ដោយឃើញពីភាពប្រេះឆាក្នុងទំនាក់ទំនងរវាងប្រទេសទាំងពីរ អាមេរិកដែលជាសម្ព័ន្ធមិត្តចាក់ទឹកមិនលិចរបស់អូស្ត្រាលី និងជាគូប្រជែងធំបំផុតរបស់ចិន នាពេលថ្មីៗនេះ បានចេញមកអំពាវនាវឲ្យចិនត្រូវរូវគ្នា និងស្តារទំនាក់ទំនងជាមួយអូស្ត្រាលីឡើងវិញ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
សហរដ្ឋអាមេរិកក្រោមរដ្ឋបាលប្រធានាធិបតីថ្មីលោក ចូ បៃឌិន ហាក់មានចរិតសម្របសម្រួលច្រើនជាង រដ្ឋការលោក ដូណាល់ ត្រាំ ដោយនៅក្នុងសប្តាហ៍នេះ អាមេរិកបានប្រាប់ឲ្យប្រទេសចិន ធ្វើការស្តារទំនាក់ទំនងល្អជាមួយអូស្ត្រាលីវិញសិន មុននឹងអាមេរិកអាចត្រូវរូវគ្នាជាមួយចិនបាន។
នៅក្នុងបទសម្ភាសន៍ជាមួយកាសែតក្នុងស្រុករបស់អូស្ត្រាលី អ្នកសម្របសម្រួលកិច្ចការទំនាក់ទំនងនៃតំបន់ឥណ្ឌូ-ប៉ាស៊ីហ្វិក របស់សហរដ្ឋអាមេរិក លោក ឃឺត ខាំបែល (Kurt Campbell) បាននិយាយថា៖ បញ្ហានៃការដាក់សម្ពាធសេដ្ឋកិច្ចរបស់ចិនលើអូស្ត្រាលីនឹងត្រូវយកមកធ្វើជាប្រធានបទមួយ ដើម្បីជជែកពិភាក្សាគ្នារវាងអាមេរិក-ចិននៅកិច្ចប្រជុំក្នុងរដ្ឋអាលាស្កានាសប្តាហ៍នេះហើយ។
អត្ថបទទាក់ទង
លោក ខាំបែល បានបន្ថែមទៀតថា អាមេរិកនឹងមិនផ្សះផ្សាទំនាក់ទំនងជាមួយចិននោះទេ ប្រសិនបើចិនមិនព្រមព្យាបាលភាពប្រេះឆារវាងខ្លួន និងរដ្ឋាភិបាលអូស្ត្រាលីជាមុន។
គួររំឭកដែរថា នៅក្នុងកិច្ចប្រជុំសម្ព័ន្ធមិត្ត Quad កាលពីសប្ដាហ៍មុន ដែលមានប្រទេស៤ជាសមាជិក រួមមានអាមេរិក ជប៉ុន អូស្ត្រាលី និងឥណ្ឌា លោកប្រធានាធិបតីអាមេរិកចូបៃឌិន ធ្លាប់បានលើកឡើងដែរថា អាមេរិក និងអូស្ត្រាលីនឹងរួបរួមគ្នា ដើម្បីតទល់ជាមួយចិន ហើយលោកនឹងនៅជាមួយអូស្ត្រាលីគ្រប់កាលទេសៈ។
សូមបញ្ជាក់ថា ការវិនិយោគរបស់ប្រទេសចិន នៅក្នុងប្រទេសអូស្ដ្រាលី បានធ្លាក់ចុះជិត ២ ភាគ ៣ កាលពីឆ្នាំមុន មកនៅត្រឹមតិចជាង ១ ពាន់លានដុល្លារអាមេរិកប៉ុណ្ណោះ ខណៈដែលផលប៉ះពាល់ដោយសារតែវីរុសកូវីដ-១៩ ក៏បានរួមផ្សំធ្វើឲ្យទំនាក់ទំនងមិនល្អរវាងប្រទេសទាំងពីរមានកាន់តែខ្លាំងឡើងផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
