ឆ្លើយតបទៅនឹងការស្នើសុំរបស់សម្តេច តេជោ អំពីការស្វែងរកការគាំទ្រពីភាគីចិន ក្នុងការអភិវឌ្ឍខេត្តព្រះសីហនុនេះ លោក លី ខឺឈាង បានបញ្ជាក់ថា លោក បានគាំទ្រចំពោះគម្រោងនៃការអភិវឌ្ឍខេត្តព្រះសីហនុនេះ ហើយលោកបានសង្កត់ធ្ងន់ថា ប្រទេសទាំងពីរ គឺចិន និងកម្ពុជា នឹងធ្វើការពិភាក្សាគ្នា ជាពិសេសលើជំនួយឥតសំណង ដើម្បីជួយដល់ការអភិវឌ្ឍខេត្តព្រះសីហនុផងដែរ។
លើសពីនេះទៀត សម្តេច តេជោ ក៏បានស្នើដល់ភាគីចិនឲ្យមានជំនួបកិច្ចប្រជុំលើកទី ៥ គណៈកម្មាធិការនៃ អន្តររដ្ឋាភិបាលកម្ពុជា-ចិន ឲ្យបាននៅមុនបំណាច់ឆ្នាំ២០១៩ ខាងមុខនេះ ដែលគ្រោងនឹងធ្វើឡើងនៅខេត្តព្រះសីហនុ។ ជាការឆ្លើយតប លោក លី ខឺឈាង នាយករដ្ឋមន្ត្រីចិន បានបញ្ជាក់ថា ប្រទេសចិន នឹងគាំទ្រក្នុងការរៀបចំនៃកិច្ចប្រជុំនេះ ដើម្បីពិភាក្សាទាក់ទងនឹងរឿងថវិកានៃប្រទេសទាំងពីរផងដែរ។
អត្ថបទទាក់ទង!
ខេត្តព្រះសីហនុ ត្រូវបានអ្នកជំនាញមើលឃើញថា មានសន្ទុះអភិវឌ្ឍកើនឡើងយ៉ាងក្ដៅគគុកនៅប៉ុន្មានឆ្នាំចុងក្រោយនេះ ដោយក្នុងនោះ លំហូនៃការវិនិយោគភាគច្រើនគឺមកពីប្រទេសចិន។ ប៉ុន្ដែ នៅប៉ុន្មានខែចុងក្រោយនេះ ទីផ្សារជួល និងទិញលក់អចលនទ្រព្យក្នុងខេត្តជាប់សមុទ្រមួយនេះ ត្រូវបានគេមើលឃើញថាហាក់មានការថយចុះខ្លាំងគួរឲ្យកត់សម្គាល់ បន្ទាប់ពីមានការចាកចេញយ៉ាងគំហុករបស់ជនជាតិចិន។ ការសម្រុកចាកចេញរបស់ជនជាតិចិននៅរយៈចុងក្រោយនេះ ត្រូវបានគេមើលឃើញថា ទំនងជាបណ្ដាលមកពីការប្រកាសឈប់បន្ត និងផ្ដល់អាជ្ញាបណ្ណដល់អាជីវកម្មល្បែងភ្នាល់តាមអនឡាញ ពីសំណាក់រាជរដ្ឋាភិបាលកម្ពុជា។
គួរជម្រាបថា របាយការណ៍ពីក្រុមប្រឹក្សាអភិវឌ្ឍន៍កម្ពុជា ឲ្យដឹងថា បើគិតចាប់ពីឆ្នាំ២០១៦ មកទល់នឹងខែសីហា ឆ្នាំ២០១៩ ខេត្តព្រះសីហនុ ទទួលបានទុនវិនិយោគពីប្រទេសចិនប្រមាណ ២ពាន់លានដុល្លារអាមេរិក ស្មើនឹង៨,៩% នៃទុនវិនិយោគសរុប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
