សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថា សម្តេចពិតជាទទួលបានសំណើបិទជើងហោះហើរទាំងអស់ពីចិន តែយ៉ាងណា ប្រទេសចិន ជាប្រទេសដ៏ធំ និងមានប្រជាជនរាប់ពាន់លាននាក់ ដូច្នេះ សម្តេចមិនទទួលយកសំណើនេះទេ ព្រោះចំនួនវិនិយោគិន និងភ្ញៀវទេសចរចិន មក កម្ពុជា មានចំនួនច្រើនណាស់ បើសិនជា កម្ពុជា បិទផ្លូវ វាអាចសម្លាប់ដល់សេដ្ឋកិច្ចជាតិ។
លើសពីនេះទៅទៀត សម្តេចតេជោ ហ៊ុន សែន ក៏បានពន្យល់បន្ថែមថា រដ្ឋាភិបាលចិន បានយកចិត្តទុកដាក់ និងមានទំនួលខុសត្រូវខ្ពស់ណាស់លើបញ្ហានេះ ហើយខាងចិន ក៏បានសម្រេចបិទជើងហោះហើរ រួចជាស្រេចទៅហើយ ជាពិសេសនៅទីក្រុងវូហាន រួមទាំងផ្លូវដែក និងផ្លូវគោកផងដែរ។
ទោះយ៉ាងណា សម្តេចតេជោ បានបញ្ជាក់ថា កម្ពុជា ត្រូវតែបន្តផ្តល់សេវានានាទាំងសេវាទេសចរណ៍ ការដឹកជញ្ជូនផ្លូវអាកាស និងផ្លូវទឹក ដល់ភ្ញៀវទេសចរ និងវិនិយោគិនចិន ដោយមិនមានការរើសអើងនោះទេ។
អត្ថបទទាក់ទង!
យ៉ាងណាក៏ដោយ សម្តេចតេជោ ហ៊ុន សែន បានបន្ថែមថា ចំពោះផលប៉ះពាល់នៃបញ្ហានេះ នឹងត្រូវបានវាយតម្លៃទៅតាម វិស័យនីមួយៗ ហើយបើទោះបីជា បញ្ហាធំប៉ុនណាក៏ដោយ ត្រូវចំណាយទឹកប្រាក់ ១០០លានដុល្លារ ២០០លានដុល្លារ ឬ ១ពាន់លានដុល្លារក្តី ក៏រាជរដ្ឋាភិបាលកម្ពុជា អាចចំណាយបានដែរ ដើម្បីដោះស្រាយបញ្ហានេះ តែចំពោះស្ថានភាពបច្ចុប្បន្ន ត្រឹមតែក្រសួងសុខាភិបាល អាចដោះស្រាយបានហើយ។
ជាចុងក្រោយ ប្រមុខរាជរដ្ឋាភិបាលកម្ពុជា ក៏បានស្នើឲ្យ ប្រជាពលរដ្ឋកម្ពុជា កុំឲ្យមានការភ័យខ្លាចហួសពីការពិត ដែលធ្វើឲ្យបាត់បង់ពេលវេលាធ្វើការ និងធ្វើអាជីវកម្ម ហើយគួរមានការប្រុងប្រយ័ត្នចំពោះជម្ងឺឆ្លងគ្រប់ប្រភេទដោយខ្លួនឯង មិនមែនតែ វីរុសកូរ៉ូណាមួយមុខនោះទេ គឺត្រូវការពារខ្លួន ដោយប្រកាន់ខ្ជាប់នូវ អនាម័យល្អ ការរស់នៅស្អាតជាដើម។
សូមបញ្ជាក់ថា បើតាមអាជ្ញាធរសុខាភិបាលចិន គិតត្រឹមព្រឹកថ្ងៃទី ៣០ ខែមករា ឆ្នាំ២០២០នេះ ករណីមនុស្សឆ្លងមេរោគ Corona បានកើនដល់ជាង ៧.៨០០នាក់ និងសម្លាប់មនុស្សអស់ ១៧០នាក់ នៅក្នុងប្រទេសចិន ហើយសម្រាប់កម្ពុជា ក៏មានករណីឆ្លងចំនួន ១ករណី នៅខេត្តព្រះសីហនុ៕
None
