ថ្លែងនៅក្នុងកិច្ចប្រជុំកំពូលស្តីពីការបង្កើតថ្មីរបស់ធនាគារអន្តរជាតិ លោកស្រី Christine Lagarde ប្រធានធនាការកណ្ដាលសហភាពអឺរ៉ុបបាននិយាយថា រូបិយបណ្ណឌីជីថលរបស់ធនាគារកណ្តាល អាចដើរតួជាយុថ្កាធិការដ៏សំខាន់សម្រាប់គោលនយោបាយរូបិយវត្ថុ ខណៈដែលការប្រើប្រាស់ក្រដាសប្រាក់អាចនឹងមាននិន្នាការធ្លាក់ចុះ ។
លោកស្រីប្រធានធនាការកណ្ដាលសហភាពអឺរ៉ុបបានបញ្ជាក់ថា មួយរយៈពេលមកនេះជាពិសេសគឺនៅក្នុងពេលពិភពលោកឆ្លងកាត់អន្តរកាលនៃការរីករាលដាលនៃមេរោគកូវីដ ១៩ សេវាទូទាត់តាមប្រព័ន្ធឌីជីថល នៅអឺរ៉ុបមានកំណើនកើនឡើងបីដង ហើយនិន្នាការទៅអនាគតក៏ទំនងជាមានល្បឿនលឿនជាងនេះផងដែរ ។
ពាក់ព័ន្ធនឹងរូបិយបណ្ណឌីជីថលនេះ ធនាគារកណ្តាលនៅប្រទេសមួយចំនួនហាក់បីដូចជាស្ទាក់ស្ទើរ នៅក្នុងការជំរុញ ប៉ុន្តែទោះបីជាយ៉ាងណាក៏ដោយ ដើម្បីបំពេញតម្រូវការរបស់អតិថិជន ធនាគារនានាគឺត្រូវតែបំពេញការងារនេះបន្ថែមទៀត។
អត្ថបទគួរអាន
លោកស្រីប្រធានធនាការកណ្ដាលសហភាពអឺរ៉ុបបានបញ្ជាក់យ៉ាងច្បាស់ថា ថ្នាលនៃចរាចរណ៍សាច់ប្រាក់ឌីជីថលកំពុងតែត្រូវបាន ត្រួសត្រាយផ្លូវ ហើយប្រជាពលរដ្ឋនៅលើពិភពលោកកំពុងតែពេញនិយម ដូច្នេះវាគ្មានហេតុផលណាដែលធនាគារកណ្តាល បន្ទច់បង្អាក់ការទូទាត់តាមប្រព័ន្ធឌីជីថលនេះឡើយ ។
លោកស្រីក៏បានជំរុញឲ្យសហភាពអឺរ៉ុបធ្វើការរិះគិត អំពីប្រាក់អឺរ៉ូឌីជីថលផងដែរ ដើម្បីរក្សាកិត្យានុភាពទាំងនយោបាយ និង សេដ្ឋកិច្ចរបស់អឺរ៉ុប ។
ជុំវិញបញ្ហាកំណើនប្រជាប្រិយភាព និង ការទូទាត់រូបិយបណ្ណឌីជីថលនេះ ធនាគារកណ្តាលនៅប្រទេសជាច្រើន រួមមានទាំង ធនាគារកណ្តាលអឺរ៉ុប និង ធនាគារកណ្តាលអង់គ្លេសក៏កំពុងធ្វើការសិក្សា និងស្ទាបស្ទង់ លើការចេញរូបិយបណ្ណឌីជីថល ដែលមានសក្តានុពលសម្រាប់សាធារណជនទូទៅផងដែរ។
តាមការគ្រោងទុកប្រសិនបើគ្មានការរាំងស្ទះទេនោះធនាគារកណ្តាលអឺរ៉ុប គ្រោងនឹងដំណើរ ការបង្កើតរូបិយបណ្ណឌីជីថលនៅក្នុងរង្វង់ខែ តុលា ខាងមុខនេះហើយ៕
