ឥណ្ឌូណេស៊ី ដាក់ឱ្យដំណើរការរថភ្លើងល្បឿនលឿនជាប្រវត្តិសាស្រ្ត

រថភ្លើងល្បឿនលឿនការពារគ្រាប់ផលិតដោយប្រទេសចិននេះ មានឈ្មោះថា «វ៉ុស» (Whoosh) ដែលអាចផ្ទុកមនុស្សសរុបជាង៦០០នាក់។ រថភ្លើងនេះនឹងធ្វើដំណើរពីទីក្រុងហ្សាការតាទៅកាន់ទីក្រុងចាវ៉ាន់ក្នុងខេត្តបានដុន ចំណាយពេលត្រឹមតែ៤៥នាទីប៉ុណ្ណោះ។ ល្បឿនខ្ពស់បំផុតរបស់វាអាចឈានដល់៣៥០គីឡូម៉ែត្រក្នុងមួយម៉ោង។

យោងតាមប្រព័ន្ធផ្សព្វផ្សាយរដ្ឋរបស់ឥណ្ឌូណេស៊ី ប្រធានាធិបតីលោក ចូកូ វីដូដូ បានធ្វើពិធីសម្ពោធនៅថ្ងៃចន្ទ ទី២ ខែតុលា ឆ្នាំ២០២៣ នេះ។ មែនទែនទៅ គម្រោងសាងសង់រថភ្លើងនេះ គឺជាផ្នែកមួយនៃគម្រោងហេដ្ឋារចនាសម្ព័ន្ធយក្ស ខ្សែក្រវាត់និងផ្លូវរបស់ចិន និងចំណាយប្រាក់អស់ជាង៧ពាន់លានដុល្លារ។

រថភ្លើងវ៉ុស ត្រូវបានសាងសង់ឡើងដោយក្រុមហ៊ុន PT KCIC ដែលជាក្រុមហ៊ុនរួមសម្ព័ន្ធរវាងក្រុមហ៊ុនរដ្ឋឥណ្ឌូនេស៊ី ចំនួនបួន និងក្រុមហ៊ុនស្ថានីយ៍រថភ្លើងរអន្តរជាតិរបស់ចិន។

ដំបូងគម្រោងសាងសង់ត្រូវបានគេប៉ាន់ប្រមាណអស់ត្រឹមតែជាង៥ពាន់លានដុល្លារទេ និងកំណត់រួចរាល់ក្នុងឆ្នាំ២០១៩ តែដោយសារតែកូវីដ-១៩ និងបញ្ហាសាងសង់មួយចំនួន បានធ្វើឱ្យតម្លៃហត់ឡើងដល់ជាង៧ពាន់លានដុល្លារ។

កាលពីជំនួបមេដឹកនាំអាស៊ាននៅឥណ្ឌូនេស៊ីកាលពីខែមុន នាយករដ្ឋមន្ត្រីចិនលោក លី ឈាង បានទៅពិនិត្យមើល និងជិះរថភ្លើងនេះជាមួយរដ្ឋមន្ត្រីជាន់ខ្ពស់ឥណ្ឌូនេស៊ីលោក លូហូដ ផាឌីចៃតាន។

លោកលូហូដក៏បានរំលេចប្រាប់អ្នកកាសែតកាលពីថ្ងៃព្រហស្បតិ៍សប្តាហ៍មុននេះថា ប្រធានាធិបតី ចូកូ វីដូដូ មានបំណងអញ្ជើញលោក ស៊ី ជិនពីង មកជិះរថភ្លើងនេះនាពេលខាងមុនផងដែរ តែមិនបញ្ជាក់ថាពេលណានោះទេ៕