កិច្ចព្រមព្រៀងទាំងនេះ បានបង្កើនការព្រួយបារម្ភផ្នែកសន្តិសុខកាន់តែខ្លាំងពីសំណាក់អាមេរិកក្នុងតំបន់យុទ្ធសាស្រ្តមជ្ឈិមបូព៌ា ចំពេលដែលអាមេរិក និងអារ៉ាប៊ីសាអូឌីត កន្លងមកនេះ ក៏មានរឿងរ៉ាវល្អក់កករនឹងគ្នាមិនតិចនោះដែរ។ នេះបើតាមការចុះផ្សាយដោយសារព័ត៌មានអន្តរជាតិធំៗ។
ស្តេចសាល់ម៉ាននៃប្រទេសអារ៉ាប៊ីសាអូឌីតបានចុះហត្ថលេខាលើ «កិច្ចព្រមព្រៀងភាពជាដៃគូយុទ្ធសាស្ត្រដ៏ទូលំទូលាយ» ជាមួយលោក ស៊ី ជីនពីង ប្រធានាធិបតីចិន ដែលត្រូវបានទទួលស្វាគមន៍យ៉ាងកក់ក្តៅ និងអធិកអធមពីសំណាក់ប្រទេសអារ៉ាប់មួយនេះ ពោលគឺអធិកអធមលើសដំណើរទស្សនកិច្ចរបស់ប្រទេសលោកខាងលិចទៅទៀត។ ក្នុងនោះ មេដឹកនាំចិនក៏បានជួបពិភាក្សាជាមួយព្រះអង្គម្ចាស់ Mohammad bin Salman ដែលរាជទាយាទនៃស្តេចសាល់ម៉ាន និងជាអ្នកគ្រប់គ្រងក្រុមហ៊ុនប្រេងយក្សរបស់ប្រទេសអារ៉ាប៊ីសាអូឌីតផងដែរនោះ ដោយលោក ស៊ី បានប្រកាសថា វាជា «យុគ្គសម័យថ្មី» នៅក្នុងទំនាក់ទំនងចិន-អារ៉ាប់។
យ៉ាងណាមិញ គេមើលឃើញថា ដំណើរទស្សនកិច្ចរបស់លោក ស៊ី ជីនពីងទៅអារ៉ាប៊ីសាអូឌីតនេះ គឺហាក់ផ្ទុយស្រឡះទៅនឹងការស្វាគមន៍ក្នុងកម្រិតមួយដ៏ទាបចំពោះប្រធានាធិបតីអាមេរិក លោក ចូ បៃដិន កាលពីខែកក្កដាកន្លងទៅ ក្រោយពីទំនាក់ទំនងនៃប្រទេសសម្ព័ន្ធមិត្តទាំងពីរបានស្គាល់នូវភាពតានតឹង ដោយសារតែគោលនយោបាយប្រេងរបស់អារ៉ាប៊ីសាអូឌីតចំពោះប្រទេសរុស្ស៊ី និងបញ្ហាសិទ្ធិមនុស្សផងនោះ។
ទន្ទឹមគ្នានេះ សហរដ្ឋអាមេរិកកំពុងតាមដានដោយឃ្លាំមើលការរីកចម្រើនរបស់ប្រទេសចិនក្នុងតំបន់ និងទំនាក់ទំនងជាមួយទីក្រុង Riyadh ដោយខ្លួនបាននិយាយកាលពីថ្ងៃពុធថា ដំណើររបស់លោក ស៊ី ជីនពីងនេះ គឺជាផ្នែកមួយនៃការប៉ុនប៉ងរបស់ចិន ដើម្បីពង្រីកឥទ្ធិពលជុំវិញពិភពលោក តែទីក្រុងវ៉ាស៊ីនតោននឹងមិនផ្លាស់ប្តូរគោលនយោបាយរបស់ខ្លួនចំពោះតំបន់មជ្ឈិមបូព៌ានោះទេ។
