ឥណ្ឌាគឺជាប្រទេសទិញសព្វាវុធរុស្ស៊ីដ៏ធំបំផុត បើធៀបនឹងប្រទេសផ្សេងទៀតក្នុងពិភពលោក ដោយតំណាងឱ្យប្រហែល២០% នៃបញ្ជីបញ្ជាទិញសព្វាវុធសរុបរបស់រុស្ស៊ី។ ហេតុនេះហើយ ទើបទីក្រុងញូវដេលីត្រូវបានគេមើលឃើញថា មានជំហរមិនច្បាស់លាស់ ជុំវិញបញ្ហាសង្គ្រាមរុស្ស៊ីនៅអ៊ុយក្រែន ព្រោះកាលពីពេលកន្លង ឥណ្ឌាមិនព្រមធ្វើការថ្កោលទោសទីក្រុងម៉ស្គូទាល់តែសោះ ដោយគ្រាន់តែបានអំពាវនាវឱ្យមានការសន្ទនា និងដោះស្រាយផ្នែកការទូត ដើម្បីដោះស្រាយជម្លោះ ខណៈបច្ចុប្បន្ន សង្គ្រាមជិតចូលដល់គម្រប់ខួប១ឆ្នាំទៅហើយ។
បណ្តាប្រទេសលោកខាងលិចមួយចំនួនបានដាក់ទណ្ឌកម្មលើរុស្ស៊ី រួមទាំងលើវិស័យយោធាផង ជាការឆ្លើយតបទៅនឹងសង្គ្រាមឈ្លានពានមួយនេះ។ យ៉ាងណាមិញ ទីភ្នាក់ងារសារព័ត៌មានជាច្រើនបានរាយការណ៍ដោយស្រង់សម្តីលោក Dmitry Shugayev ប្រធានសម្រាប់កិច្ចសហប្រតិបត្តិការបច្ចេកទេសយោធា ថា ប្រទេសឥណ្ឌា ចិន និងប្រទេសអាស៊ីអាគ្នេយ៍មួយចំនួន នៅតែរក្សាទំនាក់ទំនង និងផលប្រយោជន៍របស់ពួកគេជាមួយរុស្ស៊ីក្នុងការទិញសព្វាវុធនេះ។
ដោយឡែក បើយោងតាមទីភ្នាក់ងារ Interfax របស់រុស្ស៊ីបានរាយការណ៍ថា ការនាំចេញសព្វាវុធទៅក្រៅប្រទេសរបស់រុស្ស៊ីរៀងរាល់ឆ្នាំមានជាមធ្យមប្រហែលពី ១៤-១៥ ពាន់លានដុល្លារ ហើយបើក្រឡេកមើលការកក់ទុកសម្រាប់ការបញ្ជាទិញវិញ គឺនៅមានតម្លៃប្រមាណ៥០ពាន់លានដុល្លារ។
អត្ថបទគួរអាន
យោងតាមលោក Shugayev បានប្រាប់ Interfax ថា «ទោះបីជាមានសម្ពាធដែលមិនធ្លាប់មានពីមុនមកលើឥណ្ឌាពីបណ្តាប្រទេសលោកខាងលិច ជាពិសេសអាមេរិកទាក់ទិននឹងបញ្ហាសង្គ្រាមក៏ដោយ ក៏ឥណ្ឌានៅតែជាដៃគូដ៏សំខាន់មួយរបស់រុស្ស៊ីក្នុងវិស័យកិច្ចសហប្រតិបត្តិការបច្ចេកទេសយោធា»។
លោកបានបន្ថែមថា ទីក្រុងញ៊ូដេលីបានចាប់អារម្មណ៍ក្នុងការទិញជាពិសេសចំពោះប្រព័ន្ធមីស៊ីល S-400 Triumf របស់រុស្ស៊ី ប្រព័ន្ធមីស៊ីលពីដីទៅអាកាសរយៈចម្ងាយខ្លីដូចជា Osa, Pechora ឬ Strela ក៏ដូចជាយន្តហោះចម្បាំង Su-30 ឧទ្ធម្ភាគចក្រ MiG-29 និងយន្តហោះគ្មានមនុស្សបើកផ្សេងទៀតផងដែរ។
លើសពីនេះ ទីភ្នាក់ងារសារព័ត៌មានរដ្ឋ TASS របស់រុស្ស៊ីបានរាយការណ៍ឱ្យដឹងទៀតថា រុស្ស៊ីនឹងបង្ហាញគំរូអាវុធ និងឧបករណ៍យោធាប្រហែល ២០០ប្រភេទ នៅឯការតាំងពិព័រណ៍លំហអាកាសអន្តរជាតិលើកទី១៤ (Aero India 2023) ដែលបើកធ្វើឡើងនៅថ្ងៃចន្ទ ទី១៣ កុម្ភៈ នៅទីក្រុង Bengaluru ប្រទេសឥណ្ឌាតែម្តង។ ដូចនេះហើយវាគឺជាឪកាសដ៏កម្រមួយសម្រាប់រដ្ឋាភិបាលឥណ្ឌាក្នុងការស្វែងរកទិញយន្តហោះយោធាទំនើបបន្ថែមទៀត ដើម្បីបម្រើតម្រូវការស៊ីវិល និងការពារជាតិផងដែរ៕
