តើពលរដ្ឋចិនភាគច្រើនមានអារម្មណ៍បែបណាចំពោះស្ថានភាពជីវភាព ក្រោយលោក ត្រាំ ត្រឡប់មកដឹកនាំសហរដ្ឋអាម៉េរិកជាថ្មី?

ការសិក្សារបស់វិទ្យាស្ថាន Hakuhodo Institute of Life and Living Shanghai បានបង្ហាញថា ៨០% នៃអ្នកដែលបានចូលរួមផ្តល់ចម្លើយក្នុងការស្ទង់មតិមានអារម្មណ៍ថា ពួកគេកំពុងធ្លាក់ចូលទៅក្នុងសម្ពាធនៃនិន្នាការបន្ទាបកម្រិតនៃការចំណាយលើថ្លៃជីវភាព ចំពេលដែលសេដ្ឋកិច្ចរបស់ប្រទេសចិន កំពុងមានសញ្ញានៃការធ្លាក់ចុះ។ ស្ថានភាពនៃការកាត់បន្ថយការចំណាយរបស់ពលរដ្ឋចិន ក៏គេអាចនឹងមើលឃើញផងដែរ តាមរយៈចរន្តរបស់ពលរដ្ឋចិន នៅលើទីផ្សារទំនិញ ដែលជាទូទៅនៅពេលបច្ចុប្បន្ន ហាងទំនិញនានាជាច្រើនមានអតិថិជនច្រើនតែនៅក្នុងអំឡុងពេលបញ្ចុះថ្លៃប៉ុណ្ណោះ។

ក្រៅពីរឹតបន្តឹងការចំណាយលើថ្លៃសម្ភារប្រើប្រាស់នានាហើយនោះ ការស្ទង់មតិខាងលើនេះក៏បានបង្ហាញដែរថា ការចំណាយលើថ្លៃអាហារ ក៏មាននិន្នាការថយចុះផងដែរ ពោលគឺថយពី១០០% មកនៅត្រឹមជាង៦៧% តែប៉ុណ្ណោះ។ ការស្ទង់មតិមួយ ដែលគេធ្វើតាមប្រព័ន្ធអនឡាញជាមួយនឹងពលរដ្ឋចិន ដែលមានអាយុពី២០ទៅ៥៩ឆ្នាំ ចំនួន៣០០០នាក់ បានបង្ហាញថា ពលរដ្ឋចិននៅតែបន្តរឹតត្បិតលើការចំណាយ ដើម្បីពង្រឹងការសន្សំ។

ការអង្កេតមួយផ្សេងទៀត ដែលគេបានធ្វើនៅក្នុងចំណោមពលរដ្ឋចិន៤០០នាក់ ដែលមានអាយុពី២០ ទៅ៥០ឆ្នាំ បានរកឃើញថា ៤២% មានអារម្មណ៍ថា ខ្លួនមានសម្ពាធនឹងការកាត់បន្ថយការចំណាយ ស្របពេលដែល៤៣% ឆ្លើយថា ការចំណាយលើថ្លៃជីវភាពកើនឡើងនៅក្នុងឆ្នាំ២០២៤ កន្លងទៅ។ ក្រៅពីនោះមាន៥៩% បានឆ្លើយថា ប្រាក់ចំណូលពួកគេថយចុះ៕

ដោយៈ សរ សុជាតិ