៅប្រទេសរបស់ចិន មានជាង ៣៥០ពាន់លានដុល្លារអាមេរិក ដោយការនាំចូលមានទំហំ ១៤០ពាន់លានដុល្លារអាមេរិក ធ្លាក់ចុះ ១២% ខណៈការនាំចេញទំនិញមានជាង ២១០ពាន់លានដុល្លារអាមេរិក កើនឡើងប្រមាណ ១%។
លោក លី គូវ៉េន ប្រធាននាយកដ្ឋានស្ថិតិ និងវិភាគនៃរដ្ឋបាលគយទូទៅចិន បានគូសបញ្ជាក់ថា បើមើលតាមតួលេខថ្មីៗនេះ គឺថា ការនាំចេញទំនិញទៅក្រៅប្រទេសរបស់ចិន នៅតែបន្តលូតលាស់ ទោះបីជា សេដ្ឋកិច្ចសកលកំពុងចុះអន់ខ្សោយក៏ដោយ ពោលគឺ ចិន អាចគ្រប់គ្រងវិបត្តិនេះបានល្អ និងឆក់យកឱកាសបន្តការងារឡើងវិញ និងជំរុញការផលិតស្របពេលដែល តម្រូវការប្រើប្រាស់នៅទូទាំងសកលលោក បន្តកើនឡើងវិញ។
អត្ថបទគួរអាន
បើតាមរបាយការណ៍ផ្លូវការពី រដ្ឋបាលគយទូទៅចិន បង្ហាញថា ទំហំពាណិជ្ជកម្មរវាង ចិន និងបណ្តាប្រទេសក្នុងតំបន់អាស៊ាន សម្រេចបាន ២៤០ពាន់លានដុល្លារអាមេរិក កើនឡើង ៤,២% ហើយជំនួញជាមួយសហភាពអឺរ៉ុប វិញមានជាង ២៣០ពាន់លានដុល្លារអាមេរិក ខណៈទាក់ទងពាណិជ្ជកម្មជាមួយ អាមេរិក មានការធ្លាក់ចុះជិត ១០% ពោលគឺមានត្រឹមតែ ១៨០ពាន់លានដុល្លារអាមេរិក។
គួរជម្រាបថា គិតចាប់ពីខែមករា ដល់ខែឧសភានេះ ទំហំពាណិជ្ជកម្មរវាងចិន និងបណ្តាប្រទេសក្នុងគំនិតផ្តួចផ្តើមខ្សែក្រវាត់ និងផ្លូវ ក៏សម្រេចបាន ៤៨០ពាន់លានដុល្លារអាមេរិកផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