ក្នុងការចុះកិច្ចព្រមព្រៀងនោះ ក៏មានដែរអនុស្សរណៈជាមួយក្រុមហ៊ុនបច្ចេកវិទ្យាយក្ស Huawei របស់ចិនស្តីពីបច្ចេកវិទ្យាកុំព្យូទ័រ និងការសាងសង់អគារបច្ចេកវិទ្យាខ្ពស់នៅក្នុងទីក្រុងនានា នៃប្រទេសអារ៉ាប៊ីសាអូឌីត បើទោះបីជាសហរដ្ឋអាមេរិកមិនសុខចិត្ត ដោយសម្តែងការព្រួយបារម្ភជាមួយសម្ព័ន្ធមិត្តនៅឈូងសមុទ្រ ជុំវិញហានិភ័យសុវត្ថិភាពដែលអាចកើតមានក្នុងការប្រើប្រាស់បច្ចេកវិទ្យារបស់ក្រុមហ៊ុនចិនដើរដោយបណ្តាញ 5G ក៏ដោយ។
អត្ថបទគួរអាន
បើតាមប្រព័ន្ធផ្សព្វផ្សាយរបស់អារ៉ាប៊ីសាអូឌីត លោក ស៊ី បាននិយាយថា ប្រទេសកំពុងធ្វើដំណើរទៅបង្កើត «សករាជថ្មីក្នុងទំនាក់ទំនងរបស់ចិនជាមួយពិភពអារ៉ាប់ រួមទាំងបណ្តាប្រទេសអារ៉ាប់ផ្សេងទៀតនៅឈូងសមុទ្រពែក្ស និងអារ៉ាប៊ីសាអូឌីត»។ លោកបានបន្ថែមថា ប្រទេសចិន និងបណ្តាប្រទេសអារ៉ាប់នឹង «បន្តគាំទ្រការមិនជ្រៀតជ្រែកក្នុងកិច្ចការផ្ទៃក្នុងរវាងគ្នា»។ ដោយឡែក ប្រព័ន្ធផ្សព្វផ្សាយរដ្ឋចិន CCTV បាននិយាយថា ព្រះអង្គម្ចាស់អារ៉ាប៊ីសាអីឌីតក៏បាននិយាយដែរថា ប្រទេសរបស់លោកប្រឆាំងដាច់ខាតនឹង «ការជ្រៀតជ្រែកក្នុងកិច្ចការផ្ទៃក្នុងរបស់ប្រទេសចិនក្នុងលេសសិទ្ធិមនុស្ស»។
មែនទែនទៅ អារ៉ាប៊ីសាអូឌីត និងរដ្ឋឈូងសមុទ្រផ្សេងទៀតដូចជា អេមីរ៉ាតអារ៉ាប់រួម បានសង្កត់ធ្ងន់ថា ពួកគេនឹងមិនជ្រើសរើសភាគីមហាអំណាចពិភពលោកណាមួយប្រឆាំងនឹងមួយទៀតនោះទេ និងកំពុងធ្វើពិពិធកម្មដៃគូពាណិជ្ជកម្ម ដើម្បីបម្រើផលប្រយោជន៍សេដ្ឋកិច្ច និងសន្តិសុខជាតិរៀងៗខ្លួន។
យោងតាមទីភ្នាក់ងារសារព័ត៌មានរដ្ឋ SPA បានរាយការណ៍ថា ក្រុមហ៊ុនចិន និងអារ៉ាប៊ីសាអូឌីតក៏បានចុះហត្ថលេខាលើកិច្ចព្រមព្រៀងចំនួន ៣៤ សម្រាប់ការវិនិយោគលើថាមពលបៃតង បច្ចេកវិទ្យាព័ត៌មាន សេវាកម្មអ៊ីធើណេត ការដឹកជញ្ជូន សំណង់ និងវិស័យផ្សេងៗទៀត។ ហើយប្រទេសទាំងពីរនឹងយល់ព្រមលើកិច្ចព្រមព្រៀងដំបូងដែលមានតម្លៃ ៣០ ពាន់លានដុល្លារ៕
អត្ថបទ ៖ សុខ ជា
