ការធ្វើតេស្តជាកំហិតនឹងចាប់ផ្តើមនៅក្នុងខែមីនា ហើយប្រជាជនទាំងមូលរបស់ហុងកុងដែលបច្ចុប្បន្នមានចំនួនជាង ៧ លាននាក់នឹងត្រូវធ្វើតេស្តគ្រប់ៗគ្នា ក្នុងរយៈពេលត្រឹមមួយសប្តាហ៍ នេះបើយោងតាមប្រព័ន្ធផ្សព្វផ្សាយក្នុងស្រុកហុងកុងបានផ្សាយកាលពីថ្ងៃព្រហស្បតិ៍។ ក្នុងនោះ ប្រជាជនក្នុងទីក្រុងហុងកុងទាំងអស់នឹងត្រូវធ្វើតេស្តចំនួន ៣ លើក។
ចំនួនករណីវិជ្ជមានបានកើនឡើងដល់កម្រិតខ្ពស់ជារៀងរាល់ថ្ងៃដែលចំនួនអ្នកឆ្លងមានរហូតដល់ជាង ៦ ពាន់ករណីក្នុងមួយថ្ងៃ។ និន្នាការធ្វើតេស្តប្រជាជនទាំងអស់ក្នុងទីក្រុង គឺដើម្បីស្វែងរកការកាត់ផ្តាច់ប្រភពនៃការឆ្លងថ្មី ហើយស្របតាមគោលនយោបាយគ្មានកូវីដរបស់រដ្ឋាភិបាលចិនផងដែរ។ ទន្ទឹមនឹងនេះ ករណីកំពុងរីករាលដាលយ៉ាងឆាប់រហ័សក្នុងចំណោមមនុស្សចាស់ដែលមានប្រព័ន្ធភាពស៊ាំចុះខ្សោយ។ យ៉ាងហោចណាស់ មានអ្នកជំងឺកូវីដប្រហែលជាង ១ ម៉ឺន នាក់នៅហុងកុងកំពុងស្ថិតក្នុងបញ្ជីរង់ចាំ ដើម្បីសម្រាកព្យាបាលនៅមន្ទីរពេទ្យ ហើយមន្ទីរពេទ្យមួយចំនួនបានដំឡើងគ្រែនៅខាងក្រៅបន្ទប់មន្ទីរពេទ្យ ដើម្បីទប់ទល់នឹងតម្រូវការអ្នកជំងឺដ៏ច្រើនលើសលប់នេះ។
អត្ថបទទាក់ទង!
មែនទែនទៅ ហុងកុងបានអនុវត្តការរឹតបន្តឹងទីតាំងក្នុងតំបន់ និង ព្រំដែន យ៉ាងតឹងរ៉ឹងជាងទីក្រុងភាគច្រើនក្នុងប្រទេសចិន។ ប៉ុន្តែការចាក់វ៉ាក់សាំងក្នុងចំនោមមនុស្សចាស់មានភាពយឺតយ៉ាវបើធៀបនឹងកន្លែងផ្សេងទៀត ហើយទីក្រុងមួយនេះ ក៏មានភាពទុនខ្សោយក្នុងការអភិវឌ្ឍផ្នែកវេជ្ជសាស្រ្តដែលមិនអាចដោះស្រាយបានគ្រប់គ្រាន់ជាមួយនឹងជំងឺរាតត្បាតយ៉ាងឆាប់រហ័សនោះឡើយ។
កាលពីថ្ងៃពុធ កាសែតមួយក្នុងទីក្រុងប៉េកាំងបានរាយការណ៍ថា លោក ស៊ី ជីនពីង បាននិយាយយ៉ាងខ្លាំងៗថា ៖ ហុងកុងត្រូវតែទទួលខុសត្រូវ និង ចាត់វិធានការកាត់បន្ថយការឆ្លងមេរោគ Covid-19 គឺជាបេសកកម្មដែលត្រូវធ្វើជាចាំបាច់។ តាមរយៈការបកស្រាយរបស់លោក ស៊ី ជីនពីង ត្រូវបានគេកត់សម្គាល់ឃើញថា ជាការស្តីបន្ទោស និងការព្រមានទៅកាន់ហុងកុងចំពោះ ការបណ្ដែតបណ្ដោយឲ្យកូវីដ១៩ឆ្លងរាលដាល។ ប្រសិនបើហុងកុងបរាជ័យក្នុងការគ្រប់គ្រងការផ្ទុះឡើងនៃកូវីដ១៩ មិនយូរមិនឆាប់នោះទេ វានឹងធ្វើឲ្យប៉ះពាល់ដល់កិត្តិយសរបស់ថ្នាក់ដឹកនាំបក្សកុម្មុយនិស្តចិន ដែលបាននិងកំពុងជំរុញគោលនយោបាយគ្មានកូវីដ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
